مامىردىڭ 11-ءى كۇنى ەكس-پرەزيدەنت نۇرسۇلتان نازارباەۆ تۇركىستان قالاسىنا ىسساپارمەن باردى. بۇگىن ءبىز بۇرىنعى مەملەكەت باسشىسىن كۇتىپ الۋ شارالارىنا قانشا قارجى جۇمسالعانىن ايتپاقپىز.

نازارباەۆتىڭ تۇرىكستانعا ساپارى

مەملەكەتتىك ساتىپ الۋلار پورتالىندا جاريالانعان مالىمەتكە سۇيەنسەك، تۇركىستان قالاسى اكىمدىگىنىڭ مادەنيەت جانە تىلدەردى دامىتۋ ءبولىمى  نۇرسۇلتان نازارباەۆتىڭ ءىسساپارىنا تىكەلەي جانە جاناما قاتىسى بار شارالارعا بىرنەشە تەندەر جاريالاعان. اتاپ ايتقاندا، ەكس-پرەزيدەنت اشىلۋىنا قاتىساتىن عيماراتتاردى بەزەندىرۋگە، تەاترلاندىرىلعان قويىلىم قويۋعا جانە ۇيىمداستىرۋعا بيۋدجەتتەن 34 651 111 (سالىقتى قوسقاندا 38 809 244 22)  تەڭگە قارجى ءبولىنىپ، تەندەر وتكىزىلگەن. ونى «SUNNY FIELD COMMUNICATIONS» جشس كومپانياسى ۇتىپ العان.

Uchet.kz سەرۆيسىندەگى دەرەكتەرگە قاراعاندا، كومپانيانى جامانقۇلوۆا اينۇر مامىرحانقىزى باسقارادى. «SUNNY FIELD COMMUNICATIONS» جشس 2007 جىلى تىركەلگەن. اشىق دەرەككوزدە «جارنامامەن اينالىساتىن شاعىن كاسىپورىن» دەپ كورسەتىلگەن كومپانيا 2010-2017 جىلدارى ارالىعىندا ەشقانداي سالىق تولەمەگەن. 2018-2021 جىلدارى 34 926 735 تەڭگە سالىق تولەگەن. بۇدان بولەك، جامانقۇلوۆا اينۇر مامىرحانقىزىنىڭ اتىندا «RBS KNOWLEDGE» جانە «گر كومپاني» جشس كومپانيالارى بار. بۇل ەكى كومپانيانىڭ ەكەۋى دە مەملەكەتتىك ساتىپ الۋلارعا قاتىسپايدى.

بۇعان قوسا، نۇرسۇلتان نازارباەۆ قاتىسقان تۇركىستان مۋزىكالىق دراما تەاترىنىڭ اشىلۋ راسىمىنە جالپى سومماسى 89 285 714 (سالىقتى قوسقاندا 100 000 000)  تەڭگەلىك تەندەر جاريالانعان. ونى «ا+ا Idea Fabric» جشس كومپانياسى ۇتقان. بۇل كومپانيا 2018 جىلى الماتى قالاسىندا تىركەلگەن. باسشىسى ورىنباساروۆ قۋانىش باتىربايۇلى. ونەر سالاسىندا قىزمەت كورسەتەتىن كومپانيا 2018 جىلدان بەرى 545 205 708 تەڭگە سالىق تولەگەن. ەكى تەندەردىڭ ەكەۋى دە «تىكەلەي ءبىر كوزدەن ساتىپ الۋ» ءتاسىلى بويىنشا وتكەن.

 

تۇركىستان ساپارىندا نازارباەۆ قايدا باردى؟

ءىسساپار بارىسىندا نۇرسۇلتان نازارباەۆ مۋزىكالىق دراما تەاتردىڭ اشىلۋىنا قاتىسىپ قانا قويماي، سۋ جاڭا تەاتردا «شاڭىراق» مينياتيۋراسىن تاماشالدى. بۇدان بولەك، ول تۇڭعىش پرەزيدەنت ساياباعىن اباتتاندىرۋ جۇمىستارىمەن تانىسىپ، قازاق حاندىعى مەموريالدىق كەشەنىنىڭ اشىلۋ سالتاناتىنا قاتىسقان جانە «ازىرەت سۇلتان» تاريحي-مادەني قورىعى اۋماعىنداعى ەتنواۋىلعا بارعان. كەرۋەن ساراي تۋريستىك كەشەنى مەن «التىن سامرۇق» اۋەدەگى تەاترىندا قىز قۋ جانە تەاترلاندىرىلعان سۋ شوۋى قويىلىمدارىن كورگەن. نۇرسۇلتان نازارباەۆتى كۇتىپ  الىپ، شاھارمەن تانىستىرۋ راسىمىنە 124 ميلليون 212 مىڭ 449 تەڭگە قارجى جۇمسالعان.

جارتى ميلليارد تەڭگە جۇمسالعان سامميت

تۇركىستاندا ناۋرىز ايىندا بولعان تۇركى كەڭەسى ءسامميتىن ۇيىمداستىرۋ دا جوعارىدا اتالعان «SUNNY FIELD COMMUNICATIONS» جشس جانە «ا+ا Idea Fabric» جشس كومپانيالارىن اينالىپ وتپەدى. سامميتكە بايلانىستى جاريالانعان تەندەرلەردى ءدال وسى ەكى كومپانيا جەڭىپ العان.

«SUNNY FIELD COMMUNICATIONS» جشس VIII تۇركى كەڭەسى سامميتىنە بايلانىستى وتكەن ەكى بىردەي تەندەردى ۇتىپ العان. ونىڭ ءبىرى 90 255 952.42 تەڭگە بولسا، ەكىنشىسى 147 726 713.12 تەڭگە. بۇل ەكى تەندەر دە سامميت اياسىندا ەتنواۋىل گالەرەياسىن بەزەندىرۋگە، تەحنيكالىق جابدىقتاۋعا، شارانى ۇيىمداستىرۋ مەن وتكىزۋگە ارنالعان.

ال «ا+ا Idea Fabric» جشس ۇتقان 346 100 000.00 تەڭگەلىك تەندەر سامميت اياسىندا كونتسەرتتىك باعدارلاما دايىنداۋعا ارنالعان. بۇل تەندەردىڭ قارجىسى باستاپقىدا 500 000 000 تەڭگە بولعان. بىراق تۇركى كەڭەسى ءسامميتى ەپيدەميالوگيالىق احۋالعا بايلانىستى ونلاين فورماتتا وتەتىن بولعاندىقتان قىسقارعان. بۇل ءۇش تەندەردى قوسىپ العاندا تۇركى كەڭەسى سامميتىنە 584 ميلليون 082 مىڭ 665 تەڭگە قارجى جۇمسالعان.

ساياساتتانۋشى ءازىمباي عالي قازىرگىدەي قيىن-قىتاۋ كەزەڭدە سامميت، تويعا قارجى ءبولۋدى توقتاتۋ كەرەك دەپ ەسەپتەيدى. ونىڭ سوزىنشە، مۇنايدىڭ اقشاسىن شاشۋدى توقتاتاتىن ۋاقىت جەتتى.

"وسى ۋاقىتقا دەيىن ەلدىڭ ءيميدجىن جاساۋ ءۇشىن سامميت جاسادىق. باعدارلامالارىمىزدى ايتتىق. ەندى مال شاشۋدى توقتاتۋ كەرەك. ەلدىڭ بارلىعىنا ءبىر-ءبىر سامميت وتكىزۋدىڭ قاجەتى جوق. قازىر مەرەكەلىك شارالارعا ءبولىنىپ جاتقان قارجىنىڭ جارتىسى ۇرلانادى. وتىرىك بولسا ءازىمبايدى قۋدالاسىن. سوندىقتان مال شاشپاق ەل بولماۋىمىز كەرەك. قازىر ءبىز جەر بايلىعىن شاشىپ جاتىرمىز. ال ەڭبەك ونىمدىلىگى جوق. ەڭبەك ونىمدىلىگى جوعارى بولىپ، دەموكراتيالىق بيلىك وتىرسا بايلىقتى شاشۋعا رۇقسات. قازىر بۇنىڭ جارتىسى ۇرلاناتىنى انىق", - دەيدى عالي. 

نۇرسۇلتان نازارباەۆتىڭ ساپارى مەن تۇركى كەڭەسى سامميتىنە جۇمسالعان قارجىنى قوسا ەسەپتەگەندە 708 ميلليون 302 مىڭ 114 تەڭگە بولادى. حالىقتىڭ الەۋمەتتىك جاعدايى ناشارالاپ، قىمباتشىلىق دەندەپ تۇرعان ۋاقىتتا بۇل قارجىعا نە ىستەۋگە بولار ەدى؟ مىسالعا، بۇل قارجىعا 64 391 بالاعا 11 مىڭ تەڭگەدەن ءبىر رەتتىك كومەك نەمەسە 16 665  ادامعا ەڭ تومەنگى جالاقى مولشەرىندە (42 500 تەڭگەدەن) بەرۋگە بولار ەدى. بۇدان بولەك، تۇركىستان قالاسىنان 47 وتباسىنا قۇنى 15  000 000 تەڭگەلىك 4-5 بولمەلى ءۇي الۋعا بولادى.

جالپى، تۇركىستان وبلىسى قازاقستان بويىنشا ەڭ كەدەي ايماق. وبلىستا ءاربىر 10-شى ادام كەدەيلىك شەگىندە ءومىر سۇرەدى. بالالار كەدەيلىگى بويىنشا دا تۇركىستان وبلىسى كوش باستاپ تۇر. يۋنيسەف ەسەبىنە سايكەس، قازاقستاندا 1 ميلليونعا جۋىق بالا (916 مىڭى) الەۋمەتتىك جاعدايى تومەن وتباسىلارىندا تاربيەلەنۋدە. ونىڭ 13,8 % ءدال وسى تۇركىستان وبلىسىنا تيەسىلى.

بۇل كونتەنت اقش دامۋ اگەنتتىگى (USAID) ارقىلى امەريكا حالقىنىڭ كومەگىمەن "MediaCAMP – ورتالىق ازيا باعدارلاماسى" اياسىندا دايىندالدى. The Qazaq Times پورتالى اقپاراتتىڭ مازمۇنىنا تىكەلەي جاۋاپتى جəنە اقپارات USAID-تىڭ نەمەسە اقش ۇكىمەتىنىڭ، سونىمەن قاتار Internews ۇستانىمىنا ساي كەلمەۋى مۇمكىن.

The Qazaq Times