QazVac vakcinasınıñalğaşqı partiyasınıñ ülgileri. Foto: primeminister.kz

26 säuir densaulıq saqtau ministri Aleksey Coy astanadağı №9 emhanada Qazaqstanda jasalğan otandıq QazVac ekpesiniñ alğaşqı dozasın aldı. Prezident Toqaev rayınan qaytıp, esesine ministr Coydıñ jambıldıq vakcinanı saldırğan sätin «Habar» arnası tikeley efirde körsetti.

Ğılımi atauı QazCovid-In qazaqstandıq inaktivti vakcinanıñ klinikalıq sınağınıñ üşinşi kezeñi 9 şilde ayaqtaladı. Dese de Ükimet sınaqtıñ jartılay kezeñinde aralıq nätije negizinde Resey ülgisinde uaqıtşa tirkeuge rwqsat etip, elge egudi bastap ketti. Jalpı üş kezeñge 3244 adam (İ kezei – 44, İİ kezeñ – 200, İİİ kezeñ 3 mıñ) erikti retinde qatısqan.

Pandemiya twsındağı Qazaqstannıñ ekinşi densaulıq saqtau ministri Aleksey Coy «QazVac otandıq ekpesin alğaşqılardıñ qatarında alıp jatqan säti». Foto: QR DSM

Alayda halıqaralıq täjiribede Pfizer, Moderna, Sputnik V, Johnson & Johnson siyaqtı tanımal vakcinalardıñ üşinşi kezeñdegi klinikalıq sınağına keminde 30 mıñnan asa adam qatısqan.

Vakcinanı Jambıl oblısındağı Bilim jäne ğılım ministrligine qarastı Biologiyalıq qauipsizdik ğılımi-zertteu institutı jasap şığardı. Resmi mälimetke qarağanda, kölemi 50 mıñ doza bolatın alğaşqı tranş aymaqtarğa jiberilgen jäne büginnen bastap egile bastadı.

QazVac vakcinasınıñ keñ kölemde qoldanılıp jatqan Sputnik V ekpesinen ayırmaşılığınıñ biri – är flakonda bir ğana doza boladı. Demek ekpe aluğa kelgender GamKovidVak siyaqtı bes adamnıñ jinaluın kütpeydi.

Bwğan deyin qañtar ayınıñ ayağında prezident Toqaev QazVac «sätti şıqsa, salğızuğa» uäde etken rayınan qaytıp, säir ayınıñ basında, vakcina tapşı kezde reseylik Sputnik V ekpesin alğanı habarlandı. Qoğamda qızu talqı tudırğan soñ Aqorda prezidenttiñ otandıq vakcinanı aluğa nietti ekenin habarlağan. Biraq naqtı qaşan saldırarı belgisiz. Medicina mamandarı bir ekpeniñ immundıq jauabı bir jılğa jetkilikti ekenin jäne eki vakcinanı qatar aluğa bolmaytının eskertedi.

Ekpeni jasap şığaruğa jauaptı ğalımdar inaktivti vakcinanıñ quatı zor degenimen, biraq halıqaralıq ğılımi basılımdarğa tereñ zertteu materialdarı jariyalana qoymağan. Bwlsız köptegen ğalımdar men sarapşılar naqtı baylam aytu qiın deydi.

Qazirgi tañda Qazaqstanda 893 mıñ adam ekpe alğan. Josparlı meje boyınşa, Ükimet säuir ayınıñ soñına deyin 2 million adam egiledi degen edi.

Elde auırğandar sanı 361 mıñnan astı. Onıñ 99 mıñı osı köktemde  tirkeldi. Qazaqstan virus taraluı boyınşa älemde Worldometers derekqorı, Djons Hopkins universiteti jäne DDSW tizimindegi 221 el men aymaqtıñ arasında 48-orında twr.

«The Qazaq Times»