Ahmetov Toqaevqa tanıstırğan Qarağaylı ıqşam audanı. Foto: Arnapress.kz

Semey qalasında jañadan qwrılğan Qarağaylı ıqşamaudandağı bastı dañğılğa eks-prezident Nwrswltan Nazarbaev esimi beriledi. Bwl turalı jwma küni Semey News jäne QazAqparat habarladı.

Jergilikti tilşilerdiñ mäimetinşe, 19 naurızda qala äkimi Nwrımbet Saqtağanovtıñ qatısuımen qalalıq mäslihattıñ kezekten tıs sessiyası ötip, «talqı» soñında Qarağaylı audanındağı jaña dañğılğa Nazarbaevtıñ esimin beruge birauızdan kelisken. Endi tüpkilikti şeşimdi Respublikalıq onomastikalıq komissiya şığaradı.

«Bolaşaqta mwz aydını keşenin, bilim jäne tehnologiyalar transferi mektebin aşamız dep josparlap otırmız. Seruendeu aumaqtarı, qoğamdıq tamaqtanu orındarı, balalarğa arnalğan oyın jäne sport alañdarı salınbaq. Bwdan bölek, köşelerdi jarıqtandıru, orındıqtar, qoqıs jäşikterin jäne şağın säulet nısandarın ornatu qarastırılğan», – dedi äkim.

Semey News-diñ jazuınşa, bwrın jaña dañğıldıñ atauı bolmağan. Köşeniñ eni – 40 metr, wzındığı – 950 metr, al ğimarattardı eseptegende wzındığı eki şaqırımnan asadı. Köşe Semey-Pavlodar avtojolınan bastaladı, onıñ boyında Nazarbaev ziyatkerlik mektebi, mädeni-sport keşeni, köp qabattı twrğın üyler, balabaqşa ornalasqan.

Osı aptada jaña ıqşam audandağı «Abay Arena» sport keşeni men köşege birinşi prezidenttiñ atın beru turalı bastama köterilip, qoğamda qızu talqılanğan. Äleumettik jeli qoldanuşılarınıñ köpşiligi «jağınu mäni basım» dep, qattı sınağan. Dese de keybir memlekettik qızmetkerler, tür-tüsi belgisiz akkaunt qoldanuşıları men ziyalılar mwnıñ «jeke basqa tabınu emestigin», kerisinşe «elenegen eñbek» dep sanaydı. Nazarbaevtıñ baspasöz hatşısı Aydos Ükibay 18 naurızda eks-prezident özi bwl wsınısqa qarsı ekenin aytqan.

Täuelsizdiktiñ keyingi jiırma jılında otandıq onomastika ayasında tildik nısandardıñ barlıq kategoriyasın qamtitın ondağan nwronimder jüyesi qalıptasıp ülgergen. Nazarbaev atındağı sıylıqtan bastap astana atauına deyinginiñ bärin tabuğa boladı: köşe, dañğıl, tau şıñı, esketkiş, mektep, universitet, sayabaq, memlekettik bağdarlamalar t.b.

“The Qazaq Times”