اۋرۋحانا ءدالىزى. كورنەكى سۋرەت. فوتو: اشىق دەرەككوز

دەنساۋلىق ساقتاۋ مينيسترلىگىنىڭ ءباسپاسوز قىزمەتى رەداكتسيا سۇراۋى بويىنشا 1 ناۋرىز بەن 31 جەلتوقسان ارالىعىندا كوروناۆيرۋستىڭ جاناما اسەرىنەن 938 ادام قايتىس بولعانىن حابارلادى.

بيلىك اتالعان ساناتتاعى پاتسيەنتتەن پتر تەستى ارقىلى كوروناۆيرۋس انىقتالعانىنا قاراماستان، «باسقا اۋرۋلاردىڭ سەبەبىنەن قايتىس بولعانىن» العا تارتا وتىرىپ ورتاق ەسەپكە قوسپايدى. ۆەدومستۆو بۇل ينديكاتورعا تيەسىلى دەرەكتى تۇراقتى تۇردە ەمەس، تىلشىلەردىڭ سۇراۋىمەن عانا جاريالايدى.

(!) مينيسترلىك ولاردىڭ ءولىمىن «باسقا دەرتتەردەن بولدى، كوروناۆيرۋس تىكەلەي اسەر ەتپەيدى» دەپ سانايدى. جاۋاپتى ماماندار بۇل جايلى سيرەك ءسوز ەتەدى، ونىڭ وزىندە جۋرناليستەردىڭ سۇراۋىمەن. اقپارات اۆتوماتتاندىرىلماعان. 18 ماۋسىم 54 جاعداي، 2 شىلدە 101, 23 شىلدە 319, 11 قىركۇيەك 576,15 قازان 672, 9 قاراشا 709, 15 جەلتوقسان 764, 26 جەلتوقسان 816 جاعداي، 20 قاڭتار 938-گە ارتقانى ايتىلدى.

«دەنساۋلىق ساقتاۋ مينيسترلىگىنىڭ اقپارات جۇيەسى بويىنشا، كوروناۆيرۋس ينفەكتسياسىنىڭ جاناما اسەرىنەن  رەسپۋبليكادا 1 ناۋرىزدان 31 جەلتوقسان ارالىعىندا 938 ادام قايتىس بولعان»، – دەلىنگەن رەسمي جاۋاپ حاتتا.

ونىڭ 677-ءسى (ەرلەر – 337, ايەلدەر – 340) قارتتار، 11-ءى بالا جانە بىرەۋى جاڭا بوسانعان ايەل.

بىلتىرعى قاراشا ايىندا 107 جانە جەلتوقسان ايىندا 122 ءولىم تىركەلگەن.

وسى ساناتتا ومىردەن وتكەندەردىڭ دەرەگى جالپى ەسەپكە ەنگىزىلمەيدى. ساراپشىلار مەن ماماندار بۇعان قارسى. مۇنى «ستاتيستيكانى مەيىلىنشە جاقسارتۋدىڭ امالى» دەپ ەسەپتەيدى. ولاردىڭ ايتۋىنشا، كوروناۆيرۋستىڭ جاناما اسەرىنەن قايتقانداردىڭ جارتىسىنان استامىنىڭ سەبەبى قان اينالىمى مەن تىنىس الۋ جۇيەسىنىڭ اۋرۋلارى بولعاندىقتان، وعان ينفەكتسيا دەرت قوزدىرۋشى فاكتور رەتىندە ولىمگە اكەپ سوقتىرادى. سوڭعى دەرەك بويىنشا،  اۋرۋلار توبى جىكتەلىمىن ۆەدومستۆو بىلاي تاراتادى:

  • تىنىس الۋ جۇيەسىنىڭ اۋرۋلارى – 47%
  • قاناينالىم جۇيەسىنىڭ اۋرۋلارى –32,8%
  • ەندوكريندىك جۇيەنىڭ اۋرۋلارى جانە مەتابوليزمنىڭ – 4,9%
  • جاڭا وسكىندەر – 4,5%
  • نەسەپ-جىنىس جۇيەسنىڭ اۋرۋلارى – 3,2%
  • اس قورىتۋ اعزاسى اۋرۋلارى – 2,5%
  • جۇيكە جۇيەسىنىڭ اۋرۋلارى – 1,6%
  • جۇقپالى جانە پارازيتتىك اۋرۋلار – 1,3%
  • باسقا جاعدايلار – 2,3%

بىلتىر كوروناۆيرۋستىڭ جاناما اسەرىنەن قايتىس بوعلانداردىڭ ەڭ كوبى سقو، شقو جانە قوستاناي وبلىستارىنا، ەڭ كەمى اتىراۋ، ماڭعىستاۋ، اقتوبە وڭىرلەرىنە تيەسىلى.

قازاقستاندا 13 ناۋرىزدان بەرى COVID-19 ينفەكتسياسىن جۇقتىرعاندار قاتارى 171 مىڭنان اسسا، 1 تامىزدان بەرگى كوروناۆيرۋس پنەۆمونياسى 47 مىڭعا جۋىقتاعان. ددسۇ مالىمەتىنشە، اۋىرعانداردىڭ سانى 216 مىڭعا، ال ۇلتتىق ستاتيستيكادا 218 مىڭعا جەتكەن. دەگەنمەن ۇكىمەت كوروناۆيرۋس پەن ونىڭ پنەۆمونياسىن ەكى بولەك ەسەپتەيدى.

پاندەميا باستالعالى جالپى ۆيرۋس جۇققانداردىڭ 3914-ءى (كۆي+ / U07.1 – 2431, كۆي- / U07.2 – 545, ىلەسپە اۋرۋلاردان – 938) قايتىس بولعان. الايدا بيلىك  ناۋقاستىڭ بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەن 938  ادامدى جالپى ستاتيستيكاعا ەنگىزبەيدى.

"The Qazaq Times"