Qazaqstannıñ densaulıq saqtau ministri Aleksey Coy. Foto: QR OKQ

Densaulıq saqtau ministrligi säuir ayındağı epidemiologiyalıq ahual jöninde boljamın tağı jañarttı. Vakcinaciya mäselesi turalı soñğı mälimetter.

Seysenbi küngi dästürli Ükimet otırısında ministrlik basşısı Aleksey Coy säuir ayında künine 500 men 1700 aralığında nauqas tirkelui ıqtimal dedi.

«Optimistik scenariy boyınşa säuir ayında künine 500 nauqasqa deyin tirkelui mümkin. Al pessimistik scenariy boyınşa bwl körsetkiş 1700-ge deyin jetui mümkin», – deydi densaulıq saqtau ministri.

Bıltır qıs tüser twsta bas memlekettik sanitar-däriger Erlan Qiyasov Qazaqstanda kezekti tolqınınıñ şarıqtau kezeñi qañtar-aqpan aylarına, al ministr Aleksey Coy naurız ayınıñ soñına qaray twspa-tws keletinin mälimdegen. Osı aydıñ basında Coydıñ birinşi vice-ministri Marat Şoranov säuir ayında 20 mıñğa tarta adam COVID-19 dertin jwqtıruı mümkin degen. Degenmen ötken aylarda keminde 20 mıñ jağday tirkelgeni sebepti bwl cifr Qazaqstanğa aytarlıqtay jañalıq emes.

Sebebi ötken qısta 88 mıñğa juıq adamnan auru anıqtalğan. Toqsan künge sozılğan qıs mezgilinde auırğandardıñ 81 mıñnan astamı koronavirus, qalğan 6,8 mıñı pnevmoniya pacientteri. Jeltoqsan jäne aqpan ayları aralığındağı barlıq körsetkişterdi mezgilge arnalğan qorıtındı materialdan bile alasız.

Coydıñ sözinşe, bayau jürgizilip jatqan vakcinaciya äzirge dertti auızdıqtauğa jetkiliksiz. Sebebi soñğı mälimet boyınşa eldiñ nebäri 0,4% twrğınına,şamamen 76,2 mıñ adamğa ekpe salınğan. Bwğan deyin Ükimet jıl soñına deyin 6 mln adamdı vakcinaciyalaudı josparlağan edi.

Qazir elde 347 egu punktinde reseylik vakcina salınıp jatır. Säuir ayınan bastap sozılmalı auruğa şaldıqqan jäne 65 jastan asqandarğa vakcina egile bastaydı.

«Naurız ayınıñ soñığa deyin 180 mıñ dozası jetkiziledi. Säuir ayında ekpe sanı aytarlıqtay köbeyedi. Vakcina öndiruşilermen kelissöz jürgizdik, jıldıñ aqırına deyin 12 mln dozasın dayındaladı», – dedi ministr.

Sonımen qosa, vedomstvo basşısı bıltırğı qırküyek jäne biılğı qañtar aylarınıñ aralığında anıqtalğan nauqastardıñ taldau materialdarına genomdıq zertteu jürgizilgenin jäne onda birde-bir böten ştamm tabılmağanın nıq senimmen ayttı. Britandıq, oñtüstikafrikalıq jäne braziliyalıq ştamdardıñ eşbiri tirkelmegen körinedi. Biraq nauqas kürt köbeygen aqpan jäne naurız aylarınıñ alğaşqı jartısındağı jağdaylar äli zerdelenip jatqanı jaylı habarladı. Degenmen keybir sarapşılar Almatı qalasındağı 3 naurızdan bergi eleuli ösimdi halıqaralıq äue reysterden kelgen jaña ştamnıñ sebebinen boluı mümkin dep dolbarlaydı.

Koronavirus boyınşa Almatı qalası, astana jäne Batıs Qazaqstan oblısı – «qızıl», Qarağandı, Aqmola, Atırau, Almatı oblıstarı – «sarı aymaqta».

Bıltır 13 naurızdan beri COVID-19 infekciyasın jwqtırğandar qatarı 225,5 mıñğa, 1 tamızdan bergi koronavirus pnevmoniyası 50 mıñğa juıqtağan. DDSW derekqorı men Wlttıq statistikada Qazaqstanda auırğandar sanı 275,5 mıñğa jetken. Degenmen Ükimet koronavirus pen onıñ pnevmoniyasın eki bölek esepteydi. Pandemiya bastalğalı jalpı virus jwqqandardıñ 4582-si (KVI+ / U07.1 – 2865, KVI- / U07.2 – 656, ilespe aurulardan – 1061) qaytıs bolğan. Alayda Qazaqstan biligi boyınan koronavirus tabılsa da, basqa aurulardıñ sebebinen qaytıs boldı delingen 1061 adamdı jalpı statistikağa engizbeydi. Bwğan qarsı sarapşılardıñ sözine qarağanda, koronavirustıñ janama äserinen qaytqandardıñ jartısınan astamınıñ sebebi qan aynalımı jüyesiniñ auruları bolğandıqtan, oğan infekciya dert qozdıruşı faktor retinde ölimge äkep soqtırğan.

Qazaqstan virus taraluı boyınşa älemde Worldometers derekqorı, Djons Hopkins universiteti jäne DDSW tizimindegi 221 el men aymaqtıñ arasında 50-orında twr.

"The Qazaq Times"