قازاقستاندا ىندەت قارقىنى ۇدەپ، كۇن سايىن اۋرۋشاڭدىق كورسەتكىشى رەكوردتىق ماندە جاڭارىپ جاتىر. كوروناۆيرۋس پەن وسى تەكتەس پنەۆمونياعا شالدىققاندار سانى تاعى 5441 ادامعا ءوستى. سەيسەنبى كۇنى 57 ادام كوز جۇمدى.

دەنساۋلىق ساقتاۋ مينيسترلىگىنىڭ رەسمي مالىمەتىنشە، ەلدە 14 شىلدەدە كوروناۆيرۋس (كۆي+) جۇققان 5314 ادام، ال 13-ءى كوروناۆيرۋس پنەۆمونياسىنا (كۆي-) شالدىققان 127 ادام تىركەلدى. قازىر ەلدە 48 مىڭعا تارتا ادام (كۆي+ بويىنشا 46 306, كۆي- بويىنشا 1522) اۋىرىپ جاتىر.

#COVID پتر تەستى ارقىلى كوروناۆيرۋس جۇققانى راستالعان ناۋقاستار قاتارى ءبىر تاۋلىكتە تاعى ءبىر مىڭعا ارتتى. ولاردىڭ باسىم بولىگى ادەتتەگىدەي استانا (1576),  الماتى قالاسى (850) جانە قاراعاندى وبلىسىندا (603) تىركەلدى. بۇدان وزگە شىمكەنت (416), اتىراۋ (299), بقو (234),  اقتوبە (204), ماڭعىستاۋ (189),  اقمولا (160), پاۆلودار (156) وبلىستارىندا دەرت ۇدەپ تۇر. وتكەن تاۋلىكتە 2756 ادام ايىعىپ شىعىپ، ۇيىنە جىبەرىلگەن. وسى سەيسەنبىدە جيىنى 47 ادام قايتىس بولعان.

#COVID_پنەۆمونياسى 13 شىلدەدە اقپاراتى ءبىر تاۋلىككە كەشىگىپ بەرىلەتىن كوروناۆيرۋس پنەۆمونياسىنا شالدىققان 127 ناۋقاس ەسەپكە الىندى. ۆەدومستۆو دەرەگىنشە، سىرقاتتار اتىراۋ وبلىسى (19), استانا (19), جامبىل (15), اقمولا (12), ماڭعىستاۋ (11), الماتى (10) وبلىستارىندا كوپتەپ انىقتالعان. سونىمەن قوسا، 82 ادام ايىعىپ شىققان، تاعى 10 ادام كوز جۇمعان.

#جالپى  دەنمين دەرەگىنە قاراعاندا، ەمدەلىپ جاتقان 47 828 ناۋقاستىڭ 15 مىڭنان استامى اۋرۋحانادا، 32,5 مىڭى امبۋلاتورلىق باقىلاۋدا. احۋالى ناشار 919 ناۋقاستىڭ جاعدايى ناشار، ونداعى 212 ادامنىڭ ءحالى وتە اۋىر. بۇدان وزگە 126 سىرقات وكپەنى جاساندى جەلدەتۋ اپپاراتىمەن تىنىستاپ جاتىر.

وتكەن كۇنگى دەرەك بويىنشا، ۆيرۋستىڭ تارالۋ قاتەرى جاعىنان ەلىمىزدەگى «قىزىل ايماق» اۋماعى تولىعىپ، 13 وڭىرگە جەتتى. ولار:   استانا، الماتى، شىمكەنت قالالارى مەن اقمولا، اتىراۋ، اقتوبە،  بقو، قاراعاندى، ماڭعىستاۋ، قوستاناي، قىزىلوردا، سقو، پاۆلودار وبلىستارى. ال الماتى جانە جامبىل وڭىرلەرى «سارى ايماقتا» تۇر. قازاقستان تۇستاس قىزىل رەڭگە بويالدى.

دەنمين حابارىنشا, 1 شىلدەدە پتر سكرينينگى نەگىزىندە 414 سىناما جۇرگىزىلگەن. سايكەسىنشە، بارلىق ۇلگىنىڭ 48,3%-ىنان قازاقستاننىڭ تۇگەل ايماعىنان ۇندىستاندىق «دەلتا» شتامى انىقتالعان. ۇكىمەت مالىمەتىنشە، بيىل كوكتەم-جازدا گەنومدىق زەرتتەۋ ناتيجەسىندە ەلدىڭ باسىم بولىگىنەن ۆيرۋستىڭ برازيليالىق، بريتاندىق، وڭتۇستىكافريكالىق جانە ۇندىستاندىق شتامدارى انىقتالعان.

بىلتىر 13 ناۋرىزدان بەرى COVID-19 ينفەكتسياسىن جۇقتىرعاندار قاتارى 472 مىڭنان، 1 تامىزدان بىلايعى كوروناۆيرۋس پنەۆمونياسى 58 مىڭنان اسقان. ددسۇ دەرەكقورى مەن ۇلتتىق ستاتيستيكادا قازاقستاندا اۋىرعاندار سانى 530 مىڭنان اسقان. دەگەنمەن ۇكىمەت كوروناۆيرۋس پەن ونىڭ پنەۆمونياسىن ەكى بولەك ەسەپتەيدى.

پاندەميا باستالعالى جالپى ۆيرۋس جۇققانداردان 10 697 ادام (كۆي+ / U07.1 – 4816, كۆي- / U07.2 – 3514, ىلەسپە اۋرۋلاردان – 2367) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەندەردى جالپى ستاتيستيكاعا ەنگىزبەيدى. بۇعان قارسى ساراپشىلاردىڭ سوزىنە قاراعاندا، كوروناۆيرۋستىڭ جاناما اسەرىنەن قايتقانداردىڭ جارتىسىنان استامىنىڭ سەبەبى قان اينالىمى جۇيەسىنىڭ اۋرۋلارى بولعاندىقتان، وعان ينفەكتسيا دەرت قوزدىرۋشى فاكتور رەتىندە ولىمگە اكەپ سوقتىرعان.

قازاقستان ۆيرۋس تارالۋى بويىنشا الەمدە Worldometers دەرەكقورى، دجونس حوپكينس ۋنيۆەرسيتەتى جانە ددسۇ تىزىمىندەگى 221 ەل مەن ايماقتىڭ اراسىندا 44-ورىندا تۇر.

ۇكىمەتتىڭ سوڭعى دەرەگىنە قاراعاندا، قازاقستاندا 2 ملن 597 مىڭ ادام كوروناۆيرۋسقا قارسى ۆاكتسينانى تولىق العان.

"The Qazaq Times"