Bıltır jemqorlıq küdigine ilinip, üyqamaqta otırğan Qazaqstannıñ eks-densaulıq saqtau ministri Eljan Birtanovtı wstau merzimi 14 mamırğa deyin wzartıldı. Bwl aqparattı onıñ advokatı Dmitriy Kuryaçenko habarladı.

Advokat sözinşe, eks-ministrdiñ üy qamaqtağı şekteuleri jeñildetilgen.

"Astana tergeu sotınıñ şeşimine say, üyqamaqtağı şekteuler jeñildetildi, oğan qoğamğa jäne otbasına paydalı bolu üşin 8:00-den 19:00-ge deyin üyden şığuğa mümkindik berdi. Alayda qalğan şekteuler sol küyi qaldı. Qorğauşılar onı üyqamaqtan tolığımen bosatu kerek dep sanaydı. Sonday-aq, sot küdiktiñ negizdiligin teksergen joq, al zañ boyınşa qamau merzimi wzarılğan sayın tekseruge mindetti" dedi Kuryaçenko.

Advokattıñ aytuınşa, Birtanov "Densaulıq saqtau ministrliginiñ platforması istemeydi, al oğan bölingen qarajat jımqırıldı" degen küdikke ilinip otır.

"Alayda bwl küdiktiñ negizsiz ekenin Qazaqstannıñ ärbir azamatı eGov portalı arqılı öziniñ densaulıq pasportına kirip,  däleldey aladı. Qılmıstıq is bastalğannan beri bir jılğa juıq uaqıt ötti. Tergeu bir jılğa juıq uaqıt boyı Densaulıq saqtau ministrliginiñ platforması jwmıs istep jatır ma, joq pa, sonı anıqtay almadı" dedi eks-ministrdiñ advokatı.

Onıñ sözinşe, Birtanov özin "negizsiz qudalap jatır dep sanaydı jäne üyqamaqta otıruı da zañsız dep esepteydi".

2017 jıldıñ qañtarınan bastap densaulıq saqtau ministri qızmetin atqarğan 49 jastağı Eljan Birtanov bıltır mausımda koronaviruspen auırğandar sanı kürt köbeyip, auruhanalarda orın jetpey jatqan twsta qızmetinen bostılğan. Al qaraşa ayında ol iri kölemde qarjı jımqıru küdigi boyınşa wstaldı. Ol sol kezden beri üyqamaqta otır. 26 naurızda sot onıñ qamau merzimin 30 säuirge deyin wzartqan.

"The Qazaq Times"