سەمەيدە جاڭا داڭعىلعا نازارباەۆ ەسىمى بەرىلمەك

سەمەي قالاسىندا جاڭادان قۇرىلعان قاراعايلى ىقشاماۋدانداعى باستى داڭعىلعا ەكس-پرەزيدەنت نۇرسۇلتان نازارباەۆ ەسىمى بەرىلەدى. بۇل تۋرالى جۇما كۇنى Semey News جانە قازاقپارات حابارلادى.

جەرگىلىكتى تىلشىلەردىڭ ماىمەتىنشە، 19 ناۋرىزدا قالا اكىمى نۇرىمبەت ساقتاعانوۆتىڭ قاتىسۋىمەن قالالىق ءماسليحاتتىڭ كەزەكتەن تىس سەسسياسى ءوتىپ، «تالقى» سوڭىندا قاراعايلى اۋدانىنداعى جاڭا داڭعىلعا نازارباەۆتىڭ ەسىمىن بەرۋگە ءبىراۋىزدان كەلىسكەن. ەندى تۇپكىلىكتى شەشىمدى رەسپۋبليكالىق ونوماستيكالىق كوميسسيا شىعارادى.

«بولاشاقتا مۇز ايدىنى كەشەنىن، ءبىلىم جانە تەحنولوگيالار ترانسفەرى مەكتەبىن اشامىز دەپ جوسپارلاپ وتىرمىز. سەرۋەندەۋ اۋماقتارى، قوعامدىق تاماقتانۋ ورىندارى، بالالارعا ارنالعان ويىن جانە سپورت الاڭدارى سالىنباق. بۇدان بولەك، كوشەلەردى جارىقتاندىرۋ، ورىندىقتار، قوقىس جاشىكتەرىن جانە شاعىن ساۋلەت نىساندارىن ورناتۋ قاراستىرىلعان»، – دەدى اكىم.

Semey News-ءدىڭ جازۋىنشا، بۇرىن جاڭا داڭعىلدىڭ اتاۋى بولماعان. كوشەنىڭ ەنى – 40 مەتر، ۇزىندىعى – 950 مەتر، ال عيماراتتاردى ەسەپتەگەندە ۇزىندىعى ەكى شاقىرىمنان اسادى. كوشە سەمەي-پاۆلودار اۆتوجولىنان باستالادى، ونىڭ بويىندا نازارباەۆ زياتكەرلىك مەكتەبى، مادەني-سپورت كەشەنى، كوپ قاباتتى تۇرعىن ۇيلەر، بالاباقشا ورنالاسقان.

وسى اپتادا جاڭا ىقشام اۋدانداعى «اباي ارەنا» سپورت كەشەنى مەن كوشەگە ءبىرىنشى پرەزيدەنتتىڭ اتىن بەرۋ تۋرالى باستاما كوتەرىلىپ، قوعامدا قىزۋ تالقىلانعان. الەۋمەتتىك جەلى قولدانۋشىلارىنىڭ كوپشىلىگى «جاعىنۋ ءمانى باسىم» دەپ، قاتتى سىناعان. دەسە دە كەيبىر مەملەكەتتىك قىزمەتكەرلەر، ءتۇر-ءتۇسى بەلگىسىز اككاۋنت قولدانۋشىلارى مەن زيالىلار مۇنىڭ «جەكە باسقا تابىنۋ ەمەستىگىن»، كەرىسىنشە «ەلەنەگەن ەڭبەك» دەپ سانايدى. نازارباەۆتىڭ ءباسپاسوز حاتشىسى ايدوس ۇكىباي 18 ناۋرىزدا ەكس-پرەزيدەنت ءوزى بۇل ۇسىنىسقا قارسى ەكەنىن ايتقان.

تاۋەلسىزدىكتىڭ كەيىنگى جيىرما جىلىندا وتاندىق ونوماستيكا اياسىندا تىلدىك نىسانداردىڭ بارلىق كاتەگورياسىن قامتيتىن ونداعان نۇرونيمدەر جۇيەسى قالىپتاسىپ ۇلگەرگەن. نازارباەۆ اتىنداعى سىيلىقتان باستاپ استانا اتاۋىنا دەيىنگىنىڭ ءبارىن تابۋعا بولادى: كوشە، داڭعىل، تاۋ شىڭى، ەسكەتكىش، مەكتەپ، ۋنيۆەرسيتەت، ساياباق، مەملەكەتتىك باعدارلامالار ت.ب.

“The Qazaq Times”