Almatıda qoldan PTR-anıqtama jasağan jäne koronavirusqa qarsı vakcinanıñ jalğan pasportın satqan medicina qızmetkerleri wstaldı. Bwl turalı düysenbi küni Polisia.kz saytı habarladı.

Policiya mälimetinşe, PTR-anıqtamanı qoldan jasau qılmısına "Dostar Med" jäne "Swñkar" jeke medicinalıq ortalıqtıñ keybir qızmetkerleriniñ qatısı bar.

"Birinşi jağdayda klinikadağı zerthananıñ jwmısşısı ortalıqtıñ eki medbikesiniñ kömegimen biomaterial almay-aq nätijesi teris PTR test jürgizip, sol üşin aqşalay sıyaqı alğan. Biraz uaqıt ötken soñ "Swñqar" medicina ortalığınıñ däriger-endoskopisi wstaldı" delingen policiya habarlamasında.

Ondağı aqparatqa säykes, koronavirusqa qarsı vakcinanıñ jalğan pasportın jasağan №4 auruhana qızmetkeri de wstalğan. Ol sol "qızmeti üşin 15 mıñ teñge alğanın moyındağan". Qılmıstıq kodekstiñ 385-babı boyınşa ("Jalğan qwjattardı, mörlerdi, blankilerdi, memlekettik poşta tölemi belgilerin, memlekettik nagradalardı qoldan jasau, dayındau nemese ötkizu") sotqa deyingi tergeu amaldarı bastalğan. Bwl bap boyınşa 4 jılğa deyin bas bostandıqtan ayıru jazası qarastırılğan.

İşki ister ministrliginiñ baspasöz qızmetine süyengen Vlast saytınıñ jazuınşa, şilde ayınan beri astanada PTR-anıqtamanı qoldau jasau isi boyınşa eki fakt tirkelgen. Jeke medicinalıq ortalıqtıñ basşısı wstalğan. Bwğan qosa, İİM şetelde jürgen qazaqstandıqtıñ jalğan anıqtama satumen aynalısqanın habarladı. Ol boyınşa da qılmıstıq ister qozğalğan.

Bwğan deyin Almatıdağı turistik kompaniyalardıñ biri adamdardı Saud Arabiyasına qajılıqqa jiberu üşin 143 vakcina pasportın qoldan jasağan dep habarlanğan edi.

Ötken aptada işki ister ministrligi jalğan vakcina pasportın jasauğa qatıstı tört qılmıstıq is qozğalğanın qaytalağan. Vedomstvo "jalğan vakcina pasportın jasau jappay sipat aldı" degen aqparattı joqqa şığarğan.

"The Qazaq Times"