2 qırküyek elordanıñ Mäjilis üyinde ötip jatqan VI şaqırılımdağı QR Parlamentiniñ besinşi sessiyasınıñ aşıluına oray Parlament palatalarınıñ birlesken otırısında prezident öz Joldauında jer mäselesin köterdi. 

«Jwrtşılıqtı  tolğandırıp jürgen jer mäselesine arnayı toqtalağım keledi. Memleket basşısı retinde tağı da mälimdeymin. Jerimiz  şeteldikterge satılmaydı, oğan jol berilmeydi. Bwl mäsele boyınşa qaueset taratudı doğaru kerek. Biraq jerdi tiimdi paydalanudı qamtamasız etu – bizdiñ  mindetimiz. Jerdi tiimdi igeru mäselesi barğan sayın özektilenip baradı. Jağday jerge salınatın tikeley salıqtıñ tömendigimen uşığıp otır. Memleketten aqısız jer jaldau qwqığın alğandar  ieligindegi jermen jwmıs istemey otır. Elimizde latifundister qatarı payda boldı», – dedi memleket basşısı.

Esteriñizge sala ketsek, 2016 jılı säuirdiñ 24-i Atırau qalasında jer mäselesine baylanıstı miting ötip, narazılıq akciyaları Qazaqstannıñ özge de qalalarında da jalğasqan edi. Jaña mıñjıldıqta bwlay buırqanıp körmegen bwqaranıñ basköteruinen seskengen bilik mamırda jer kodeksindegi rezonans tudırğan zañ baptarına moratoriy jariyalağan.

Jer reformasın talqılau üşin ükimet janınan köşpeli Jer komissiyası qwrıldı. Komissiyanıñ qwramına şaqırılğan birneşe belsendi onıñ jwmısına qatısudan bas tartqan. Halıqtıñ talabımen jäne Jer komissiyasınıñ wsınısımen sol kezdegi prezident Nazarbaev 19 tamızda şeteldikterge jerdi jalğa beru turalı zañğa 2021 jılğa deyin moratoriy engizgen edi. 2016 jıldıñ säuirinde ötken Atıraulıq şeru belsendileri Maks Boqaev pen Talğat Ayan birneşe ayıptaularmen bes jılğa sottalğan bolatın. Jazuşı Q.Jwmadilov bastağan azamattıq qoğam belsendileri qamaudağı belsendilerdi sırttay «Halıq qaharmanı» sıylığımen marapattağan edi. Jer mäselesi turalı sıbıs el işinde äli esip jür. Biıl erte köktemde Şığıs Qazaqstan oblısındağı şeteldikterge jer satıldı degen aqparat tarağan, bwğan qatıstı jauaptı mekemeler qauesetti teristegen.

"The Qazaq Times"