AQŞ prezidenti Djozef Bayden. Foto: baltnews.lt

AQŞ «Aşıq aspan» turalı kelisimşartqa qayta oraludı josparlap jatır. Bwl turalı Memlekettik departamenttiñ ökili Ned Prays mälimdedi.

Bıltır qaraşada eks-prezident Donal'd Tramp AQŞ-tıñ kelisimnen şığu sebebin Reseydiñ qwjat şarttarın saqtamauımen baylanıstırğan. Al AQŞ memlekettik departamenti Reseydiñ Abhaziya jäne Oñtüstik Osetiyamen (Resey olardı täuelsiz memleketter dep atasa, Amerika men köptegen elder Gruziyanıñ aumağı dep sanaydı) şekarası mañında äue keñistigin baqılauğa rwqsat bermegenin aytqan. Bwğan qosa, Ukrainanıñ aumağı sanalatın Qırımda wşaqtarğa arnalğan janar-jağar may stanciyasın ornalastırğanın habarlağan.

Şeşimdi Vaşingtonnıñ NATO boyınşa birqatar odaqtastarı mısalı, Germaniya qoldamağan. AQŞ-tıñ özinde birqatar sarapşılar men sayasatkerler Resey kelisimdi bwzsa da, AQŞ odan şıqpauı tiis dep sanadı. Qazirgi prezident Djo Bayden de kelisimdi qaytaru kerek dep mälimdedi.

AQŞ pen Resey orta jäne qısqa qaşıqtıqta wşatın zımırandar turalı kelisimşarttı toqtatqan. Strategiyalıq şabuıldauşı qarular (SNV-1) turalı 2021 jılğa deyin küşi bar kelisim mäselesinde de belgisizdik bayqalğan. Bayden bwl kelisimniñ merzimin wzartudı qoldadı.

«Aşıq aspan» turalı kelisimşartqa 1992 jılı Hel'sinkide Europadağı qauipsizdik jäne ıntımaqtastıq wyımına müşe 23 memlekettiñ ökilderi qol qoydı. Qwjattıñ qabıldanuına Mäskeu belsendi atsalısqan.

Qazirgi uaqıtta bwl wyımda 34 memleket bar. Kelisim boyınşa wyımğa müşe memleketterge baqılauşı esebinde äskeri is-äreketterdi baqılau üşin bir-biriniñ aumaqtarı arqılı wşuğa rwqsat berilgen. Keyinnen Reseydiñ qwjattağı talaptardı bwzğanı anıqtalıp, 2017 jılı Uaşington reseylik baqılauşı reysterge birqatar şekteuler engizgen.

"The Qazaq Times"