Qazaqstan prezidenti Toqaev. Foto: Global Look Press

Qazaqstan prezidenti Qasım-Jomart Toqaev koronavirusqa qarsı vakcina salğızdı. Biraq äu basta uäde etilgendey otandıq ekpe emes.

Bwl jöninde onıñ baspasöz hatşısı Berik Uäli Facebook jelisindegi resmi paraqşasında jazdı.

«Bügin memleket basşısı Qarağandı farmacevtika zauıtı şığarğan «Sputnik-V» vakcinasın saldırdı. Prezidenttiñ vakcina saldırğannan keyingi hal-jağdayı jaqsı. Eşqanday janama äserler joq», – dep mälimdedi.

Baspasöz hatşısınıñ sözinşe, prezident koronavirustıñ jeñudiñ, qalıptı ömirge oraludıñ jalğız jolı «vakcina saldırıp, wjımdıq immunitet qalıptastıru» ekenine senimdi körinedi. Vakcinaciyadan keyin Toqaev «barşa halıqtı meylinşe tezirek» ekpe aluğa şaqırdı.

Aqorda hatşısı «Bwğan deyin Prezident Ükimetke jäne jergilikti atqaruşı organdarğa şetelden vakcina jetkizudi qamtamasız etudi jäne otandıq vakcina öndirudi jolğa qoyudı, sonday-aq, ekpe salu üderisin wyımdastırudı tapsırğan edi» degenimen, – qazirgi tañda elde eriktiler tügili äleumettik negizgi toptarğa jetkilikti vakcina tapşı.

Qazaqstanda jalpıhaıtıq vakcinaciya 1 aqpanda bastalğan edi. Eki ay degende halıqtıñ 1%-dan säl asa böligi, yağni 194 706 adam reseylik ekpeniñ alğaşqı dozasın saldırğan. Äzirge medicina qızmetkerleri, mwğalimder men küştik qwrılım ökilderine basımdıq berilip jatır.

Toqaev jıl basında, 25 qañtar küngi ükimettiñ keñeytilgen otırısında qazaqstandıq QazCovid-in vakcinası sınaqtan sätti ötse, «otandıq vakcinanı saldıramın» dep mälimdegen edi. Uäli prezident oyınan ne sebepti aynıp qalğanın aşıp jazbadı. Bwl qoğamnıñ otandıq ekpege kümändi küşeytui mümkin.

«Otandıq vakcinanıñ testileui oñ qorıtındı beredi dep ümittenemiz. Osı rette, özim otandıq ekpe ektiremin» degen.

Atauı QazVac retinde özgergen vakcina qazir sınaqtıñ üşinşi kezeñinen ötip jatır.

Şikizatı Reseyden jetkiziletin «Sputnik V» ekpesi Qarağandı farmacevtika keşeninde öndiriledi. Bwl kompaniyağa ielik etuşilerdiñ biri Qazaqstandı 30 jılday bilegen Nazarbaevtardıñ qwdası, belgili oligarh Qayrat Boranbaev. 15 mlrd teñge qarjı qarastırılğan öndiris ornı özin «biotehnologiyalıq preparattar öndirisine mamandandırılğan QR-dağı alğaşqı jäne äzirge jalğız farmacevtikalıq zauıt» dep sanaydı.

“The Qazaq Times”