Auruhana dälizi. Körneki suret. Foto: aşıq derekköz

Densaulıq saqtau ministrliginiñ baspasöz qızmeti redakciya swrauı boyınşa 1 naurız ben 31 jeltoqsan aralığında koronavirustıñ janama äserinen 938 adam qaytıs bolğanın habarladı.

Bilik atalğan sanattağı pacientten PTR testi arqılı koronavirus anıqtalğanına qaramastan, «basqa aurulardıñ sebebinen qaytıs bolğanın» alğa tarta otırıp ortaq esepke qospaydı. Vedomstvo bwl indikatorğa tiesili derekti twraqtı türde emes, tilşilerdiñ swrauımen ğana jariyalaydı.

(!) Ministrlik olardıñ ölimin «basqa dertterden boldı, koronavirus tikeley äser etpeydi» dep sanaydı. Jauaptı mamandar bwl jaylı sirek söz etedi, onıñ özinde jurnalisterdiñ swrauımen. Aqparat avtomattandırılmağan. 18 mausım 54 jağday, 2 şilde 101, 23 şilde 319, 11 qırküyek 576,15 qazan 672, 9 qaraşa 709, 15 jeltoqsan 764, 26 jeltoqsan 816 jağday, 20 qañtar 938-ge artqanı aytıldı.

«Densaulıq saqtau ministrliginiñ Aqparat jüyesi boyınşa, koronavirus infekciyasınıñ janama äserinen  respublikada 1 naurızdan 31 jeltoqsan aralığında 938 adam qaytıs bolğan», – delingen resmi jauap hatta.

Onıñ 677-si (erler – 337, äyelder – 340) qarttar, 11-i bala jäne bireui jaña bosanğan äyel.

Bıltırğı qaraşa ayında 107 jäne jeltoqsan ayında 122 ölim tirkelgen.

Osı sanatta ömirden ötkenderdiñ deregi jalpı esepke engizilmeydi. Sarapşılar men mamandar bwğan qarsı. Mwnı «statistikanı meyilinşe jaqsartudıñ amalı» dep esepteydi. Olardıñ aytuınşa, koronavirustıñ janama äserinen qaytqandardıñ jartısınan astamınıñ sebebi qan aynalımı men tınıs alu jüyesiniñ auruları bolğandıqtan, oğan infekciya dert qozdıruşı faktor retinde ölimge äkep soqtıradı. Soñğı derek boyınşa,  aurular tobı jiktelimin vedomstvo bılay taratadı:

  • Tınıs alu jüyesiniñ auruları – 47%
  • Qanaynalım jüyesiniñ auruları –32,8%
  • Endokrindik jüyeniñ auruları jäne metabolizmniñ – 4,9%
  • Jaña öskinder – 4,5%
  • Nesep-jınıs jüyesniñ auruları – 3,2%
  • As qorıtu ağzası auruları – 2,5%
  • Jüyke jüyesiniñ auruları – 1,6%
  • Jwqpalı jäne parazittik aurular – 1,3%
  • Basqa jağdaylar – 2,3%

Bıltır koronavirustıñ janama äserinen qaytıs boğlandardıñ eñ köbi SQO, ŞQO jäne Qostanay oblıstarına, eñ kemi Atırau, Mañğıstau, Aqtöbe öñirlerine tiesili.

Qazaqstanda 13 naurızdan beri COVID-19 infekciyasın jwqtırğandar qatarı 171 mıñnan assa, 1 tamızdan bergi koronavirus pnevmoniyası 47 mıñğa juıqtağan. DDSW mälimetinşe, auırğandardıñ sanı 216 mıñğa, al Wlttıq statistikada 218 mıñğa jetken. Degenmen Ükimet koronavirus pen onıñ pnevmoniyasın eki bölek esepteydi.

Pandemiya bastalğalı jalpı virus jwqqandardıñ 3914-i (KVI+ / U07.1 – 2431, KVI- / U07.2 – 545, ilespe aurulardan – 938) qaytıs bolğan. Alayda bilik  nauqastıñ boyınan koronavirus tabılsa da, basqa aurulardıñ sebebinen qaytıs boldı delingen 938  adamdı jalpı statistikağa engizbeydi.

"The Qazaq Times"