Ras Aitamyn zertteu tobı elde koronavirusqa şaldıqqan sırqattardıñ 13%-ı tiesili,  «qızıl aymaqqa» jii enetin Almatı qalasında indet örşigen twsta äkimdiktiñ BAQ betterindegi propaganda üşin byudjetten milliardtar jwmsağanın jazdı.

«Almatı äkimdigi koronavirus indeti örşigende «Habar» arnasındağı 3 minuttıq syujetke qanşa tölegenin bilesizder me?

Almatı äkimdiginiñ qoğamdıq damu basqarması bıltır tötenşe jağday bastala bergende «Habar» agenttigimen 22 mln teñgege kelisimşart jasastı. «Habar» osı aqşağa dayındağan syujetterdiñ deni Sağıntaevtıñ qızmetin nasihattaydı. Al mwnday bir syujettiñ qwnı şamamen million teñgeden asadı. Mısalı, «memleket basşısı joldauındağı aumaqtıq damu» turalı 3 minuttıq syujet (1,5 minutı orısşa, 1,5 minutı qazaqşa) üşin byudjetten 1 100 000 teñge tölengen. Al bıltır mausımda, Almatıda tösek-orın men däri-därmek jetpey jatqan uaqıtta şıqqan 12 minuttıq syujet 4 400 000 teñgege tüsken.

Sağıntaev basqaratın äkimdik özderine qarastı qalalıq «Almaty» telearnasına da aqşa ayamağan. Bıltır naurızda tötenşe jağday kezinde äkimdik telearnağa birden 2,3 milliard teñgeniñ tenderin bir-aq berdi. Tölem aktisine qarağanda, telearna ay sayın äkimdikten şamamen 240 mln teñge alıp otırdı.

Al biıl qañtarda äkimdik «Almaty» teleradiokompaniyası» AQ-men 437 907 000 teñgege kelisimşart jasastı. Bwl aqşağa qalalıq telearna Nazarbaev, Toqaev, parlament, ükimet, Almatı äkimdigi men mäslihat jwmısın jäne memlekettik bağdarlamalardı nasihattaydı.

«Almaty» arnası osı uaqıtqa deyin alğan tender boyınşa eki esep bergen. 245,6 mln teñgeniñ tenderi boyınşa bergen esepke qarağanda, bir syujetke telearna 729 845 teñge alğan.

Al jalpı, pandemiya bastalğalı beri «Almaty» telearnası äkimdikten 2,8 milliard teñgege tender alğan.

Äkimdik özine qarastı «Veçerniy Almatı» men «Almatı aqşamı» basılımdarına da qamqorlıq jasap, biıl qañtarda konkurs ötkizbey-aq osı basılımdarınıñ menşik iesi – Alatay Aqparat JŞS-men 112,7 million teñgege bir közden kelisimşart jasastı. Almatı äkimdigi özine qarastı basılımdarğa 112,7 million teñgeni nebäri eki ayğa bergen, kelisimşarttıñ merzimi 28 aqpanda ayaqtalğan.

Äkimdik bwl basılımdarğa prezident bastamaları men memlekettik bağdarlamalardıñ nasihatına, äkimdik pen mäslihat qaulıların köşirip basqanğa, tipti otandıq telearnalardıñ telebağdarlama kestesin jariyalağanğa aqşa tölegen.

Pandemiya bastalğalı Almatı äkimdigi «Almatı aqşamı» men «Veçerniy Almatı» basılımdarına 479,3 million teñge tender bergen.

Sonday-aq äkimdik «Qazaqstan» wlttıq arnasına konkurssız 23,9 mln teñgeniñ tenderin berdi. Wlttıq arna bwl aqşağa mausım ayında indet örşip, tösek orın men däri-därmek jetpey jatqan kezde Sağıntaev pen Almatı SES-iniñ viruspen qalay küresip jatqanın nasihattadı.

Almatı äkimdiginen tender alğan basqa BAQ:

Äkimdik pandemiya bastalğalı beri propagandağa 3,5 milliard teñge jwmsağan. Bwl aqşağa qanşa otbasığa baspana alıp beruge bolatının bilesiz be?

Almatıda jaña twrğın üydegi aumağı 52 şarşı metr eki bölmeli päter 25 mln, al 85 şarşı metr päter 45 mln twradı. Äkimdik propagandağa jwmsağan 3 580 394 435 teñgege 143 ekibölmeli nemese 79 üşbölmeli päter aluğa boladı. Büginde Almatıda päter kezeginde 25 mıñnan astam adam twr. Alayda äkimdik äleumettik mäselelerdi şeşu ornına milliardtağan aqşanı özine qarastı jäne ükimetti maqtaytın aqparat qwraldarına berip otır».

Resmi mälimet boyınşa, Almatı qalasında osı uaqıtqa deyin tirkelgen nauqastardıñ 21%-ı nemese 5/1 böligi tek naurız ayında tirkeldi. Koronavirus pen onıñ pnevmoniyalıq türin qosa eseptegende, bir jılda 38 530 nauqas esepke alınğan. Onıñ 8015-si osı ayda anıqtaldı. Qalanıñ «qızıl aymaqqa» kirgenine birşama uaqıt ötse de rekordıq statistika jalğasıp jatır.

Bwğan deyin zertteuşiler epidemiya ahualı uşıqqanına qaramastan astana äkimdigi 1,3 mlrd teñge qarjını propogandağa, yağni äkimdik sayasatın aqparattıq twrğıda nasihattauğa jwmsağanı turalı jariyalağan.

"The Qazaq Times"