Jedel järdem brigadasınıñ köligi. Almatı qalası. Säuir 2021 jıl. Foto: QT / Kültegin Aspanwlı

Köktemgi elu künde Qazaqstanda 79 mıñğa tarta sırqat tirkelip ülgerdi. Respublikanıñ üşinşi tolqında qızıl aymaqqa ötkenine 20 kün boldı. Kündelikti anıqtalıp jatqan nauqastar sanı eki mıñnan, al ölim jağdayı  20-dan azayar emes. Bwl pandemiya kezindegi eñ auır körsetkiş.

Densaulıq saqtau ministrliginiñ resmi mälimetinşe, elde 18 säuir koronavirus jwqqan 2719 adam, al 17-si küni koronavirus pnevmoniyasına şaldıqqan 35 adam tirkeldi. Qazir elde 38 mıñnan asa adam (U07.1 nemese KVI+ boyınşa 38 218, U07.2 nemese KVI- boyınşa 402) auırıp jatır.

#COVID PTR testi arqılı koronavirus jwqqanı rastalğan nauqastardıñ basım böligi ädettegidey Almatı qalası (665) men astanada (436) tirkeldi. Bwdan özge tört birdey öñirde: Almatı (251), Qarağandı (220), Aqtöbe (206) jäne Batıs Qazaqstan oblısında (205) auruşañdıq qarqın aldı. Odan keyingi qatarda eñ köbi – Şımkent (114), Aqmola (110), Atırau (98) oblısında. Ötken täulikte aurudan ayıqqan 1773 adam üyine jiberilgen. Bwdan özge senbi jiını 22 adam qaytıs bolğan.

#COVID_pnevmoniyası 17 säuir aqparatı bir täulikke keşigip beriletin koronavirus pnevmoniyasına şaldıqqan 35 nauqas esepke alındı. Vedomstvo dereginşe, Jambıl (9) oblısı, astana (8) jäne Almatı (5) oblıstarında köbirek tirkelgen. Sonımen qosa, 87 adam ayığıp şıqqan, ökiniştisi bir adam köz jwmğan.

#Jalpı  DenMin-niñ resmi mälimetinşe, emdelip jatqan 38 620 nauqastıñ 14 mıñı auruhanada, 24 mıñı ambulatorlıq baqılauda. Ahualı naşar 674 nauqastıñ jağdayı qiın, ondağı 176 adamnıñ häli öte auır. Bwdan özge 99 sırqat ökpeni jasandı jeldetu apparatımen tınıstap jatır.

Osılayşa äzirge virustıñ taralu qateri jağınan Qostanay men Türkistan oblıstarı «jasıl aymaqta». ŞQO, Qızılorda jäne Pavlodar, Mañğıstau, Aqmola, Almatı, Jambıl, Mañğıstau, Soltüstik Qazaqstan oblıstarı «sarı», al Atırau, BQO, Aqtöbe, Qarağandı oblıstarı, Almatı, Şımkent qalaları men astana «qızıl aymaqta» twr.

Ükimet müşeleriniñ mälimetinşe, genomdıq zertteu nätijesinde eldiñ basım böliginen virustıñ braziliyalıq, britandıq jäne oñtüstikafrikalıq ştamdarı anıqtalğan.

Elde qañtar ayınıñ ekinşi jäne aqpan ayınıñ alğaşqı jartısında nauqastar qatarı kürt köbeygen. Aqpan ayınıñ ekinşi jartısında birşama kemigen edi, dese de naurızda qayta arttı. Qazir täuligine keminde 2,5 mıñ sırqat jäne 20 şaqtı ölim jağdayı tirkelip jatır. Säuir ayınıñ eki jarım aptasında tabılğan keyster sanı – 44 mıñ sırqat jäne 391 ölim jağdayı. Bwl twtas naurız ayınan äldeqayda artıq. Jalpı köktem tuğalı 79 mıñğa juıq (KVI+ 76 mıñ, KVI- 2,5 mıñ) nauqas anıqtaldı, 757 adam (KVI+ 634, KVI- 123) ömirden qayttı.

Bıltır 13 naurızdan beri COVID-19 infekciyasın jwqtırğandar qatarı 290 mıñğa, 1 tamızdan bılayğı koronavirus pnevmoniyası 52 mıñğa jetken. DDSW derekqorı men Wlttıq statistikada Qazaqstanda auırğandar sanı 341,5 mıñnan asqan. Degenmen Ükimet koronavirus pen onıñ pnevmoniyasın eki bölek esepteydi.

Pandemiya bastalğalı jalpı virus jwqqandardıñ 5,7 mıñı (KVI+ / U07.1 – 3406, KVI- / U07.2 – 751, ilespe aurulardan – 1619) qaytıs bolğan. Alayda Qazaqstan biligi boyınan koronavirus tabılsa da, basqa aurulardıñ sebebinen qaytıs boldı delingenderdi jalpı statistikağa engizbeydi. Bwğan qarsı sarapşılardıñ sözine qarağanda, koronavirustıñ janama äserinen qaytqandardıñ jartısınan astamınıñ sebebi qan aynalımı jüyesiniñ auruları bolğandıqtan, oğan infekciya dert qozdıruşı faktor retinde ölimge äkep soqtırğan. Eskerer jayt, ministrlik 2020 jılı KVI- statistikasın esepke almas bwrın jıldağıdan üş esege ösken pnevmoniyanıñ 256 mıñ jağdayınan (bıltırğı qañtar-şilde aralığındağı) koronavirustıq türin anıqtap-zertteuden bas tartqan. Mamandar osı keysterdi ob'ektivti türde zerdelegende şınayı esep qazirgiden äldeqayda köp bolar edi dep esepteydi. Demek joğarıdağı san da naqtı bolmauı mümkin.

Qazaqstan virus taraluı boyınşa älemde Worldometers derekqorı, Djons Hopkins universiteti jäne DDSW tizimindegi 221 el men aymaqtıñ arasında 49-orında twr.

Ükimettiñ soñğı deregine qarağanda, Qazaqstanda 695 mıñ adam koronavirusqa qarsı reseylik «Sputnik V» vakcinasınıñ alğaşqı dozasın alğan.

"The Qazaq Times"