Körneki suret. Fotokollaj: Tengrinews.kz

Qazaqstan halqı bıltır 1,32%-ğa nemese 245 mıñ adamğa ösken. Wlttıq statistika byurosınıñ dereginşe, bwl aldıñğı jıldıñ körsetkişinen säl artıq: wzaq jıldar boyı bilik etken prezident de-yure auısqan 2019 jılı halıq sanı 1,29%-ğa, yağni 236 mıñ adamğa köbeygen edi.

Biıl 1 qañtarğa qaray Qazaqstan halqınıñ jalpı sanı 18 mln 877 mıñ adamğa jetti. Bıltır ädettegidey elorda ösimi qarqındı jürdi – bir jılda jwrt 4,25%-ğa (2019 j. 5,34% bolğan – QT) ya 48,3 mıñ adamğa qalıñdadı. Resmi esepke sensek, qazir 1 mln 184 mıñ astanalıq bar.

Ekinşi orında Şımkent qalası 3,47%-ben (1 mln 074 mıñ twrğın), üştikti Almatı 3,14% (1 mln 977 mıñ twrğın) körsetkişpen tüyindegen.

Batıs öñirleri de halıq sanınıñ ösu qarqını boyınşa joğarı nätijesin saqtap twr. Bıltır el halqı Mañğıstau oblısında 2,97%, Atırau oblısında 1,83%, Aqtöbe oblısında 1,36% jäne BQO-da 0,66% - ğa östi.

Alayda özge altı aymaqta halıq sanı kemigen: SQO 0,93%, Qostanay  0,46%, ŞQO 0,43% – ğa, Aqmola 0,17%, Pavlodar 0,15%, Qarağandı oblıstarı 0,08% teris mändi körsetken. Mwnda tek SQO halqı tabiği türde kemigenin aytu kerek. Bwl jaña tuğan adamnıñ sanınan qaytıs bolğandar esebi asıp tüskenin bildiredi. Basqa öñirlerde tabiği ösim bayqaladı.

Sonımen qosa, älemdik pandemiya sebebinen Qazaqstannan ketetinderdiñ köşi-qon ağını aytarlıqtay azayğan. 2019 jılı 33 mıñ adam ketse, bıltır 17,7 mıñ adam qonıs audarğan. Halıqtıñ aldıñğı jılğa qarağanda eleuli deñgeyde ösuin tap osı migraciya ağınıñın tosırqauımen baylanıstıruğa boladı.

Qazaqstandağı qala halqınıñ ülesi 59,1% jäne auıl halqınıñ ülesi 40,9%-dı körsetken. Bwdan qala jwrtınıñ 1,93%-ğa (2019 jılı 1,83%), auıl twrğındarınıñ 0,45%-ğa (2019 j. 0,53%) artqanın añğaruğa boladı.

Joğarıda körsetilgen derekter tek resmi esepke alu negizinde jürgiziletindekten, şınayı jağdaydıñ tolıqtay körinisi bola almauı mümkin ekenin eskertemiz. Eşqanday tirkeusiz uaqıtşa kelip qızmet etetin azamattardıñ az emestigin eskersek, şınayı ahual özgeşe ekenin bağamdau qiın emes.

"The Qazaq Times"