Särsenbide, 21 säuir Qazaqstannıñ bas prokurorı Ğizat Nwrdäuletov prezident Qasım-Jomart Toqaevtıñ qabıldauına kirip, prokuratura salasındağı jağday boyınşa esep berdi. Onıñ pikirinşe, elde qwqıq qorğau bağıtı jaqsarğan.

Aqorda habarlamasında «Ğizat Nwrdäuletovtiñ aytuınşa, sotqa deyingi tergeu organdarı prokurorlarmen negizgi şeşimderin kelisudiñ arqasında azamattardıñ konstituciyalıq qwqıqtarın bwzu 33%-ğa azayğan» delingen.

Bas prokuror «käsipkerlerdi memlekettik organdardıñ zañsız äreketterinen qorğau» turalı da söz etken. Onıñ aytuınşa, «jıl basınan beri 22 mıñ käsipkerdiñ qwqığı qorğalğan, 357 zañsız tekseru men memlekettik organdardıñ 56 aktisi joyılğan».

Qazaqstanda sot jäne prokuratura organdarınıñ «zañsızdığına», konstituciyalıq qwqıqtarı qoralmaq tügili saqtalmaytınına şağımdanatın azamattar az emes. Olar auıq-auıq astanağa deyin narazılıq bildiruge baradı.

Juırda naurız ayınıñ soñında AQŞ-tıñ memlekettik hatşısı Entoni Blinken resmi bayandamasında Qazaqstandı biligi oppoziciya men azamattıq belsendilerdi qudalap, söz bostandığın şekteytin memleket retinde, sonday-aq  Uganda, Venesuela, M'yanma elderiniñ qatarında atağan. Bayden basqaruındağı AQŞ äkimşiligi adam qwqıqtarı öreskel bwzılatın memleketterge jii sankciya engizip, jauapqa tartatının eskertken. Bwğan deyin aqpan ayında Europarlament te Qazaqstandağı adam qwqıqtarınıñ ayaqastı bolğanı turalı qattı sınap, arnayı qarar qabıldağan edi. Batıs deputattarı adam haqın bwzuğa qatısı bar şeneunikterge jekelegen sankciya engizu jöninde bastama kötergen.

Halıqaralıq The World Justice Project  wyımınıñ zañ üstemdigi reytingisinde Qazaqstan 113 eldiñ işinde 62-orında twr. Körsetkişter boyınşa, bıltır eldegi ahual aşıq ükimet jäne negizgi qwqıqtar jağınan naşarlağan.

"The Qazaq Times"