Almatıdağı Qıtay konsuldığı aldındağı narazılıqtıñ 17-şi küninen körinis. Foto: Azattıq radiosı

Almatıda aqpan ayında Qıtaydağı tuıstarınıñ bosatıluın, elge oraluın, qwqıqtarın qorğaudı talap etken azamattardıñ narazılığı üdey tüsti. Biraq Qazaqstan biligi Qıtay elşiligin «mazalağan» azamattarın aşıqtan-aşıq «qamay» bastadı.

Soñğı ret eki jıldan beri Qıtaydağı tuıstarınan habar ala almay, jan sauğa swrap kele jatqan Marat Qwrbanovtı 23 aqpan Qıtay konsuldığı aldına piketke şıqqanı üşin beysenbi küni Almatı qalasınıñ mamandandırılğan audanaralıq äkimşilik sotı 12 täulikke qamağan. Sonday-aq, sot narazılardıñ biri, Qıtay türmesinde otırğan bauırın bosatudı talap etken belsendi Baybolat Künbolatwlın 10 täulikke abaqtığa japqan.

Qıtayda qısımğa wşırap ne elge orala almay otırğan jaqındarına araşa swrap jürgen azamattardıñ Almatıda ornalasqan Qıtay konsuldığı aldındağı narazılığın jiti  baqılap kele jatqan Azattıq radiosınıñ esebinşe, akciyanıñ ötip jatqanına 19 kün boldı.

Solardıñ biri Farida Qabılbek «bwl mäsele eki jaq arasında qanşama ret talqılandı, nätije joq, tuıstarımız türmeden şıqpayınşa akciyanı toqtatpaymız» deydi.

«Osı uaqıtqa deyin Qazaqstan Sırtqı ister ministrliginiñ artınan 4 jıl jürdik. Artı - 4 jıl, aldı - 17 jıl jür. Şıdamımız tausıldı, endi biz özimiz qareket jasaymız. Ana jerde bireuler «senderdi bireuler, «Atajwrt» jetelep jür"» degenge keltiredi. Biz ol jerge jaqındarımızdı izdep şığıp twrmız. Erigip şığıp twrğan joqpız», – deydi aşınğan Farida Qabılbek jwma küni Azattıq tilşisine.

Qıtaydıñ Şıñjañ aymağında qalğan tuıstarın izdegen qazaqstandıqtar birneşe jıldan beri Qazaqstanda jiın ötkizip, piketterge şığıp, Qıtayda qalğan tuıstarına araşa swrap keledi. Olar Qazaqstan sırtqı ister ministrliginen «Qıtayda qamalğandar – Beyjiñniñ işki isi, oğan aralasa almaymız» degen jauap alğan. Al Qıtay konsuldığı jauap bermegen.

Narazılardıñ keybiri tuıstarınıñ Şıñjañdağı «sayasi qayta tärbieleu» lager'lerine qamalğanın aytsa, keybiri «negizsiz ayıptarmen» wzaq jılğa sottalğanın, biri Qıtay biliginiñ qwjattarın tartıp alıp, Qazaqstanğa jibermey jatqanın aytqan.

Qıtayda «negizsiz ayıptarmen» qamalğan nemese iz-tüzsiz joğalğan ne Qazaqstanğa qaray öte almay jürgen adamdardıñ tuıstarı aqpan ayınıñ basınan beri jaqındarın bosatudı talap etip, Almatıdağı Qıtay konsuldığı aldında üzdiksiz akciya ötkizip keledi.

25 aqpanda el astanası men Beyjiñ Qıtayda qalğan qazaqtar mäselesin onlayn rejimde talqıladı. Qazaqstan sırtqı ister ministrliginiñ aqparatına qarağanda, konsuldıq konsul'taciyalardıñ 19-otırısına Qazaqstan jağınan konsuldıq qızmet departamentiniñ direktorı Bauırjan Aqataev, al Qıtay jağınan konsuldıq departament direktorı Cuy Aymin' jäne eki taraptıñ özge de ökilderi qatısqan.

«Konsul'taciyalar barısında Qazaqstan tarapı eki memlekettiñ wltı qazaq azamattarınan qwralğan otbasılardıñ qayta qosılu mäselelerin köterdi» delingen Qazaqstan SİM-niñ qısqa habarlamasında.

Onda konferenciya barısında eki el azamattarınıñ viza aluı, kirip-şığu mäseleleri de talqılanğanı jazılğan.

"The Qazaq Times"