«Birtanov memleketke 1,5 mlrd teñge şığın keltirdi»

Qazaqstannıñ eks-densaulıq saqtau ministri Eljan Birtanov pen onıñ orınbasarı Oljas Äbişev memleketke 1,5 mlrd teñge köleminde şığın keltirdi degen küdikke ilindi Bwl turalı Vlast.kz saytı jazdı.

Sayttıñ habarlauınşa, 5 mamırda tergeu sotında prokuror Tölegen Jarasbaev Birtanovtıñ üyqamaq merzimin tağı bir ayğa sozudı swrağan. Prokuror bwrınğı ministrdiñ şekteulerge qaramastan hat joldap, otbası, advokatınan basqa adamdarmen aralasıp, "ereje bwzğanın" atap ötken. Ayıptau tarabı oğan medicinalıq mekemeden basqa jaqqa baruğa tolıq tıyım saludı, telefon arqılı kelissöz jürgizbeudi, hat joldamaudı, otbası, advokatınan basqa eşkimmen söylespeudi mindetteuin swrağan. Üyqamaq merzimin 14 mausımğa deyin sozudı ötingen. Sot 6 mamırda jalğasadı.

Tergeu organdarınıñ boljamınşa, 2015 jılı densaulıq saqtau ministrligi horvattıñ Ericsson Nikola Tesla kompaniyasımen qwnı 17,8 mln dollar bolatın "densaulıq saqtau salasındağı aqparattıq platformanı" elge äkelu boyınşa kelisim jasasqan. Birıñğay derek qorı saqtaladı delingen platforma densaulıq saqtau salasındağı aqparattıq jüyeni biriktirui tiis bolğan.

"Densaulıq saqtau ministri Eljan Birtanov platformanıñ jwmıs istemeytinin bile twrıp, [bwrınğı vice-ministr] Oljas Äbişevpen kelisip, 2018 jılı 17 emdeu mekemesinde platformanı pilottıq twrğıda paydalanu turalı bwyrıqqa qol qoyğan". Prokuror is jüzinde pilottıq paydalanu jüzege aspadı dep sanaydı.

Ayıptau tarabınıñ aytuınşa, bwrınğı ministr memleket basşılığına platformanıñ 17 mekemede sınalğanı jaylı aqparat berip, jañıldırğan. Al vice-ministr Äbişev "memlekettik satıp alu turalı" zañğa jüginbey 2018 jılı qazan ayında Ericsson Nikola Tesla kompaniyasımen 9 mln dollarğa kelisim jasasıp, jwmıs atqarılmasa da jeltoqsan ayında aktige qol qoyıp, Ericsson Nikola Tesla kompaniyasına 6,8 mln dollardı audarğan. Bıltır aqpan ayında Birtanov platformanı önerkäsiptik paydalanuğa engizu turalı bwyrıqqa qol qoyğan. Biraq platforma äli iske qosılmağan deydi ayıptau tarabı. Prokuror osılayşa Birtanov, Äbişev jäne özge twlğalardıñ äreketiniñ saldarınan memleketke 1,5 mlrd teñge köleminde şığın keldi dep sanaydı.

Bwğan deyin Birtanovtıñ advokatı Dmitriy Kuryaçenko tergeu organdarında bwrınğı ministrdiñ kinäsin däleldeytin bwltartpas ayğaqtar joğın alğa tartıp, "tergeu organdarınıñ äreketi isti ob'ektivti jürgizuge emes, Birtanovtı qudalauğa bağıttalıp otır" dep mälimdegen edi. Advokat daulı platformanıñ jwmıs istep twrğanın, iske platformanı jasağan Ericsson Nikola Tesla ökilderi, ne merdiger, ne platformanı qabıldağan komissiya müşeleri tartılmağanına nazar audarğan. Advokat platformanı qabıldau-paydalanu aktisine qol qoymağan Birtanovtıñ zañsız qudalanıp jatqanın, onıñ üyqamaqta zañsız otırğanın da aytqan.

2017 jıldıñ qañtarınan bastap densaulıq saqtau ministri qızmetin atqarğan 49 jastağı Eljan Birtanov bıltır mausımda koronaviruspen auırğandar sanı kürt köbeyip, auruhanalarda orın jetpey jatqan twsta qızmetinen bostılğan. Al qaraşa ayında ol «iri kölemde qarjı jımqıru» küdigi boyınşa wstaldı. Ol sol kezden beri üyqamaqta otır. 26 naurızda sot onıñ qamau merzimin 30 säuirge deyin wzartqan.

"The Qazaq Times"