Demalıs küngi Almatı qalasındağı köşelerdiñ biri. Naurız 2021 jıl. Almatı qalası. Foto: QT / Kültegin Aspanwlı

Bügin densaulıq saqtau ministri Aleksey Coy OKQ-da ötken brifingte Qazaqstannıñ 10 oblısı men respublikalıq mañızı bar 3 qalasında şeteldik ştam ülgileri anıqtalğanın mälimdedi.

Ministrdiñ aytuınşa, elde epidemiologiyalıq jağday naşarladı.

«Keyingi 2 aptada Almatı, Şımkent qalaları men astanada, Aqtöbe, Almatı oblıstarında nauqas sanı artıp, virus  jwqtırğandar 1,5 ese östi (11 300-den 17 633 jağdayğa deyin). Jalpı nauqastıñ 56% Almatı qalasınan, onda  aqpan ayında täuligine 100, naurızda täuligine 500 jağday tirkeldi. Elordada aqpanda täuligine 100, osı ayda täuligine 350 jağdayğa jetti», – deydi ol.

Aleksey Coy naurız ayınan bastap halıqtı testileu täuligine 49 mıñ zertteuge deyin artqanın, aqpanda täuligine 38 mıñ zertteuge deyin jürgizilgenin habarladı. Onıñ sözinşe, ministrlik DDSW-men birlesip Covid-19 ştamdarın anıqtaytın ekspress PTR-skriningtiñ jaña ädisin engizgen.

«Wlttıq qoğamdıq densaulıq saqtau ortalığı filialınıñ referens-zerthanası eldiñ barlıq aymağınan PTR arqılı rastalğan taldau ülgilerin jinaqtap, zerdeleu jwmısın jürgizdi. Zertteu qorıtındısı boyınşa, ŞQO, BQO, Qostanay jäne Pavlodar oblısınan özge öñirlerde britandıq, oñtüstikafrikalıq, braziliyalıq ştamğa tän ıqtimal mutaciya anıqtaldı»,  – dep mälimdedi ministr.

Coy oqığan bayandama deregine qarağanda, PTR testi arqılı rastalğan 265 sınama tolıqtay genomdıq sekvenirlenuden ötken. 87 sınamadan üş jaña ştamnıñ mutaciyası tabıldı. Ondağı 12 ülgiden britandıq ştamğa tän mutaciya anıqtalğan: Almatı qalasında – 8, Aqtöbe oblısı – 3, astana – 1. Onıñ 5-eui BAÄ, 3-eui Mısır elderinen kelgen.

«B117 kodımen belgilenetin Britan nwsqasınıñ bastı qaupi – ölim qateri wlğayıñqı. Ağılşın ştamınıñ reproduktivti körsetkişi R=1,1-den 1,9-ğa deyin öskeni alañdatadı. Demek qarapayım türine qarağanda tez jwğadı. Al braziliyalıq ştamnıñ ölim qateri tömen, degenmen eldegi COVID-19 ştamına qarağanda jıldam taraladı», – delingen resmi mälimdemede.

DDSW 30 naurızdağı deregi boyınşa, britandıq ştamm SARS-CoV-2 125 elde, oñtüstikafrikalıq türi 75 elde, al braziliyalıq ülgisi 41 elde anıqtalğan. Koronavirustıñ jaña ştamdarı men alğaşqı ştamnıñ belgileri birdey – dene temperaturası köteriledi, jötel payda boladı jäne adam däm men iis sezu qabileti joğaladı.

«Genomdı sekvenirleu PTR testi siyaqtı kündelikti jäne twraqtı türde jürgizilmeydi. Ol ştamdardıñ mutaciyasın jäne kez kelgen özgeristiñ bar-joğın anıqtau üşin belgili bir kezeñde jüzege asırıladı. Naurızda britandıq, oñtüstikafrikalıq jäne braziliyalıq barlıq üş ştamğa tän mutaciya ıqtimaldığın zertteu ädistemesi qoldanıldı», – dedi Sanitarlıq-epidemiologiyalıq baqılau komitetiniñ törağası Ayjan Esmağambetova.

Qazirgi tañda elde jwqpalı aurularğa arnalğan ornınnıñ 33%-ında (8130) nauqastar jatır. Sonday-aq reanimaciya bölimindegi 20% (450) tösek-orında sırqattar emdelude.

“The Qazaq Times”