QM mälimeti boyınşa Arıstağı äskeri arsenaldıñ 70%-ı örtengen. Qaru-jaraq qoymasında kem degende 40-50 märte jarılıs bolğan. 24 mausım 2019 jıl. Fotokollaj: QT (Qorğanıs ministri Nwrlan Ermekbaevtıñ fotoportreti Ortalıq kommunikaciya qızmetinen, Arıstağı jarılıstan keyingi körinis Reuters resursınan)

Arıstağı äskeri oq-däri qoyması jarılğalı bir jarım jıl ötti. Alayda ministr uäde etken oq-däriden tazartu operaciyası äli ayaqtalmağan.

Qorğanıs ministri Nwrlan Ermekbaev 22 jeltoqsanda Ortalıq kommunikaciya qızmetinde ötken brifingte redakciya tilşisiniñ oq-därini köşiru turalı swrağına:

«Biz oq-därilerdiñ negizgi böligin Arıstan alıp kettik. Biraq basqa qoymalardıñ jağdayı jetkilikti bolmağandıqtan, jwmıs uaqıtşa toqtadı. Eñ quattı, qauipti qaru-jaraqtar men oq-därilerdi özge qoymalarğa tarattıq. Qazir Arıs qalasındağı qoymalarda tek injenerlik oq-däriler qaldı. Bwlardan tönetin qauip joq. Basqa qoymalar dayın bolğan soñ jwmıs jalğasadı», – dep jauap berdi.

On jılda bir emes, tört märte jarılıp, onnan astam adamnıñ ölimine sebep bolğan  qoymadağı oq-däriniñ kölemi jaylı mälmetti ministr «qwpiya» degenimen, keşkisin jazbaşa jauap berdi. Mäseleniñ män-jayınan beyhabar bolğandıqtan «qwpiya» dey saldı ma, joq pa – ol jağı belgisiz.

Resmi derek boyınşa, 2019 jılı 5 şildede oq-därini köşiru jwmısı bastalğan. Sol kezde ministr Ermekbaev on ayda tolıq köşiruge uäde bergen:

«Jalpı, büginde naqtı keste bar. Oğan säykes, 28 mıñ tonna oq-däri şığaruımız qajet. Ol, şamamen, 817 vagon. Jospar boyınşa barlıq jwmıs 2020 jıldıñ mamırına deyin tolığımen ayaqtaladı»

Osı sözin eske salğanda «Bärin aldın ala bilu, ökinişke qaray, qiın. Biz osınday jospar jasağan kezde basqa qoymalardıñ tehnikalıq mümkindigin esepke aldıq» dedi ol. Ministr oq-därini tasımaldau barısında qauipsizdik mäselesine män bergenin aytıp, ağınan jarıldı. Ministrdiñ oq-däri kölemi men ayaqtau merzimi de özgerip sala berdi. Bastapqı jospardağıday 28 mıñ tonna emes, 32 053 tonnağa wlğayğan (817 vagon emes, 962 vagon) qaru-jaraqtı belgilengen on aydıñ ornına eki jılğa wzağanın köruge boladı.

Qorğanıs ministrligi baspasöz qızmetiniñ QT redakciyasına bergen resmi jauabında 19,7 mıñ tonna qaru-jaraq pen oq-däri tasımaldanğanı aytıladı. Dese de qalğan qordıñ tolıqtay qaşan köşiriletini naqtı emes. Minsitrlik dedlayn merzimin keyinnen habarlauğa söz berdi.

Qauipti sanalatın zımırandı-artilleriyalıq qaru-jaraqqa arnalğan 4095,14 tonna oq-däri tügel 53 vagonmen şığarılğan. Biraq 845 vagonğa jük bolatın 26,1 mıñ tonna injenerlik oq-däriniñ jartısınan säl astamı, yağni 14,4 mıñday tonnası (421 vagon) jäne qwrılğı jinaqtarı men oqu-jattığu därilerine jatatın 1858 tonnanıñ 1260 tonnası köşirilgen. Barlığı 32 mıñ tonna qarudıñ 19,7 mıñı ğana tasımaldanğan, qazir 12 308,26 tonnası (injenerlik oq-däriler – 11 710,26 tn./424 vagon, qwrılğı jinaqtarı men oqu-jattığu oq-därileri – 598 tn./32 vagon) Arısta qalıp otır. Bwdan özge oqiğa kezinde qanşa snaryad, oq-däri jäne qaru-jaraq atılğanı belgisiz.

«Qarulı küşterde qaru-jaraqtar men oq-därilerdiñ saqtaluına erekşe nazar audarıladı. Arıstağı oqiğadan keyin QR QK  qaru-jaraqtar pen oq-därilerdi saqtau ob'ektilerin jetildiru boyınşa keşendi jospar äzirlengen bolatın. Osı josparğa säykes barlıq qoymalar eldi mekenderden jetiklikti qaşıqtıqtıqta ornalasatın boladı. Olardıñ sanı men naqtı ornalasqan jeri taratuğa bolmaytın mälimet sanatına jatadı», – delingen resmi jauapta.

Bıltır, 2019 jılğı 24 mausımda 45 mıñ twrğını bar Arıstağı äskeri oq-däri qoymasında  alapat jarılıs bolğan. Saldarınan tört adam (ekeui – äskeri, bireui – beybit twrğın, bir bala evakuaciyalau kezinde jol apatınan mert boldı) qazağa wşıradı. Sonımen qosa, onmıñdağan adam üy-jayın tastap köşuge mäjbür bolıp, 7527 üy men 103 köpqabattı twrğın üy zaqımdanğan edi.

"The Qazaq Times"