Qazaqstannıñ bwrınğı densaulıq saqtau ministri Eljan Birtanov "SK-Farmaciya" kompaniyasınıñ bwrınğı basşısı Berik Şäriptiñ sotında kuäger retinde söylep, kompaniya basşısınıñ kinäsi joğın ayttı. Bwl turalı Azattıq radiosı habarladı.

Berik Şäripke eki bap boyınşa ayıp tağılğan: "qızmettik ökiletin asıra paydalanu" (361-bap, 4-tarmaq 3-punkt) jäne "zañsız qaru-jaraq saqtau, alu, tasımaldau" (287-bap 2-tarmaq 3-4 punkter).

Bwğan deyin ayıptau tarabı Berik Şärip bıltır indet kezinde "bir rettik qorğanış kiimderin satıp alu boyınşa basqa tasımaldauşılarğa qarağanda qımbatıraq bağa wsınıp, sonıñ özinde önimdi uaqıtında jetkizbegen kompaniyağa basımdıq berdi" dep ayıptağan. Sonıñ saldarınan elde qorğanış kiim tapşılığı tuındap, nätijesinde därigerler jappay koronavirusqa şaldıqqan.

Bwrınğı ministr ayıptau tarabınıñ aytqandarımen kelispey, bıltır qorğanış kiim tapşılığınıñ tuındauına "SK-Farmaciya" emes, Qıtay tarabı kinäli dep mälimdegen.

– "CK-Farmaciya" men Berik Şärip tasımaldaudı keşiktirgen joq, qasaqana äreket etti deu mülde qisınsız. Bwl fors-major, Qıtaydağı procestiñ keşiktirilui. Qıtay tarabı Qazaqstanmen jasasqan kelisim-şarttardı orındamadı. Säykesinşe, qazaqstandıq tarap "SK-Farmaciyadan" uaqıtında zattardı ala almadı. Bwl azamattıq-qwqıqtıq qatınas, mwnday närseler bolıp twradı, - dedi Birtanov.

Onıñ aytuınşa, "SK-Farmaciya" Qazaqstanğa tezirek tauardı jetkizuge tırısqan.

"Bwl jerde Berik Şäriptiñ jeke kinäsi joq. Kerisinşe, ol qorğanış kiimderdi mümkindiginşe jıldam jetkizuge tırıstı... Ol nendey qılmıs jasadı, bilmeymin. Onı adal qızmetker dep sanaymın. Özge äriptester de sözimdi däleldey aladı. Meniñ tarabımnan oğan qısım jasalğan joq. Mağan jağu üşin bireuge qanday da bir basımdıq berdi degennen de eşqanday qisın körip twrğan joqpın. Mağan sol kezde, qazir de tenderden kimniñ wtqanı-wtatını bäribir" dedi bwrınğı ministr.

QazTAG-tıñ jazuınşa, Birtanov kompaniyanıñ bwrınğı basşısı tötenşe jağday kezinde därihanalarda däri-därmektiñ tapşı bolğanına da kinäli emes degen. Bwrınğı ministrdiñ pikirinşe, "SK-Farmaciyanıñ" maqsatı men mindeti auruhanalarğa däri-därmek satıp alu. Al därihanalardağı därilerge ol jauap bermeydi.

"Bwl jeke narıq. Densaulıq saqtau ministrligi onı eşqaşan baqılağan emes" dedi ol.

Berik Şäriptiñ is boyınşa alğaşqı sot tıñdauı 21 säuirde bastaldı. Ol kezde qorğau tarabı Berik Şäripti üyqamaqqa jiberudi swrağan, biraq ötinişi qanağattandırılmağan.

Sottan habar taratqan key aqparat agenttikterdiñ mälimetinşe, Berik Şärip "qızmettik ökiletin asıra paydalanu" babı boyınşa ayıptı moyındamağan, al "zañsız qaru-jaraq saqtau, alu, tasımaldau" babı boyınşa ayıppen kelisedi.

"The Qazaq Times"