اقش «اشىق اسپان» كەلىسىمىنە قايتا ورالماق

اقش «اشىق اسپان» تۋرالى كەلىسىمشارتقا قايتا ورالۋدى جوسپارلاپ جاتىر. بۇل تۋرالى مەملەكەتتىك دەپارتامەنتتىڭ وكىلى نەد پرايس مالىمدەدى.

بىلتىر قاراشادا ەكس-پرەزيدەنت دونالد ترامپ اقش-تىڭ كەلىسىمنەن شىعۋ سەبەبىن رەسەيدىڭ قۇجات شارتتارىن ساقتاماۋىمەن بايلانىستىرعان. ال اقش مەملەكەتتىك دەپارتامەنتى رەسەيدىڭ ابحازيا جانە وڭتۇستىك وسەتيامەن (رەسەي ولاردى تاۋەلسىز مەملەكەتتەر دەپ اتاسا، امەريكا مەن كوپتەگەن ەلدەر گرۋزيانىڭ اۋماعى دەپ سانايدى) شەكاراسى ماڭىندا اۋە كەڭىستىگىن باقىلاۋعا رۇقسات بەرمەگەنىن ايتقان. بۇعان قوسا، ۋكراينانىڭ اۋماعى سانالاتىن قىرىمدا ۇشاقتارعا ارنالعان جانار-جاعار ماي ستانتسياسىن ورنالاستىرعانىن حابارلاعان.

شەشىمدى ۆاشينگتوننىڭ ناتو بويىنشا بىرقاتار وداقتاستارى مىسالى، گەرمانيا قولداماعان. اقش-تىڭ وزىندە بىرقاتار ساراپشىلار مەن ساياساتكەرلەر رەسەي كەلىسىمدى بۇزسا دا، اقش ودان شىقپاۋى ءتيىس دەپ سانادى. قازىرگى پرەزيدەنت دجو بايدەن دە كەلىسىمدى قايتارۋ كەرەك دەپ مالىمدەدى.

اقش پەن رەسەي ورتا جانە قىسقا قاشىقتىقتا ۇشاتىن زىمىراندار تۋرالى كەلىسىمشارتتى توقتاتقان. ستراتەگيالىق شابۋىلداۋشى قارۋلار (سنۆ-1) تۋرالى 2021 جىلعا دەيىن كۇشى بار كەلىسىم ماسەلەسىندە دە بەلگىسىزدىك بايقالعان. بايدەن بۇل كەلىسىمنىڭ مەرزىمىن ۇزارتۋدى قولدادى.

«اشىق اسپان» تۋرالى كەلىسىمشارتقا 1992 جىلى حەلسينكيدە ەۋروپاداعى قاۋىپسىزدىك جانە ىنتىماقتاستىق ۇيىمىنا مۇشە 23 مەملەكەتتىڭ وكىلدەرى قول قويدى. قۇجاتتىڭ قابىلدانۋىنا ماسكەۋ بەلسەندى اتسالىسقان.

قازىرگى ۋاقىتتا بۇل ۇيىمدا 34 مەملەكەت بار. كەلىسىم بويىنشا ۇيىمعا مۇشە مەملەكەتتەرگە باقىلاۋشى ەسەبىندە اسكەري ءىس-ارەكەتتەردى باقىلاۋ ءۇشىن ءبىر-ءبىرىنىڭ اۋماقتارى ارقىلى ۇشۋعا رۇقسات بەرىلگەن. كەيىننەن رەسەيدىڭ قۇجاتتاعى تالاپتاردى بۇزعانى انىقتالىپ، 2017 جىلى ۋاشينگتون رەسەيلىك باقىلاۋشى رەيستەرگە بىرقاتار شەكتەۋلەر ەنگىزگەن.

"The Qazaq Times"