قازاقستان پرەزيدەنتى توقاەۆ. فوتو: Global Look Press

قازاقستان پرەزيدەنتى قاسىم-جومارت توقاەۆ كوروناۆيرۋسقا قارسى ۆاكتسينا سالعىزدى. بىراق ءاۋ باستا ۋادە ەتىلگەندەي وتاندىق ەكپە ەمەس.

بۇل جونىندە ونىڭ ءباسپاسوز حاتشىسى بەرىك ءۋالي Facebook جەلىسىندەگى رەسمي پاراقشاسىندا جازدى.

«بۇگىن مەملەكەت باسشىسى قاراعاندى فارماتسەۆتيكا زاۋىتى شىعارعان «سپۋتنيك-V» ۆاكتسيناسىن سالدىردى. پرەزيدەنتتىڭ ۆاكتسينا سالدىرعاننان كەيىنگى حال-جاعدايى جاقسى. ەشقانداي جاناما اسەرلەر جوق»، – دەپ مالىمدەدى.

ءباسپاسوز حاتشىسىنىڭ سوزىنشە، پرەزيدەنت كوروناۆيرۋستىڭ جەڭۋدىڭ، قالىپتى ومىرگە ورالۋدىڭ جالعىز جولى «ۆاكتسينا سالدىرىپ، ۇجىمدىق يممۋنيتەت قالىپتاستىرۋ» ەكەنىنە سەنىمدى كورىنەدى. ۆاكتسيناتسيادان كەيىن توقاەۆ «بارشا حالىقتى مەيلىنشە تەزىرەك» ەكپە الۋعا شاقىردى.

اقوردا حاتشىسى «بۇعان دەيىن پرەزيدەنت ۇكىمەتكە جانە جەرگىلىكتى اتقارۋشى ورگاندارعا شەتەلدەن ۆاكتسينا جەتكىزۋدى قامتاماسىز ەتۋدى جانە وتاندىق ۆاكتسينا ءوندىرۋدى جولعا قويۋدى، سونداي-اق، ەكپە سالۋ ۇدەرىسىن ۇيىمداستىرۋدى تاپسىرعان ەدى» دەگەنىمەن، – قازىرگى تاڭدا ەلدە ەرىكتىلەر تۇگىلى الەۋمەتتىك نەگىزگى توپتارعا جەتكىلىكتى ۆاكتسينا تاپشى.

قازاقستاندا جالپىحاىتىق ۆاكتسيناتسيا 1 اقپاندا باستالعان ەدى. ەكى اي دەگەندە حالىقتىڭ 1%-دان ءسال اسا بولىگى، ياعني 194 706 ادام رەسەيلىك ەكپەنىڭ العاشقى دوزاسىن سالدىرعان. ازىرگە مەديتسينا قىزمەتكەرلەرى، مۇعالىمدەر مەن كۇشتىك قۇرىلىم وكىلدەرىنە باسىمدىق بەرىلىپ جاتىر.

توقاەۆ جىل باسىندا، 25 قاڭتار كۇنگى ۇكىمەتتىڭ كەڭەيتىلگەن وتىرىسىندا قازاقستاندىق QazCovid-in ۆاكتسيناسى سىناقتان ءساتتى وتسە، «وتاندىق ۆاكتسينانى سالدىرامىن» دەپ مالىمدەگەن ەدى. ءۋالي پرەزيدەنت ويىنان نە سەبەپتى اينىپ قالعانىن اشىپ جازبادى. بۇل قوعامنىڭ وتاندىق ەكپەگە كۇماندى كۇشەيتۋى مۇمكىن.

«وتاندىق ۆاكتسينانىڭ تەستىلەۋى وڭ قورىتىندى بەرەدى دەپ ۇمىتتەنەمىز. وسى رەتتە، ءوزىم وتاندىق ەكپە ەكتىرەمىن» دەگەن.

اتاۋى QazVac رەتىندە وزگەرگەن ۆاكتسينا قازىر سىناقتىڭ ءۇشىنشى كەزەڭىنەن ءوتىپ جاتىر.

شيكىزاتى رەسەيدەن جەتكىزىلەتىن «سپۋتنيك V» ەكپەسى قاراعاندى فارماتسەۆتيكا كەشەنىندە وندىرىلەدى. بۇل كومپانياعا يەلىك ەتۋشىلەردىڭ ءبىرى قازاقستاندى 30 جىلداي بيلەگەن نازارباەۆتاردىڭ قۇداسى، بەلگىلى وليگارح قايرات بورانباەۆ. 15 ملرد تەڭگە قارجى قاراستىرىلعان ءوندىرىس ورنى ءوزىن «بيوتەحنولوگيالىق پرەپاراتتار وندىرىسىنە مامانداندىرىلعان قر-داعى العاشقى جانە ازىرگە جالعىز فارماتسەۆتيكالىق زاۋىت» دەپ سانايدى.

“The Qazaq Times”