«مينيستر، قولىڭدى تارت!» – قۇقىق قورعاۋشى زاڭ جوباسىنا قارسى پيكەتكە شىقتى

قۇقىق قورعاۋشى، «حالىقارالىق قۇقىقتىق باستاما» قورىنىڭ باسشىسى امانگەلدى شورمانباەۆ سەيسەنبى كۇنى الماتى قالاسىنىڭ ادىلەت دەپارتامەنتى عيماراتىنىڭ الدىندا رۇقسات ەتىلگەن جالعىز ادامدىق پيكەت وتكىزدى. اكتسيا اۆتورىنىڭ تالاپ-ءۋاجىن ازاتتىق راديوسى تىڭداپ كورگەن.

بەلسەندى قۇقىق قورعاۋشى قازىر سەناتتا قارالىپ جاتقان «ادۆوكات قىزمەتى جانە زاڭگەرلىك كومەك» تۋرالى زاڭعا ەنگىزىلەتىن كەيبىر نورمالاردى الىپ تاستاۋعا شاقىردى. ونىڭ پايىمداۋىنشا، «زاڭگەرلەر، ادۆوكاتتاردىڭ ءىسىن رەتتەۋگە» باعىتتالعان تۇزەتۋلەر شىن مانىندە زاڭگەرلەردى مەملەكەتكە باعىندىرماق. تاۋەلسىز سالا مەملەكەتكە باعىنسا، ەلدە تاۋەلسىز زاڭگەرلەر قالمايدى دەپ الاڭدايدى قۇقىق قورعاۋشى.

«زاڭ جوباسى بويىنشا جوعارى قۇرىلىم – رەسپۋبليكالىق ادۆوكاتتار القاسى مەن زاڭ جونىندە كەڭەسشىلەردىڭ رەسپۋبليكالىق پالاتاسى قۇرىلادى. ءبىزدىڭ ويىمىزشا، بۇل قۇرىلىمدار تومەندەگى ادۆوكاتتىق كەڭسەلەر مەن ادۆوكاتتار جانە زاڭگەرلەر پالاتاسىن تاۋەلسىزدىكتەن تولىق ايىرۋدى كوزدەيدى. ولار نەنى ۇسىنادى؟ «ادۆوكات جانە زاڭ قىزمەتىن جەتىلدىرەمىز» دەگەن جەلەۋمەن ءتۇرلى جارنا ەنگىزىپ، قانداي دا ءبىر اقپارات جۇيەلەرىن، دەرەكتەر قورىن تىقپالاپ جاتىر، ونى پايدالانىپ، سول ءۇشىن اقشا تولەۋ دە مىندەتتى بولادى» دەدى شورمانباەۆ.

ونىڭ ايتۋىنشا، ءار مامان القادان بولەك قۇرىلاتىن ورگان – رەسپۋبليكالىق پالاتاعا مۇشە بولۋ ءۇشىن ايىنا كەمىندە 1 ايلىق ەسەپتىك كورسەتكىش (1 اەك – 2917 تەڭگە) كولەمىندە جارنا تولەپ وتىرۋعا مىندەتتى. «بوستان-بوسقا ايىنا 1 اەك تولەۋ. ەلدە كەمىندە 9 مىڭ زاڭگەر بار. رەسپۋبليكالىق پالاتا كەڭسەسىن كىم ءۇشىن اشادى؟» دەيدى.

«2018 جىلى قابىلدانعان زاڭ جوباسىندا زاڭگەرلەر ادۆوكاتتار القاسى سياقتى كەڭەسشىلەر پالاتاسىنا كىرۋگە مىندەتتەلدى. جارايدى، ءبىز بارلىق زاڭگەرلەردى جينايمىز. مىڭداعان زاڭگەر ءتۇرلى پالاتالارعا مۇشە. زاڭگەرلەر ۇيىمداسا الدى جانە تاۋەلسىز بولاىپ قالا بەردى. ولارعا (مينيسترلىككە – QT) بۇل جەتكىلىكسىز، ەندى زاڭگەرلىك كەڭەسشىلەر پالاتاسىنىڭ مينيمالدى مۇشەلىگىن 50-دەن 200-گە دەيىن ارتتىرعىسى كەلەدى. نەلىكتەن؟ ويتكەنى مەملەكەتتىڭ باقىلاۋىنداعى ءتۇرلى توپتاردىڭ بىرىگۋىنە جول بەرمەي جانە ولاردى بۇرىنعى كاسىپوداقتار سياقتى جويۋ ءۇشىن»، – دەدى شورمانباەۆ.

امانگەلدى شورمانباەۆ زاڭگەرلەردىڭ پرەزيدەنت پەن سەناتقا ۇندەۋ جولداپ، زاڭ جوباسىن كەرى قايتارۋعا كۇش سالاتىنىن مالىمدەگەن. ول سونىمەن بىرگە بۇۇ-نىڭ زاڭگەرلەردى قورعاۋ، قۇقىق قورعاۋشىلاردى قورعاۋ جانە بىرلەسۋ ەركىندىگى جونىندەگى ارنايى بايانداماشىلارىنا جاقىن ارادا ۇندەۋ جولدايتىنىن حابارلادى.

"The Qazaq Times"