Şwğıl şaqırtu boyınşa twrğın üydiñ birine kelgen jedel järdem qızmetiniñ koronavirustıq brigadası. Säuir 2021 jıl. Almatı qalası. Foto: QT / Kültegin Aspanwlı

Almatıda bir adamnan koronavirustıñ "ündistandıq ştamı" anıqtaldı. Bwl turalı 23 mausım küngi brifing kezinde qalanıñ bas sanitar därigeri Jandarbek Bekşin habarladı.

"Almatıda bir adamnan anıqtaldı. Biz onımen qarım-qatınasta bolğan adamdardıñ barlığın esepke aldıq. Ol – üy şaruasındağı äyel, ünemi üyde otırğan. Küyeui arı-beri köp jüretin mamandıq iesi, biraq ol aqpan ayında auırıp şıqqan" dedi Bekşin särsenbi küngi brifingte.

Onıñ aytuınşa, nätijesi oñ şıqqan PTR-testerdi tekserip şıqqan kezde 89 payızınan virus mutaciyası anıqtalğan.

"12-19 mausım aralığında mutaciyalanğan ştamdardıñ aynalımın anıqtau üşin PTR-diagnostika jürgizdik. 53 zertteudiñ 44-inen - britandıq ştamm, ekeuinen – oñtüstikafrikalıq, bireuinen n'yu-yorktik ştamm anıqtaldı. Qalğan 11 payızında virus mutaciyası anıqtalmadı" dedi Bekşin.

Bwğan deyin el astanasında da koronavirustıñ "ündistandıq şatammı" anıqtalğan. Soğan baylanıstı elordada karantindi küşeytu turalı şeşim qabıldandı. Vedomstvoaralıq komissiya elde qızmet körsetu salasında isteytin kompaniyalar men iri mekeme qızmetkerlerine vakcina mindetteu turalı wsınıs ayttı.

Koronavirustıñ ündistandıq ştamı – SARS-CoV-2 virusınıñ törtinşi nwsqası. Düniejüzilik densaulıq saqtau wyımı onı ğalamdıq deñgeyde alañdauşılıq tudıratın ştamdar tizimine engizgen. Bwl tizimge virustıñ tez jwğatın, aurudı asqındırıp jiberetin jäne vakcina men däri-därmekke boy bermeytin türleri engen. Ündistandıq ştamm 70-ten astam elde anıqtalğan.

"The Qazaq Times"