Pandemiya twsındağı Almatı qalası. Foto: Alihan Sariev

Qazaqstanda 14 jeltoqsan 661 adam koronavirusqa, 13 jeltoqsan 22 adam koronavirus pnevmoniyasına şaldıqqanı anıqtalğan. Qazir elde 25,5 mıñ adam (U07.1 nemese KVI+ boyınşa 13 738, U07.2 nemese KVI- boyınşa 11 899) auırıp jatır. 

#U07.1 Koronavirus PTR testi arqılı tabılğan jaña keysterdiñ eñ köbi – Almatı (74), Qostanay (72), Pavlodar (71), SQO (70), Aqmola (68), ŞQO (60) oblıstarı. Ötken täulikte 914 adam auruınan ayğıp şığıp üyine jiberilgen, sonday-aq 7 adam ömirden ötken.

DenMin-niñ resmi mälimetinşe, emdelip jatqan 13 738 nauqastıñ 4187-si auruhanada. Tağı 21 450 adam ambulatorlıq terapiyada. Olardıñ arasında 1041 bala emdelip jatır. Qaraşanıñ soñğı dekadasınan beri auırıp jatqan balalar kürt köbeydi. 1 qırküyekten beri auırğan keminde 2539 oquşığa koronavirus  diagnozı qoyılğan.

Ahualı naşar 239 nauqastıñ arasında 37 adamnıñ jağdayı qattı qiındağan. Jäne 37 sırqat ökpeni jasandı jeldetu apparatımen tınıstap jatır.

#U07.2  Aldıñğı küni, yağni jeltoqsannıñ 13-i koronavirus pnevmoniyasına jatatın 22 keys jäne 2 ölim jağdayı tirkelgen. Oğan qosa, jeksenbi küni 90 adam emdelip şıqqan.

Qazaqstanda koronavirus pnevmoniyası («KVI-» – QT) bir künge keşigip jariyalanğanına qaramastan, «ötken täuliktegi» derek dep beriledi. Mısalı, düysenbi küni tañda koronavirus siyaqtı jeksenbiniñ emes, senbi künge tiesili mälimet beriledi. Biraq nege ekeni belgisiz «aldıñğı» dep berudiñ ornına resmi aqparattarda «ötken täulikte» dep jazıladı. Osığan deyin eldegi koronavirus jağdayı turalı resmi aqparat közi bolıp sanalatın coronavirus2020.kz saytı men Densaulıq saqtau ministrliginiñ aqparat resurstarında jariyalanğan derekter tört aydan beri qate berilip kelgeni jaylı wstanımımızdı bölisip, aqparat qwraldarına eskertkenbiz. Degenmen äli künge deyin keybir basılımdar eki künge tiesili derekti bir künge telip habarlap keledi.

The Qazaq Times redakciyası tömendegi kesteni eñ şınayı nwsqa dep sanaydı.

Astana «qızıl aymaqta» twr. Pavlodar, SQO, ŞQO, Qostanay, Aqmola, Atırau oblıstarı men Almatı qalasındağı epidemiya ahualı «sarı aymaqta». Basqa öñirler jasıl aymaqta.

9 jeltoqsan densaulıq saqtau vice-ministri, bas memlekettik sanitar-därigeri Erlan Qiyasov Qazaqstanda koronavirus infekciyasın jwqtırudıñ şarıqtau kezeñi turalı jaña boljamın bölisken. Onıñ aytuınşa, ekinşi tolqınnıñ şarıqtau kezeñi 2021 jıldıñ qañtar jäne aqpan aylarına säykes keledi.

13 naurızdan beri COVID-19 infekciyasın jwqtırğandar qatarı 143 mıñğa, 1 tamızdan bergi koronavirus pnevmoniyası 44 mıñğa juıqtağan. DDSW mälimetinşe, Qazaqstanda auırğandardıñ sanı 185,5 mıñğa, al Wlttıq statistikada 187 mıñğa jetken. Degenmen Ükimet koronavirus pen onıñ pnevmoniyasın eki bölek esepteydi. Pandemiya bastalğalı jalpı virus jwqqandardıñ 3327-si (KVI+ / U07.1 – 2152, KVI- / U07.2 – 466, ilespe aurulardan – 709) qaytıs bolğan. Alayda Qazaqstan biligi boyınan koronavirus tabılsa da, basqa aurulardıñ sebebinen qaytıs boldı delingen 709 adamdı jalpı statistikağa qosıp eseptemeydi. Sarapşılar bwğan qarsı. Olardıñ aytuınşa, koronavirustıñ janama äserinen qaytqandardıñ jartısınan astamınıñ sebebi qan aynalımı jüyesiniñ auruları bolğandıqtan, oğan infekciya dert qozdıruşı faktor retinde ölimge äkep soqtırğan.

Qoğamda biılğı 256 mıñ pnevmoniya jağdayın esepke qospay, jalpı statistikanı «mausım-şilde qırğınan» keyin jürgize bastağan Ükimettiñ esebine kümänmen qaraytındar köbeygen.

Qazaqstan virus taraluı boyınşa älemde Worldometers derekqorı jäne DDSW tiziminde 44-şi orında twr.

"The Qazaq Times"