Mäjilis ğimaratı. Foto: 24.kz

14 säuirde mäjilis deputattarı şeteldikterge jer satuğa jäne jalğa beruge tıyım saludı qarastıratın "Qazaqstan Respublikasınıñ keybir zañnamalıq aktilerine jer qatınastarı mäseleleri boyınşa özgerister men tolıqtıru engizu turalı" dep atalğan qwjattı ekinşi oqılımda maqwldap, senatqa joldadı. 

Mäjilis maqwldap, senatqa joldanğan zañ jobası auıl şaruaşılığı jerlerin şeteldikterge jäne şeteldik kompaniyalarğa, şetel azamattarınıñ ülesi bar qazaqstandıq kompaniyalarğa, azamattığı joq adamdarğa, halıqaralıq ğılımi ortalıqtarğa jäne qandastarğa beruge tolıq tıyım saludı qarastıradı. Alayda 2016 jılğı 1 şildege deyin, yağni jerdi şeteldikterge jalğa beru jaylı bapqa moratoriy engizilgenge deyin jalğa berilip qoyğan auıl şaruaşılığı maqsatındağı jer uçaskeleri jalğa beru merzimi ayaqtalğanda  ğana memleket menşigine ötedi.

Auıl şaruaşılğı ministrliginiñ mälimetinşe, qazir 74,4 mıñ gektar jer 7 birikken käsiporınğa, 18,5 mıñ gektar jer eki şeteldik zañdı twlğağa moratoriy engizilgenge deyin jalğa berilgen. Olardıñ jalğa alu merzimi 2022 jäne 2025 jılı ayaqtaladı. The Qazaq Times redakciyası Qazaqstannıñ mıñdağan gektar jerin jalğa alıp otırğan 7 birlesken kisiporın men 2 zañdı twlğa jaylı tolıq aqparat swrap, auıl şaruaşılığı ministrligine 6 säuirde resmi swrau hat joldağan, biraq oğan äli jauap kelgen joq.

2016 jılı Qazaqstanda auıl şaruaşılığı jerin şeteldikterge satu jäne wzaq merzimge jalğa berudi qarastıratın daulı zañ jobasına halıq jappay narazı bolğan soñ sol kezdegi prezident Nwrswltan Nazarbaev zañ jobasına bes jılğa moratoriy jariyalağan. Onıñ merzimi biıl ayaqtaladı.

Qazaqstan territoriyasınıñ 37 payızın (100 million gektardan astam) auıl şaruaşılıq jerleri qwraydı. Bilik jerdiñ bos jatpau qajettigin, oğan investiciya tartu kerektigin jii aytadı. Biraq keybir belsendiler elde jemqorlıq örşip twrğan şaqta jer satu täjiribesin engizu qauipti dep sanaydı.

"The Qazaq Times"