Täjikstan Qıtayğa narazılıq notasın joldadı. Täjik SİM tarabı Qıtaydağı keybir aqparat qwraldarı jariyalağan mälimetterdi «arandatuşılıq» dep tanığan. Bwğan deyin birqatar qıtaylıq internet basılımdarda qazirgi Täjikstan territoriyası birkezderi Qıtay jeri bolğan degen mazmwndağı aqparat taratqan bolatın.

Qıtayğa narazılıq notası joldanğanın Täjik SİM basşısı Sirojiddin Muhriddin baspasöz jiınında mälimdegen. «Bwl arandatuşılıqqa qarsı biz barlıq şaralardı jasadıq. Qıtayğa narazılıq notasın joldalıq jäne bizdiñ Qıtaydağı diplomattarımız QHR SİM ökilderimen jäne BAQ ökilderimen kezdesti. Nätijesinde arandatu sipatındağı materialdar öşirildi», – degen Täjikstan SİM jetekşisi.

Qıtay internet basılımdarında jariyalanğan maqalanıñ tolıq mazmwnın taba almadıq. Degenmen, onda «Pamir taularındağı bwrınğı joğaltıp alğan territoriyamız öziniñ zañdı iesine, Qıtayğa qaytarılıp berildi» degen mazmwnda jazılğanın özbek pen täjik BAQ-ı jazdı. Bwl jazbalar Qıtaydıñ aqparattıq ortasında birden keñ tarap ketkeni de aytıladı. Ol da bolsa Qıtaydağı işki äleumettik köñil-küydi sipattasa kerek.

Täjikterdiñ narazılığınan keyin Qıtay SİM tarabı: «Bwnday jazbalar täuelsiz aqparat qwraldarında jariyalanğan jäne ol resmi Beyjiñniñ wstanımın bildirmeydi», – degen mazmwnda mälimdeme jasağan. Bir qarağanda mwnday jauap qazaq qoğamına da tanıs sekildi. Bwğan deyin Qıtaydağı täuelsiz aqparat qwraldarında jariyalanğan jazbağa qatıstı Qazaqstan SİM tarabınıñ narazılıq notasına da osınday jauap berilgen bolatın.

Orıstıñ «Vzglad» basılımı qañtardıñ bas şeninde «Kak Kitay zabral territoriyu u bıvşih sovetskih respublik» degen material jariyalap, Keñes odağı ıdırağannan keyin Qıtaymen şekara anıqtauda Täjikstan eñ köp şeginis jasağanın, Qıtayğa 1,1 şarşı şaqırım jer bergenin jazğan edi. Onda Keñesten keyin qayta şekara ayırısu kezinde Qıtaydıñ Qazaqstannan 34 mıñ şarşı şaqırım «daulı» aumaqtı talap etkenin, nätijesinde Qazaqstan tarabı 1994 jılı 946 şarşı şaqırım aumaqtı bergenin, 1997 jılı qazaq-qıtay resmi şekara bekitu kelisimi kezindegi resmi mälimdemede 407 şarşı şaqırım aumaqtıñ Qıtayğa ötkeni turalı aytılğan.  Ärine, bwnday jağday qırğızdarda da bolğan.

Qıtay aqparat keñistiginde bwğan wqsas jazbalardıñ jariyalanıp jatatını bizge belgili. Keyde el işindegi äleumettik narazı köñil küydi basu maqsatında mwnday materialdar maqsattı türde jariyalanatını da bar. Degenmen, qoğam pikiri bir kezeñde biliktiñ wstanımına aynalıp ketu mümkindigin eskerip, saq qarap, däp jauap berip otırudıñ mañızı zor.

“The Qazaq Times”