بىلتىر جەمقورلىق كۇدىگىنە ءىلىنىپ، ۇيقاماقتا وتىرعان قازاقستاننىڭ ەكس-دەنساۋلىق ساقتاۋ ءمينيسترى ەلجان ءبىرتانوۆتى ۇستاۋ مەرزىمى 14 مامىرعا دەيىن ۇزارتىلدى. بۇل اقپاراتتى ونىڭ ادۆوكاتى دميتري كۋرياچەنكو حابارلادى.

ادۆوكات سوزىنشە، ەكس-ءمينيستردىڭ ءۇي قاماقتاعى شەكتەۋلەرى جەڭىلدەتىلگەن.

"استانا تەرگەۋ سوتىنىڭ شەشىمىنە ساي، ۇيقاماقتاعى شەكتەۋلەر جەڭىلدەتىلدى، وعان قوعامعا جانە وتباسىنا پايدالى بولۋ ءۇشىن 8:00-دەن 19:00-گە دەيىن ۇيدەن شىعۋعا مۇمكىندىك بەردى. الايدا قالعان شەكتەۋلەر سول كۇيى قالدى. قورعاۋشىلار ونى ۇيقاماقتان تولىعىمەن بوساتۋ كەرەك دەپ سانايدى. سونداي-اق، سوت كۇدىكتىڭ نەگىزدىلىگىن تەكسەرگەن جوق، ال زاڭ بويىنشا قاماۋ مەرزىمى ۇزارىلعان سايىن تەكسەرۋگە مىندەتتى" دەدى كۋرياچەنكو.

ادۆوكاتتىڭ ايتۋىنشا، ءبىرتانوۆ "دەنساۋلىق ساقتاۋ مينيسترلىگىنىڭ پلاتفورماسى ىستەمەيدى، ال وعان بولىنگەن قاراجات جىمقىرىلدى" دەگەن كۇدىككە ءىلىنىپ وتىر.

"الايدا بۇل كۇدىكتىڭ نەگىزسىز ەكەنىن قازاقستاننىڭ ءاربىر ازاماتى eGov پورتالى ارقىلى ءوزىنىڭ دەنساۋلىق پاسپورتىنا كىرىپ،  دالەلدەي الادى. قىلمىستىق ءىس باستالعاننان بەرى ءبىر جىلعا جۋىق ۋاقىت ءوتتى. تەرگەۋ ءبىر جىلعا جۋىق ۋاقىت بويى دەنساۋلىق ساقتاۋ مينيسترلىگىنىڭ پلاتفورماسى جۇمىس ىستەپ جاتىر ما، جوق پا، سونى انىقتاي المادى" دەدى ەكس-ءمينيستردىڭ ادۆوكاتى.

ونىڭ سوزىنشە، ءبىرتانوۆ ءوزىن "نەگىزسىز قۋدالاپ جاتىر دەپ سانايدى جانە ۇيقاماقتا وتىرۋى دا زاڭسىز دەپ ەسەپتەيدى".

2017 جىلدىڭ قاڭتارىنان باستاپ دەنساۋلىق ساقتاۋ ءمينيسترى قىزمەتىن اتقارعان 49 جاستاعى ەلجان ءبىرتانوۆ بىلتىر ماۋسىمدا كوروناۆيرۋسپەن اۋىرعاندار سانى كۇرت كوبەيىپ، اۋرۋحانالاردا ورىن جەتپەي جاتقان تۇستا قىزمەتىنەن بوستىلعان. ال قاراشا ايىندا ول ءىرى كولەمدە قارجى جىمقىرۋ كۇدىگى بويىنشا ۇستالدى. ول سول كەزدەن بەرى ۇيقاماقتا وتىر. 26 ناۋرىزدا سوت ونىڭ قاماۋ مەرزىمىن 30 ساۋىرگە دەيىن ۇزارتقان.

"The Qazaq Times"