Körneki suret. Foto: centralasia.media

Qazaqstanda qañtar ayı bastalğalı 14,5 mıñnan astam nauqas, 135 ölim jağdayı tirkeldi. 17 qañtarda koronavirus jwqqan 1003 adam, 16 qañtarda koronavirus pnevmoniyasına şaldıqqan 17 adam anıqtalğan. Qazir elde 25 mıñğa tarta adam (U07.1 nemese KVI+ boyınşa 13 180, U07.2 nemese KVI- boyınşa 11 695) auırıp jatır. 

#U07.1 Koronavirus PTR testi arqılı tabılğan jaña keysterdiñ eñ köbi – Pavlodar (155), astana (125), Aqmola (99), Almatı qalası (97), Almatı (94), Qostanay (74), Atırau (71) oblıstarında. Ötken täulikte 468 adam auruınan ayğıp şığıp üyine jiberilgen, sonday-aq 8 adam ömirden ötken.

#U07.2  Aldıñğı küni, yağni qañtardıñ 16-sı koronavirus pnevmoniyasına jatatın 17 nauqas jäne 2 ölim jağdayı tirkelgen. 40 adam emdelip şıqqan.

#Jalpı  Täuliktik körsetkiş kün sayın artıp keledi. Qañtardıñ 13-inen beri täuligine wdayı 900-den kem emes keys anıqtalıp jatır. DenMin-niñ resmi mälimetinşe, emdelip jatqan 24 875 nauqastıñ 6570-i auruhanada, 18 305-i ambulatorlıq baqılauda. Ahualı naşar 294 nauqastıñ arasında 60 adamnıñ jağdayı qattı qiındağan. Jäne 40 sırqat ökpeni jasandı jeldetu apparatımen tınıstap jatır.

Ministrlik ötken ayda resmi habarlamanıñ formasın jañarttı. Onda auırıp jatqan balalar turalı aqparat alınıp tastalğan.

Aqparat ministrliginiñ coronavirus2020.kz saytı men Densaulıq saqtau ministrliginiñ aqparat resurstarında jariyalanğan derekter birneşe aydan beri qate berilip kelgeni jaylı materialdar jariyalap, aqparat qwraldarına eskertkenbiz. 26 jeltoqsannan bastap ministrlik kemşiligin moyındap, statistikanıñ merzimin körsetip jariyalauğa köşti.

Pandemiya moderatorı – ministrlik tek senbi-jeksenbide ğana emes, mereke künderi de statistikanı tolıqtay jürgizuge qauqarsız. Mäselen, jeltoqsan ayınıñ 1, 16, 17, 18-i jäne 19-ına, 1-4, 7 qañtarğa tiesili derekter eselep kemigen. Küzdiñ ortasında sol kezdegi DenMin-niñ resmi-erikti ökili Bağdat Qojahmetov ekinşi tolqında demalıs künine qaramastan statistikanı tolıq kölemde jürgizuge uäde bergen edi. Biraq is jüzinde olay bolmay şıqtı. 

The Qazaq Times redakciyası tömendegi kesteni eñ şınayı nwsqa dep sanaydı.

9 jeltoqsan densaulıq saqtau vice-ministri, bas memlekettik sanitar-därigeri Erlan Qiyasov Qazaqstanda koronavirus infekciyasın jwqtırudıñ şarıqtau kezeñin biıl qañtar jäne aqpan aylarına säykes keledi degen.

13 naurızdan beri COVID-19 infekciyasın jwqtırğandar qatarı 169 mıñnan, 1 tamızdan bergi koronavirus pnevmoniyası 46,5 mıñnan asqan. DDSW mälimetinşe, Qazaqstanda auırğandardıñ sanı 213 mıñğa jetse, al Wlttıq statistikada 216 mıñğa juıqtağan. Degenmen Ükimet koronavirus pen onıñ pnevmoniyasın eki bölek esepteydi. Halıqaralıq wyım tuıstas derttiñ qaupi birdey ekenine basa nazar audarsa da Qazaqstannıñ Densaulıq saqtau ministrligi koronavirus pen onıñ pnevmoniyalıq türine eki türli közqaraspen qaraydı. Onıñ anıq däleli – KVI+ diagnozı boyınşa jaña anıqtalğan nauqastar men qaytqandar, ayığıp şıqqandardıñ aymaqtardağı körsetkişi kündelikti jariyalanadı, al KVI- deregi tek jiıntıq mände beriledi. Koronavirus pnevmoniyasınıñ aymaqtarğa taraluı jönindegi esep ministr o basta aytqanday kündelikti ne aptasına emes, on künde bir ret, onıñ özinde vedomstvo saytına fayl formatında jüktelip keledi.

Äzirge virus taralu qateri jağınan astana, Aqmola, Pavlodar jäne Qostanay oblıstarı – qızıl, Almatı, SQO, BQO, Qarağandı öñirleri – sarı aymaqta twr. Qızıl aymaqqa engizilgen oblıstarğa qarağanda eki aptaday auru eñ köp tirkelgen Almatı qalasınıñ nelikten jasıl aymaqta qalğanı belgisiz.

Pandemiya bastalğalı jalpı virus jwqqandardıñ 3772-si (KVI+ / U07.1 – 2416, KVI- / U07.2 – 540, ilespe aurulardan – 816) qaytıs bolğan. Alayda Qazaqstan biligi boyınan koronavirus tabılsa da, basqa aurulardıñ sebebinen qaytıs boldı delingen 816 adamdı jalpı statistikağa qosıp eseptemeydi. Bwğan qarsı keybir sarapşılardıñ pikirine qarağanda, koronavirustıñ janama äserinen qaytqandardıñ jartısınan astamınıñ sebebi qan aynalımı jüyesiniñ auruları bolğandıqtan, oğan infekciya dert qozdıruşı faktor retinde ölimge äkep soqtırğan.

Qoğamda bıltırğı 256 mıñ pnevmoniya jağdayın esepke qospay, jalpı statistikanı «mausım-şilde qırğınan» keyin jürgize bastağan Ükimettiñ esebine kümänmen qaraytındar köbeygen.

Qazaqstan virus taraluı boyınşa älemde Worldometers derekqorı jäne DDSW tiziminde 51-şi orında twr.

"The Qazaq Times"