بۇگىن تاڭدا قازاقستاندا پارلامەنت ءماجىلىسى مەن جەرگىلىكتى ءماسليحاتتار سايلاۋىنا داۋىس بەرۋ باستالدى. 10 قاڭتار كۇنى جەرگىلىكتى ۋاقىتپەن تاڭەرتەڭگى ساعات 7.00 مەن كەشكى 20.00 ارالىعىندا ەلدەگى بارلىق سايلاۋ ۋچاسكەلەرى داۋىس بەرۋشىلەرگە اشىلدى.

ورتالىق سايلاۋ كوميسسياسىنىڭ مالىمەتىنشە، ەلدەگى داۋىس بەرۋگە قۇقىلى 11,8 ملن سايلاۋشى بارلىعى 10 مىڭنان استام سايلاۋ ۋچاسكەسىندە داۋىس بەرە الادى. 66 ۋچاسكە 53 مەملەكەتتەگى قازاقستان وكىلدىگى جانىنان قۇرىلعان.

بۇل جولعى كەزەكتى پارلامەنت سايلاۋى كۇللى الەمدى ابىگەرگە سالعان كوروناۆيرۋس پاندەمياسى كەزىندە ءوتىپ وتىر. باس مەملەكەتتىك سانيتار دارىگەردىڭ قاۋلىسى بويىنشا، سايلاۋ ۋچاسكەلەرىنىڭ الدىندا ادامداردىڭ دەنە قىزۋى تەكسەرىلەدى. ىستىعى بار ادامدار (تەمپەراتۋراسى 37 گرادۋستان جوعارى) سايلاۋ ۋچاسكەسىندەگى ارنايى بولمەدە بەلگىسىز باقىلاۋ جۇيەسىندە داۋىس بەرەدى. سايلاۋ پروتسەسىنە قاتىساتىن كوميسسيا مۇشەلەرى، پارتيالاردىڭ سەنىمدى وكىلدەرى، باقىلاۋشىلار ءۇشىن ولاردا سوڭعى بەس كۇن ىشىندە پتر تەست تاپسىرعانى جانە كوروناۆيرۋستان امان ەكەنى تۋرالى انىقتاما بولۋى ءتيىس.

كەيبىر باقىلاۋشىلار تەست تاپسىرۋ قيىنداعانىن ايتسا، ەندى ءبىرى نەگىزسىز سەبەپتەرمەن باقىلاۋ ميسسيسىنان شەتتەتىلگەن نەمەسە تۋىستارى ارقىلى سەس كورسەتىلگەن. پتر سىناماسىن تاپسىرماعان اتىراۋلىق بەلسەندىگە «كوروناۆيرۋس انىقتالعانى» حابارلانعان. سونىمەن قوسا، الماتى قالاسىنىڭ سانيتارلىق ەپيدەميولوگيالىق قىزمەتى جۇزدەگەن باقىلۋشىدان تەست العان ەكى بىردەي زەرتحانانىڭ جۇمىسىن زاڭسىزدىعىن حابارلاپ، ناتيجەسىن جارامسىز دەپ تانىعانىن حابارلادى. مۇنداي قيسىنسىز ءارى كۇتپەگەن جاعدايلار از ەمەس ءتارىزدى.

2 جەلتوقسان كۇنى قازاقستان پرەزيدەنتى توقاەۆ 2021 جىلدىڭ 10 قاڭتارىندا وتەتىن ءماجىلىس جانە ءماسليحاتتار سايلاۋىن «اشىق ءارى ءادىل وتكىزۋگە نيەتتى» ەكەنىن مالىمدەگەن ەدى. دەگەنمەن توراعاسىنىڭ «كىتاپحاناعا» جانە ءماجىلىس دەپۋتاتتىعىنان دامەلى داريعا نازارباەۆاعا تۋىستىق جاقىندىعى بار ورتالىق سايلاۋ كوميسسياسى 2019 جىلعى پرەزيدەنت سايلاۋىنان كەيىن باقىلاۋشىلارعا قويىلاتىن تالاپتى كۇشەيتە ءتۇستى. سونداي-اق، اتقارۋ ورگاندارى تاراپىنان قىسىم  ارتقان.

ەلدە رەسمي تىركەلگەن التى پارتيانىڭ بەسەۋى: «نۇر وتان»، «اق جول»، «ادال» (بۇرىنعى «بىرلىك»), «اۋىل» جانە «قازاقستان حالىق پارتياسى» (بۇرىنعى «قازاقستان كوممۋنيستىك حالىق پارتياسى») ءماجىلىس سايلاۋىنا 312 كانديدات (90 ايەل، 222 ەر ادام) ۇسىنعان. كانديداتتاردىڭ ورتاشا جاسى – 46,7. بۇل جولى پارلامەنت سايلاۋىنا ءتۇسىپ جاتقانداردىڭ اراسىندا قازىرگى التىنشى شاقىرىلىمداعى ءماجىلىستىڭ 34 دەپۋتاتى دا بار.

“The Qazaq Times”