باس پروكۋراتۋرا: حالىقارالىق ۇيىمدار ءجيى سىنايتىن ادام قۇقىعى جاعدايى جاقسارا باستادى

سارسەنبىدە، 21 ءساۋىر قازاقستاننىڭ باس پروكۋرورى عيزات نۇرداۋلەتوۆ پرەزيدەنت قاسىم-جومارت توقاەۆتىڭ قابىلداۋىنا كىرىپ، پروكۋراتۋرا سالاسىنداعى جاعداي بويىنشا ەسەپ بەردى. ونىڭ پىكىرىنشە، ەلدە قۇقىق قورعاۋ باعىتى جاقسارعان.

اقوردا حابارلاماسىندا «عيزات نۇرداۋلەتوۆتىڭ ايتۋىنشا، سوتقا دەيىنگى تەرگەۋ ورگاندارى پروكۋرورلارمەن نەگىزگى شەشىمدەرىن كەلىسۋدىڭ ارقاسىندا ازاماتتاردىڭ كونستيتۋتسيالىق قۇقىقتارىن بۇزۋ 33%-عا ازايعان» دەلىنگەن.

باس پروكۋرور «كاسىپكەرلەردى مەملەكەتتىك ورگانداردىڭ زاڭسىز ارەكەتتەرىنەن قورعاۋ» تۋرالى دا ءسوز ەتكەن. ونىڭ ايتۋىنشا، «جىل باسىنان بەرى 22 مىڭ كاسىپكەردىڭ قۇقىعى قورعالعان، 357 زاڭسىز تەكسەرۋ مەن مەملەكەتتىك ورگانداردىڭ 56 اكتىسى جويىلعان».

قازاقستاندا سوت جانە پروكۋراتۋرا ورگاندارىنىڭ «زاڭسىزدىعىنا»، كونستيتۋتسيالىق قۇقىقتارى قورالماق تۇگىلى ساقتالمايتىنىنا شاعىمداناتىن ازاماتتار از ەمەس. ولار اۋىق-اۋىق استاناعا دەيىن نارازىلىق بىلدىرۋگە بارادى.

جۋىردا ناۋرىز ايىنىڭ سوڭىندا اقش-تىڭ مەملەكەتتىك حاتشىسى ەنتوني بلينكەن رەسمي بايانداماسىندا قازاقستاندى بيلىگى وپپوزيتسيا مەن ازاماتتىق بەلسەندىلەردى قۋدالاپ، ءسوز بوستاندىعىن شەكتەيتىن مەملەكەت رەتىندە، سونداي-اق  ۋگاندا، ۆەنەسۋەلا، ميانما ەلدەرىنىڭ قاتارىندا اتاعان. بايدەن باسقارۋىنداعى اقش اكىمشىلىگى ادام قۇقىقتارى ورەسكەل بۇزىلاتىن مەملەكەتتەرگە ءجيى سانكتسيا ەنگىزىپ، جاۋاپقا تارتاتىنىن ەسكەرتكەن. بۇعان دەيىن اقپان ايىندا ەۋروپارلامەنت تە قازاقستانداعى ادام قۇقىقتارىنىڭ اياقاستى بولعانى تۋرالى قاتتى سىناپ، ارنايى قارار قابىلداعان ەدى. باتىس دەپۋتاتتارى ادام حاقىن بۇزۋعا قاتىسى بار شەنەۋنىكتەرگە جەكەلەگەن سانكتسيا ەنگىزۋ جونىندە باستاما كوتەرگەن.

حالىقارالىق The World Justice Project  ۇيىمىنىڭ زاڭ ۇستەمدىگى رەيتينگىسىندە قازاقستان 113 ەلدىڭ ىشىندە 62-ورىندا تۇر. كورسەتكىشتەر بويىنشا، بىلتىر ەلدەگى احۋال اشىق ۇكىمەت جانە نەگىزگى قۇقىقتار جاعىنان ناشارلاعان.

"The Qazaq Times"