«Wlı dala wlı emes, wrısı!»: Almatıdağı Nazarbaev muralınıñ hronikası

Almatı qalasında belgisiz bireuler oppoziciya men azamattıq qoğam «zañ jüzinde otstavkağa ketkenimen, biliktiñ barlığın uısında wstap otır» dep esepteytin eks-prezident Nazarbaevqa arnalğan muraldı «büldirip ketti».

Bügin, 8 şildede Instagram jelisindegi Qazaq Koktemi Rukh art qozğalısı men Rukh2k19 oppoziciyalıq tobınıñ paraqşasında muraldıñ özgertilgen sureti payda boldı. Onda bwrınğı prezidenttiñ jas kezindegi sureti DC Comics-tiñ zwlım keyipkerleriniñ biri Djokerge wqsap qalğan.

Jarokov jäne Mıñbaev köşeleriniñ qiılısındağı garaj qabırğasına beynelengen muraldağı «Wlı dala wlı» degen latın tilindegi jazu «Wlı dala wrı» dep özgertilgen. Forever Young tirkesine «krest» qoyılıp, Cancel degen söz payda bolğan.

Wstanım-pikirin «körkemöner-kreativ tilde» bildirip jürgen art-qozğalıstıñ  insta-paraqşasında eks-prezidentke arnalğan ündeu de jariyalandı:

Qazaq Koktemi-nen Nwrswltan Nazarbaevqa hat
Nwrswltan,
Zañnıñ aldında adamnıñ bäri teñ, seniñ de barlıq jauızdığıña jauapqa tartılatın küniñ alısta emes.
Öziñe qanşa eskertkiş qoysañ da, halıq seni tek qarğıspen eske alatın boladı.
Özgerister tayap qaldı.
Sen wlı dala wlı emes, wlı dalanıñ wrı men jauızısıñ!

@Rukh2k19 azamattıq paraqşası jariyalağan suret. Foto: Instagram

Azattıq radiosınıñ habarlauınşa, tilşi beysenbi küni tañerteñ muraldıñ palatkamen jabılğanın körgen. Bir qızığı, özin tanıstırmağan bir top adam kelip tilşige kedergi jasap, suretke tüsirmeudi jäne telefonnan dereu öşirudi talap etken.

Osığan deyin #qazaqkoktemi heştegimen Nazarbaev twsındağı sayasat pen onıñ saldarın sınaytın birneşe jazba jariyalanğan. Ädette Qazaqstanda qwqıq qorğauşılar jii ayıptaytın Elbası turalı zañnıñ negizinde erekşe qwziretke ie eks-prezident Nazarbaev turalı aşıq ta ötkir mälimdeme jasağan azamattardıñ tügel derligi jazağa tartıladı. Otandıq onamastika salasında qalıptasqan ayırıqşa nwronimder qatarında (30 jılday bilik etken bwrınğı prezidenttiñ) tuğan küni qarsañında boy kötergen 18-inşi eskertkişinde «Wlı dala wlı» degen jazu qosarlanıp qoyılğan edi.

Jwrt köp sınağan Nazarbaevtıñ kezekti eskertkişi. Türkistan oblısı. Foto: Äkimdiktiñ baspasöz qızmeti

“The Qazaq Times”