جەدەل جاردەم بريگاداسىنىڭ كولىگى. الماتى قالاسى. ءساۋىر 2021 جىل. فوتو: QT / كۇلتەگىن اسپانۇلى

كوكتەمگى ەلۋ كۇندە قازاقستاندا 79 مىڭعا تارتا سىرقات تىركەلىپ ۇلگەردى. رەسپۋبليكانىڭ ءۇشىنشى تولقىندا قىزىل ايماققا وتكەنىنە 20 كۇن بولدى. كۇندەلىكتى انىقتالىپ جاتقان ناۋقاستار سانى ەكى مىڭنان، ال ءولىم جاعدايى  20-دان ازايار ەمەس. بۇل پاندەميا كەزىندەگى ەڭ اۋىر كورسەتكىش.

دەنساۋلىق ساقتاۋ مينيسترلىگىنىڭ رەسمي مالىمەتىنشە، ەلدە 18 ءساۋىر كوروناۆيرۋس جۇققان 2719 ادام، ال 17-ءسى كۇنى كوروناۆيرۋس پنەۆمونياسىنا شالدىققان 35 ادام تىركەلدى. قازىر ەلدە 38 مىڭنان اسا ادام (U07.1 نەمەسە كۆي+ بويىنشا 38 218, U07.2 نەمەسە كۆي- بويىنشا 402) اۋىرىپ جاتىر.

#COVID پتر تەستى ارقىلى كوروناۆيرۋس جۇققانى راستالعان ناۋقاستاردىڭ باسىم بولىگى ادەتتەگىدەي الماتى قالاسى (665) مەن استانادا (436) تىركەلدى. بۇدان وزگە ءتورت بىردەي وڭىردە: الماتى (251), قاراعاندى (220), اقتوبە (206) جانە باتىس قازاقستان وبلىسىندا (205) اۋرۋشاڭدىق قارقىن الدى. ودان كەيىنگى قاتاردا ەڭ كوبى – شىمكەنت (114), اقمولا (110), اتىراۋ (98) وبلىسىندا. وتكەن تاۋلىكتە اۋرۋدان ايىققان 1773 ادام ۇيىنە جىبەرىلگەن. بۇدان وزگە سەنبى جيىنى 22 ادام قايتىس بولعان.

#COVID_پنەۆمونياسى 17 ءساۋىر اقپاراتى ءبىر تاۋلىككە كەشىگىپ بەرىلەتىن كوروناۆيرۋس پنەۆمونياسىنا شالدىققان 35 ناۋقاس ەسەپكە الىندى. ۆەدومستۆو دەرەگىنشە، جامبىل (9) وبلىسى، استانا (8) جانە الماتى (5) وبلىستارىندا كوبىرەك تىركەلگەن. سونىمەن قوسا، 87 ادام ايىعىپ شىققان، وكىنىشتىسى ءبىر ادام كوز جۇمعان.

#جالپى  دەنمين-ءنىڭ رەسمي مالىمەتىنشە، ەمدەلىپ جاتقان 38 620 ناۋقاستىڭ 14 مىڭى اۋرۋحانادا، 24 مىڭى امبۋلاتورلىق باقىلاۋدا. احۋالى ناشار 674 ناۋقاستىڭ جاعدايى قيىن، ونداعى 176 ادامنىڭ ءحالى وتە اۋىر. بۇدان وزگە 99 سىرقات وكپەنى جاساندى جەلدەتۋ اپپاراتىمەن تىنىستاپ جاتىر.

وسىلايشا ازىرگە ۆيرۋستىڭ تارالۋ قاتەرى جاعىنان قوستاناي مەن تۇركىستان وبلىستارى «جاسىل ايماقتا». شقو، قىزىلوردا جانە پاۆلودار، ماڭعىستاۋ، اقمولا، الماتى، جامبىل، ماڭعىستاۋ، سولتۇستىك قازاقستان وبلىستارى «سارى»، ال اتىراۋ، بقو، اقتوبە، قاراعاندى وبلىستارى، الماتى، شىمكەنت قالالارى مەن استانا «قىزىل ايماقتا» تۇر.

ۇكىمەت مۇشەلەرىنىڭ مالىمەتىنشە، گەنومدىق زەرتتەۋ ناتيجەسىندە ەلدىڭ باسىم بولىگىنەن ۆيرۋستىڭ برازيليالىق، بريتاندىق جانە وڭتۇستىكافريكالىق شتامدارى انىقتالعان.

ەلدە قاڭتار ايىنىڭ ەكىنشى جانە اقپان ايىنىڭ العاشقى جارتىسىندا ناۋقاستار قاتارى كۇرت كوبەيگەن. اقپان ايىنىڭ ەكىنشى جارتىسىندا ءبىرشاما كەمىگەن ەدى، دەسە دە ناۋرىزدا قايتا ارتتى. قازىر تاۋلىگىنە كەمىندە 2,5 مىڭ سىرقات جانە 20 شاقتى ءولىم جاعدايى تىركەلىپ جاتىر. ءساۋىر ايىنىڭ ەكى جارىم اپتاسىندا تابىلعان كەيستەر سانى – 44 مىڭ سىرقات جانە 391 ءولىم جاعدايى. بۇل تۇتاس ناۋرىز ايىنان الدەقايدا ارتىق. جالپى كوكتەم تۋعالى 79 مىڭعا جۋىق (كۆي+ 76 مىڭ، كۆي- 2,5 مىڭ) ناۋقاس انىقتالدى، 757 ادام (كۆي+ 634, كۆي- 123) ومىردەن قايتتى.

بىلتىر 13 ناۋرىزدان بەرى COVID-19 ينفەكتسياسىن جۇقتىرعاندار قاتارى 290 مىڭعا، 1 تامىزدان بىلايعى كوروناۆيرۋس پنەۆمونياسى 52 مىڭعا جەتكەن. ددسۇ دەرەكقورى مەن ۇلتتىق ستاتيستيكادا قازاقستاندا اۋىرعاندار سانى 341,5 مىڭنان اسقان. دەگەنمەن ۇكىمەت كوروناۆيرۋس پەن ونىڭ پنەۆمونياسىن ەكى بولەك ەسەپتەيدى.

پاندەميا باستالعالى جالپى ۆيرۋس جۇققانداردىڭ 5,7 مىڭى (كۆي+ / U07.1 – 3406, كۆي- / U07.2 – 751, ىلەسپە اۋرۋلاردان – 1619) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەندەردى جالپى ستاتيستيكاعا ەنگىزبەيدى. بۇعان قارسى ساراپشىلاردىڭ سوزىنە قاراعاندا، كوروناۆيرۋستىڭ جاناما اسەرىنەن قايتقانداردىڭ جارتىسىنان استامىنىڭ سەبەبى قان اينالىمى جۇيەسىنىڭ اۋرۋلارى بولعاندىقتان، وعان ينفەكتسيا دەرت قوزدىرۋشى فاكتور رەتىندە ولىمگە اكەپ سوقتىرعان. ەسكەرەر جايت، مينيسترلىك 2020 جىلى كۆي- ستاتيستيكاسىن ەسەپكە الماس بۇرىن جىلداعىدان ءۇش ەسەگە وسكەن پنەۆمونيانىڭ 256 مىڭ جاعدايىنان (بىلتىرعى قاڭتار-شىلدە ارالىعىنداعى) كوروناۆيرۋستىق ءتۇرىن انىقتاپ-زەرتتەۋدەن باس تارتقان. ماماندار وسى كەيستەردى وبەكتيۆتى تۇردە زەردەلەگەندە شىنايى ەسەپ قازىرگىدەن الدەقايدا كوپ بولار ەدى دەپ ەسەپتەيدى. دەمەك جوعارىداعى سان دا ناقتى بولماۋى مۇمكىن.

قازاقستان ۆيرۋس تارالۋى بويىنشا الەمدە Worldometers دەرەكقورى، دجونس حوپكينس ۋنيۆەرسيتەتى جانە ددسۇ تىزىمىندەگى 221 ەل مەن ايماقتىڭ اراسىندا 49-ورىندا تۇر.

ۇكىمەتتىڭ سوڭعى دەرەگىنە قاراعاندا، قازاقستاندا 695 مىڭ ادام كوروناۆيرۋسقا قارسى رەسەيلىك «Sputnik V» ۆاكتسيناسىنىڭ العاشقى دوزاسىن العان.

"The Qazaq Times"