ەلجان ءبىرتانوۆ. فوتو: اشىق دەرەككوز

قازاقستاننىڭ ەكس-دەنساۋلىق ساقتاۋ ءمينيسترى ەلجان ءبىرتانوۆ پەن ونىڭ ورىنباسارى ولجاس ابىشەۆ مەملەكەتكە 1,5 ملرد تەڭگە كولەمىندە شىعىن كەلتىردى دەگەن كۇدىككە ءىلىندى بۇل تۋرالى Vlast.kz سايتى جازدى.

سايتتىڭ حابارلاۋىنشا، 5 مامىردا تەرگەۋ سوتىندا پروكۋرور تولەگەن جاراسباەۆ ءبىرتانوۆتىڭ ۇيقاماق مەرزىمىن تاعى ءبىر ايعا سوزۋدى سۇراعان. پروكۋرور بۇرىنعى ءمينيستردىڭ شەكتەۋلەرگە قاراماستان حات جولداپ، وتباسى، ادۆوكاتىنان باسقا ادامدارمەن ارالاسىپ، "ەرەجە بۇزعانىن" اتاپ وتكەن. ايىپتاۋ تارابى وعان مەديتسينالىق مەكەمەدەن باسقا جاققا بارۋعا تولىق تىيىم سالۋدى، تەلەفون ارقىلى كەلىسسوز جۇرگىزبەۋدى، حات جولداماۋدى، وتباسى، ادۆوكاتىنان باسقا ەشكىممەن سويلەسپەۋدى مىندەتتەۋىن سۇراعان. ۇيقاماق مەرزىمىن 14 ماۋسىمعا دەيىن سوزۋدى وتىنگەن. سوت 6 مامىردا جالعاسادى.

تەرگەۋ ورگاندارىنىڭ بولجامىنشا، 2015 جىلى دەنساۋلىق ساقتاۋ مينيسترلىگى حورۆاتتىڭ Ericsson Nikola Tesla كومپانياسىمەن قۇنى 17,8 ملن دوللار بولاتىن "دەنساۋلىق ساقتاۋ سالاسىنداعى اقپاراتتىق پلاتفورمانى" ەلگە اكەلۋ بويىنشا كەلىسىم جاساسقان. بىرىڭعاي دەرەك قورى ساقتالادى دەلىنگەن پلاتفورما دەنساۋلىق ساقتاۋ سالاسىنداعى اقپاراتتىق جۇيەنى بىرىكتىرۋى ءتيىس بولعان.

"دەنساۋلىق ساقتاۋ ءمينيسترى ەلجان ءبىرتانوۆ پلاتفورمانىڭ جۇمىس ىستەمەيتىنىن بىلە تۇرىپ، [بۇرىنعى ۆيتسە-مينيستر] ولجاس ابىشەۆپەن كەلىسىپ، 2018 جىلى 17 ەمدەۋ مەكەمەسىندە پلاتفورمانى پيلوتتىق تۇرعىدا پايدالانۋ تۋرالى بۇيرىققا قول قويعان". پروكۋرور ءىس جۇزىندە پيلوتتىق پايدالانۋ جۇزەگە اسپادى دەپ سانايدى.

ايىپتاۋ تارابىنىڭ ايتۋىنشا، بۇرىنعى مينيستر مەملەكەت باسشىلىعىنا پلاتفورمانىڭ 17 مەكەمەدە سىنالعانى جايلى اقپارات بەرىپ، جاڭىلدىرعان. ال ۆيتسە-مينيستر ابىشەۆ "مەملەكەتتىك ساتىپ الۋ تۋرالى" زاڭعا جۇگىنبەي 2018 جىلى قازان ايىندا Ericsson Nikola Tesla كومپانياسىمەن 9 ملن دوللارعا كەلىسىم جاساسىپ، جۇمىس اتقارىلماسا دا جەلتوقسان ايىندا اكتىگە قول قويىپ، Ericsson Nikola Tesla كومپانياسىنا 6,8 ملن دوللاردى اۋدارعان. بىلتىر اقپان ايىندا ءبىرتانوۆ پلاتفورمانى ونەركاسىپتىك پايدالانۋعا ەنگىزۋ تۋرالى بۇيرىققا قول قويعان. بىراق پلاتفورما ءالى ىسكە قوسىلماعان دەيدى ايىپتاۋ تارابى. پروكۋرور وسىلايشا ءبىرتانوۆ، ابىشەۆ جانە وزگە تۇلعالاردىڭ ارەكەتىنىڭ سالدارىنان مەملەكەتكە 1,5 ملرد تەڭگە كولەمىندە شىعىن كەلدى دەپ سانايدى.

بۇعان دەيىن ءبىرتانوۆتىڭ ادۆوكاتى دميتري كۋرياچەنكو تەرگەۋ ورگاندارىندا بۇرىنعى ءمينيستردىڭ كىناسىن دالەلدەيتىن بۇلتارتپاس ايعاقتار جوعىن العا تارتىپ، "تەرگەۋ ورگاندارىنىڭ ارەكەتى ءىستى وبەكتيۆتى جۇرگىزۋگە ەمەس، ءبىرتانوۆتى قۋدالاۋعا باعىتتالىپ وتىر" دەپ مالىمدەگەن ەدى. ادۆوكات داۋلى پلاتفورمانىڭ جۇمىس ىستەپ تۇرعانىن، ىسكە پلاتفورمانى جاساعان Ericsson Nikola Tesla وكىلدەرى، نە مەردىگەر، نە پلاتفورمانى قابىلداعان كوميسسيا مۇشەلەرى تارتىلماعانىنا نازار اۋدارعان. ادۆوكات پلاتفورمانى قابىلداۋ-پايدالانۋ اكتىسىنە قول قويماعان ءبىرتانوۆتىڭ زاڭسىز قۋدالانىپ جاتقانىن، ونىڭ ۇيقاماقتا زاڭسىز وتىرعانىن دا ايتقان.

2017 جىلدىڭ قاڭتارىنان باستاپ دەنساۋلىق ساقتاۋ ءمينيسترى قىزمەتىن اتقارعان 49 جاستاعى ەلجان ءبىرتانوۆ بىلتىر ماۋسىمدا كوروناۆيرۋسپەن اۋىرعاندار سانى كۇرت كوبەيىپ، اۋرۋحانالاردا ورىن جەتپەي جاتقان تۇستا قىزمەتىنەن بوستىلعان. ال قاراشا ايىندا ول «ءىرى كولەمدە قارجى جىمقىرۋ» كۇدىگى بويىنشا ۇستالدى. ول سول كەزدەن بەرى ۇيقاماقتا وتىر. 26 ناۋرىزدا سوت ونىڭ قاماۋ مەرزىمىن 30 ساۋىرگە دەيىن ۇزارتقان.

"The Qazaq Times"