قازاقستاننىڭ دەنساۋلىق ساقتاۋ ءمينيسترى الەكسەي تسوي. فوتو: قر وكق

دەنساۋلىق ساقتاۋ مينيسترلىگى ءساۋىر ايىنداعى ەپيدەميولوگيالىق احۋال جونىندە بولجامىن تاعى جاڭارتتى. ۆاكتسيناتسيا ماسەلەسى تۋرالى سوڭعى مالىمەتتەر.

سەيسەنبى كۇنگى ءداستۇرلى ۇكىمەت وتىرىسىندا مينيسترلىك باسشىسى الەكسەي تسوي ءساۋىر ايىندا كۇنىنە 500 مەن 1700 ارالىعىندا ناۋقاس تىركەلۋى ىقتيمال دەدى.

«وپتيميستىك ستسەناري بويىنشا ءساۋىر ايىندا كۇنىنە 500 ناۋقاسقا دەيىن تىركەلۋى مۇمكىن. ال پەسسيميستىك ستسەناري بويىنشا بۇل كورسەتكىش 1700-گە دەيىن جەتۋى مۇمكىن»، – دەيدى دەنساۋلىق ساقتاۋ ءمينيسترى.

بىلتىر قىس تۇسەر تۇستا باس مەملەكەتتىك سانيتار-دارىگەر ەرلان قياسوۆ قازاقستاندا كەزەكتى تولقىنىنىڭ شارىقتاۋ كەزەڭى قاڭتار-اقپان ايلارىنا، ال مينيستر الەكسەي تسوي ناۋرىز ايىنىڭ سوڭىنا قاراي تۇسپا-تۇس كەلەتىنىن مالىمدەگەن. وسى ايدىڭ باسىندا تسويدىڭ ءبىرىنشى ۆيتسە-ءمينيسترى مارات شورانوۆ ءساۋىر ايىندا 20 مىڭعا تارتا ادام COVID-19 دەرتىن جۇقتىرۋى مۇمكىن دەگەن. دەگەنمەن وتكەن ايلاردا كەمىندە 20 مىڭ جاعداي تىركەلگەنى سەبەپتى بۇل تسيفر قازاقستانعا ايتارلىقتاي جاڭالىق ەمەس.

سەبەبى وتكەن قىستا 88 مىڭعا جۋىق ادامنان اۋرۋ انىقتالعان. توقسان كۇنگە سوزىلعان قىس مەزگىلىندە اۋىرعانداردىڭ 81 مىڭنان استامى كوروناۆيرۋس، قالعان 6,8 مىڭى پنەۆمونيا پاتسيەنتتەرى. جەلتوقسان جانە اقپان ايلارى ارالىعىنداعى بارلىق كورسەتكىشتەردى مەزگىلگە ارنالعان قورىتىندى ماتەريالدان بىلە الاسىز.

تسويدىڭ سوزىنشە، باياۋ جۇرگىزىلىپ جاتقان ۆاكتسيناتسيا ازىرگە دەرتتى اۋىزدىقتاۋعا جەتكىلىكسىز. سەبەبى سوڭعى مالىمەت بويىنشا ەلدىڭ نەبارى 0,4% تۇرعىنىنا،شامامەن 76,2 مىڭ ادامعا ەكپە سالىنعان. بۇعان دەيىن ۇكىمەت جىل سوڭىنا دەيىن 6 ملن ادامدى ۆاكتسيناتسيالاۋدى جوسپارلاعان ەدى.

قازىر ەلدە 347 ەگۋ پۋنكتىندە رەسەيلىك ۆاكتسينا سالىنىپ جاتىر. ءساۋىر ايىنان باستاپ سوزىلمالى اۋرۋعا شالدىققان جانە 65 جاستان اسقاندارعا ۆاكتسينا ەگىلە باستايدى.

«ناۋرىز ايىنىڭ سوڭىعا دەيىن 180 مىڭ دوزاسى جەتكىزىلەدى. ءساۋىر ايىندا ەكپە سانى ايتارلىقتاي كوبەيەدى. ۆاكتسينا وندىرۋشىلەرمەن كەلىسسوز جۇرگىزدىك، جىلدىڭ اقىرىنا دەيىن 12 ملن دوزاسىن دايىندالادى»، – دەدى مينيستر.

سونىمەن قوسا، ۆەدومستۆو باسشىسى بىلتىرعى قىركۇيەك جانە بيىلعى قاڭتار ايلارىنىڭ ارالىعىندا انىقتالعان ناۋقاستاردىڭ تالداۋ ماتەريالدارىنا گەنومدىق زەرتتەۋ جۇرگىزىلگەنىن جانە وندا بىردە-ءبىر بوتەن شتامم تابىلماعانىن نىق سەنىممەن ايتتى. بريتاندىق، وڭتۇستىكافريكالىق جانە برازيليالىق شتامداردىڭ ەشبىرى تىركەلمەگەن كورىنەدى. بىراق ناۋقاس كۇرت كوبەيگەن اقپان جانە ناۋرىز ايلارىنىڭ العاشقى جارتىسىنداعى جاعدايلار ءالى زەردەلەنىپ جاتقانى جايلى حابارلادى. دەگەنمەن كەيبىر ساراپشىلار الماتى قالاسىنداعى 3 ناۋرىزدان بەرگى ەلەۋلى ءوسىمدى حالىقارالىق اۋە رەيستەردەن كەلگەن جاڭا شتامنىڭ سەبەبىنەن بولۋى مۇمكىن دەپ دولبارلايدى.

كوروناۆيرۋس بويىنشا الماتى قالاسى، استانا جانە باتىس قازاقستان وبلىسى – «قىزىل»، قاراعاندى، اقمولا، اتىراۋ، الماتى وبلىستارى – «سارى ايماقتا».

بىلتىر 13 ناۋرىزدان بەرى COVID-19 ينفەكتسياسىن جۇقتىرعاندار قاتارى 225,5 مىڭعا، 1 تامىزدان بەرگى كوروناۆيرۋس پنەۆمونياسى 50 مىڭعا جۋىقتاعان. ددسۇ دەرەكقورى مەن ۇلتتىق ستاتيستيكادا قازاقستاندا اۋىرعاندار سانى 275,5 مىڭعا جەتكەن. دەگەنمەن ۇكىمەت كوروناۆيرۋس پەن ونىڭ پنەۆمونياسىن ەكى بولەك ەسەپتەيدى. پاندەميا باستالعالى جالپى ۆيرۋس جۇققانداردىڭ 4582-ءسى (كۆي+ / U07.1 – 2865, كۆي- / U07.2 – 656, ىلەسپە اۋرۋلاردان – 1061) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەن 1061 ادامدى جالپى ستاتيستيكاعا ەنگىزبەيدى. بۇعان قارسى ساراپشىلاردىڭ سوزىنە قاراعاندا، كوروناۆيرۋستىڭ جاناما اسەرىنەن قايتقانداردىڭ جارتىسىنان استامىنىڭ سەبەبى قان اينالىمى جۇيەسىنىڭ اۋرۋلارى بولعاندىقتان، وعان ينفەكتسيا دەرت قوزدىرۋشى فاكتور رەتىندە ولىمگە اكەپ سوقتىرعان.

قازاقستان ۆيرۋس تارالۋى بويىنشا الەمدە Worldometers دەرەكقورى، دجونس حوپكينس ۋنيۆەرسيتەتى جانە ددسۇ تىزىمىندەگى 221 ەل مەن ايماقتىڭ اراسىندا 50-ورىندا تۇر.

"The Qazaq Times"