بەلسەندىلەرى "ساياسي تۇتقىنداردىڭ" بوساتىلۋىن تالاپ ەتىپ تۇر. كورنەكى سۋرەت فوتو: ازاتتىق

قازاقستاندا تاعى دا ەكى ادام "ساياسي تۇتقىندار" تىزىمىنە قوسىلدى. قۇقىق قورعاۋشىلاردىڭ ساراپشىلار كەڭەسى 19 مامىردا جاريالانعان جاڭا تىزىمگە جاقىندا عانا شەكتەۋ جازاسى تۇرمە جازاسىمەن الماستىرىلعان پەتروپاۆلدىق بەلسەندى نۇربول ونەرحان مەن استانالىق بەلسەندى جانىبەك ءجۇنىسوۆتى قوستى. بۇل اقپاراتتى ازاتتىق راديوسى حابارلادى. 

ازاتتىق مالىمەتىنشە، نۇربول ونەرحان – سولتۇستىك قازاقستان وبلىسى بىرلىك اۋىلىنان شىققان ازاماتتىق بەلسەندى. بىلتىر كۇزدە پەتروپاۆل سوتى "تىيىم سالىنعان ۇيىمنىڭ ىسىنە ارالاسقانى" ءۇشىن ونىڭ بوستاندىعىن ەكى جىلعا شەكتەگەن. جاقىندا 4 مامىردا "پروباتسيا شارتتارىن بۇزعانى ءۇشىن" تۇرمەگە جىبەرىلدى. ال جانىبەك ءجۇنىسوۆ – "تىيىم سالىنعان ۇيىمنىڭ ىسىنە ارالاسقانى ءۇشىن" ("كوشە پارتياسى" قوزعالىسى) ۇستىنەن قىلمىستىق ءىس قوزعالىپ، قازىر تەرگەۋ يزولياتورىندا وتىرعان نۇر-سۇلتاندىق بەلسەندى. قوعامدىق بەلسەندىلىگى ءۇشىن بىرنەشە رەت اكىمشىلىك جاۋاپقا تارتىلعان. ول 2021 جىلدىڭ اقپان ايىنان بەرى قاماۋدا وتىر.

ەلدە "ساياسي تۇتقىندار" ءتىزىمى ءجيى جاڭارىپ جاتىر. تىزىمگە كەيىنگى كەزدە ەنگەن بەلسەندىلەردىڭ كوبى "قازاقستاننىڭ دەموكراتيالىق تاڭداۋى" قوزعالىسى جانە "كوشە پارتياسىنا" قاتىسى بار دەپ كۇدىككە ىلىنگەن. قازاقستان سوتى "ەكسترەميستىك ۇيىم" دەپ تانىعان قدت مەن "كوشە پارتياسىن" ەۋروپارلامەنت "بەيبىت وپپوزيتسيالىق ۇيىم" دەپ اتاعان. قۇقىق قورعاۋشىلار ەكى ۇيىمعا قاتىستى شىققان سوت شەشىمىنىڭ جاريالانباعانىن ايتىپ، سىناعان.

قازاقستاندا العاشقى ساياسي تۇتقىندار ءتىزىمى 2013 جىلى جاسالعان. قۇقىق قورعاۋشىلار ساياسي تۇتقىن دەپ تانىعاندار قاتارىندا اقىن ءارى ديسسيدەنت ارون اتابەك، جاڭاوزەندىك بەلسەندى ەرجان ەلشىباەۆ, "تەرروريزمدى ناسيحاتتادى" دەپ سوتتالعان كەنجەبەك ابىشەۆ، المات جۇماعاليەۆ تە بار.

قازاقستان بيلىگى "ەلدە ازاماتتار ساياسي پىكىرىنە بايلانىستى قۋدالانادى" دەگەن پىكىرمەن كەلىسپەيدى جانە "ساياسي تۇتقىندار جوعىن" ايتىپ كەلەدى. ال ەلدەگى ساياسي قۋدالاۋ تۋرالى اقپارات تاراتاتىن Tirek.info سايتىنىڭ مالىمەتىنشە، جاڭادان قوسىلعاندارادى ەسەپتەگەندە قازاقستاندا بارلىعى 28 ساياسي تۇتقىن قاماۋدا وتىر.

"The Qazaq Times"