Bügin tañda Qazaqstanda parlament mäjilisi men jergilikti mäslihattar saylauına dauıs beru bastaldı. 10 qañtar küni jergilikti uaqıtpen tañerteñgi sağat 7.00 men keşki 20.00 aralığında eldegi barlıq saylau uçaskeleri dauıs beruşilerge aşıldı.

Ortalıq saylau komissiyasınıñ mälimetinşe, eldegi dauıs beruge qwqılı 11,8 mln saylauşı barlığı 10 mıñnan astam saylau uçaskesinde dauıs bere aladı. 66 uçaske 53 memlekettegi Qazaqstan ökildigi janınan qwrılğan.

Bwl jolğı kezekti parlament saylauı külli älemdi äbigerge salğan koronavirus pandemiyası kezinde ötip otır. Bas memlekettik sanitar därigerdiñ qaulısı boyınşa, saylau uçaskeleriniñ aldında adamdardıñ dene qızuı tekseriledi. Istığı bar adamdar (temperaturası 37 gradustan joğarı) saylau uçaskesindegi arnayı bölmede belgisiz baqılau jüyesinde dauıs beredi. Saylau procesine qatısatın komissiya müşeleri, partiyalardıñ senimdi ökilderi, baqılauşılar üşin olarda soñğı bes kün işinde PTR test tapsırğanı jäne koronavirustan aman ekeni turalı anıqtama boluı tiis.

Keybir baqılauşılar test tapsıru qiındağanın aytsa, endi biri negizsiz sebeptermen baqılau missisınan şettetilgen nemese tuıstarı arqılı ses körsetilgen. PTR sınamasın tapsırmağan atıraulıq belsendige «koronavirus anıqtalğanı» habarlanğan. Sonımen qosa, Almatı qalasınıñ Sanitarlıq epidemiologiyalıq qızmeti jüzdegen baqıluşıdan test alğan eki birdey zerthananıñ jwmısın zañsızdığın habarlap, nätijesin jaramsız dep tanığanın habarladı. Mwnday qisınsız äri kütpegen jağdaylar az emes tärizdi.

2 jeltoqsan küni Qazaqstan prezidenti Toqaev 2021 jıldıñ 10 qañtarında ötetin mäjilis jäne mäslihattar saylauın «aşıq äri ädil ötkizuge nietti» ekenin mälimdegen edi. Degenmen törağasınıñ «Kitaphanağa» jäne mäjilis deputattığınan dämeli Dariğa Nazarbaevağa tuıstıq jaqındığı bar Ortalıq saylau komissiyası 2019 jılğı prezident saylauınan keyin baqılauşılarğa qoyılatın talaptı küşeyte tüsti. Sonday-aq, atqaru organdarı tarapınan qısım  artqan.

Elde resmi tirkelgen altı partiyanıñ beseui: «Nwr Otan», «Aq jol», «Adal» (bwrınğı «Birlik»), «Auıl» jäne «Qazaqstan halıq partiyası» (bwrınğı «Qazaqstan kommunistik halıq partiyası») mäjilis saylauına 312 kandidat (90 äyel, 222 er adam) wsınğan. Kandidattardıñ ortaşa jası – 46,7. Bwl jolı parlament saylauına tüsip jatqandardıñ arasında qazirgi altınşı şaqırılımdağı mäjilistiñ 34 deputatı da bar.

“The Qazaq Times”