Belsendileri "sayasi twtqındardıñ" bosatıluın talap etip twr. Körneki suret Foto: Azattıq

Qazaqstanda tağı da eki adam "sayasi twtqındar" tizimine qosıldı. Qwqıq qorğauşılardıñ sarapşılar keñesi 19 mamırda jariyalanğan jaña tizimge jaqında ğana şekteu jazası türme jazasımen almastırılğan petropavldıq belsendi Nwrbol Önerhan men astanalıq belsendi Jänibek Jünisovti qostı. Bwl aqparattı Azattıq radiosı habarladı. 

Azattıq mälimetinşe, Nwrbol Önerhan – Soltüstik Qazaqstan oblısı Birlik auılınan şıqqan azamattıq belsendi. Bıltır küzde Petropavl sotı "tıyım salınğan wyımnıñ isine aralasqanı" üşin onıñ bostandığın eki jılğa şektegen. Jaqında 4 mamırda "probaciya şarttarın bwzğanı üşin" türmege jiberildi. Al Jänibek Jünisov – "tıyım salınğan wyımnıñ isine aralasqanı üşin" ("Köşe partiyası" qozğalısı) üstinen qılmıstıq is qozğalıp, qazir tergeu izolyatorında otırğan nwr-swltandıq belsendi. Qoğamdıq belsendiligi üşin birneşe ret äkimşilik jauapqa tartılğan. Ol 2021 jıldıñ aqpan ayınan beri qamauda otır.

Elde "sayasi twtqındar" tizimi jii jañarıp jatır. Tizimge keyingi kezde engen belsendilerdiñ köbi "Qazaqstannıñ demokratiyalıq tañdauı" qozğalısı jäne "Köşe partiyasına" qatısı bar dep küdikke ilingen. Qazaqstan sotı "ekstremistik wyım" dep tanığan QDT men "Köşe partiyasın" Europarlament "beybit oppoziciyalıq wyım" dep atağan. Qwqıq qorğauşılar eki wyımğa qatıstı şıqqan sot şeşiminiñ jariyalanbağanın aytıp, sınağan.

Qazaqstanda alğaşqı sayasi twtqındar tizimi 2013 jılı jasalğan. Qwqıq qorğauşılar sayasi twtqın dep tanığandar qatarında aqın äri dissident Aron Atabek, jañaözendik belsendi Erjan Elşibaev, "terrorizmdi nasihattadı" dep sottalğan Kenjebek Äbişev, Almat Jwmağaliev te bar.

Qazaqstan biligi "elde azamattar sayasi pikirine baylanıstı qudalanadı" degen pikirmen kelispeydi jäne "sayasi twtqındar joğın" aytıp keledi. Al eldegi sayasi qudalau turalı aqparat taratatın Tirek.info saytınıñ mälimetinşe, jañadan qosılğandaradı eseptegende Qazaqstanda barlığı 28 sayasi twtqın qamauda otır.

"The Qazaq Times"