پاندەميا تۇسىنداعى الماتى قالاسى. فوتو: اليحان ساريەۆ

قازاقستاندا 14 جەلتوقسان 661 ادام كوروناۆيرۋسقا، 13 جەلتوقسان 22 ادام كوروناۆيرۋس پنەۆمونياسىنا شالدىققانى انىقتالعان. قازىر ەلدە 25,5 مىڭ ادام (U07.1 نەمەسە كۆي+ بويىنشا 13 738, U07.2 نەمەسە كۆي- بويىنشا 11 899) اۋىرىپ جاتىر. 

#U07.1 كوروناۆيرۋس پتر تەستى ارقىلى تابىلعان جاڭا كەيستەردىڭ ەڭ كوبى – الماتى (74), قوستاناي (72), پاۆلودار (71), سقو (70), اقمولا (68), شقو (60) وبلىستارى. وتكەن تاۋلىكتە 914 ادام اۋرۋىنان ايعىپ شىعىپ ۇيىنە جىبەرىلگەن، سونداي-اق 7 ادام ومىردەن وتكەن.

دەنمين-ءنىڭ رەسمي مالىمەتىنشە, ەمدەلىپ جاتقان 13 738 ناۋقاستىڭ 4187-ءسى اۋرۋحانادا. تاعى 21 450 ادام امبۋلاتورلىق تەراپيادا. ولاردىڭ اراسىندا 1041 بالا ەمدەلىپ جاتىر. قاراشانىڭ سوڭعى دەكاداسىنان بەرى اۋىرىپ جاتقان بالالار كۇرت كوبەيدى. 1 قىركۇيەكتەن بەرى اۋىرعان كەمىندە 2539 وقۋشىعا كوروناۆيرۋس  دياگنوزى قويىلعان.

احۋالى ناشار 239 ناۋقاستىڭ اراسىندا 37 ادامنىڭ جاعدايى قاتتى قيىنداعان. جانە 37 سىرقات وكپەنى جاساندى جەلدەتۋ اپپاراتىمەن تىنىستاپ جاتىر.

#U07.2  الدىڭعى كۇنى، ياعني جەلتوقساننىڭ 13-ءى كوروناۆيرۋس پنەۆمونياسىنا جاتاتىن 22 كەيس جانە 2 ءولىم جاعدايى تىركەلگەن. وعان قوسا، جەكسەنبى كۇنى 90 ادام ەمدەلىپ شىققان.

قازاقستاندا كوروناۆيرۋس پنەۆمونياسى («كۆي-» – QT) ءبىر كۇنگە كەشىگىپ جاريالانعانىنا قاراماستان، «وتكەن تاۋلىكتەگى» دەرەك دەپ بەرىلەدى. مىسالى، دۇيسەنبى كۇنى تاڭدا كوروناۆيرۋس سياقتى جەكسەنبىنىڭ ەمەس، سەنبى كۇنگە تيەسىلى مالىمەت بەرىلەدى. بىراق نەگە ەكەنى بەلگىسىز «الدىڭعى» دەپ بەرۋدىڭ ورنىنا رەسمي اقپاراتتاردا «وتكەن تاۋلىكتە» دەپ جازىلادى. وسىعان دەيىن ەلدەگى كوروناۆيرۋس جاعدايى تۋرالى رەسمي اقپارات كوزى بولىپ سانالاتىن coronavirus2020.kz سايتى مەن دەنساۋلىق ساقتاۋ مينيسترلىگىنىڭ اقپارات رەسۋرستارىندا جاريالانعان دەرەكتەر ءتورت ايدان بەرى قاتە بەرىلىپ كەلگەنى جايلى ۇستانىمىمىزدى ءبولىسىپ، اقپارات قۇرالدارىنا ەسكەرتكەنبىز. دەگەنمەن ءالى كۇنگە دەيىن كەيبىر باسىلىمدار ەكى كۇنگە تيەسىلى دەرەكتى ءبىر كۇنگە تەلىپ حابارلاپ كەلەدى.

The Qazaq Times رەداكتسياسى تومەندەگى كەستەنى ەڭ شىنايى نۇسقا دەپ سانايدى.

استانا «قىزىل ايماقتا» تۇر. پاۆلودار، سقو، شقو، قوستاناي، اقمولا، اتىراۋ وبلىستارى مەن الماتى قالاسىنداعى ەپيدەميا احۋالى «سارى ايماقتا». باسقا وڭىرلەر جاسىل ايماقتا.

9 جەلتوقسان دەنساۋلىق ساقتاۋ ۆيتسە-ءمينيسترى، باس مەملەكەتتىك سانيتار-دارىگەرى ەرلان قياسوۆ قازاقستاندا كوروناۆيرۋس ينفەكتسياسىن جۇقتىرۋدىڭ شارىقتاۋ كەزەڭى تۋرالى جاڭا بولجامىن بولىسكەن. ونىڭ ايتۋىنشا، ەكىنشى تولقىننىڭ شارىقتاۋ كەزەڭى 2021 جىلدىڭ قاڭتار جانە اقپان ايلارىنا سايكەس كەلەدى.

13 ناۋرىزدان بەرى COVID-19 ينفەكتسياسىن جۇقتىرعاندار قاتارى 143 مىڭعا، 1 تامىزدان بەرگى كوروناۆيرۋس پنەۆمونياسى 44 مىڭعا جۋىقتاعان. ددسۇ مالىمەتىنشە، قازاقستاندا اۋىرعانداردىڭ سانى 185,5 مىڭعا، ال ۇلتتىق ستاتيستيكادا 187 مىڭعا جەتكەن. دەگەنمەن ۇكىمەت كوروناۆيرۋس پەن ونىڭ پنەۆمونياسىن ەكى بولەك ەسەپتەيدى. پاندەميا باستالعالى جالپى ۆيرۋس جۇققانداردىڭ 3327-ءسى (كۆي+ / U07.1 – 2152, كۆي- / U07.2 – 466, ىلەسپە اۋرۋلاردان – 709) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەن 709 ادامدى جالپى ستاتيستيكاعا قوسىپ ەسەپتەمەيدى. ساراپشىلار بۇعان قارسى. ولاردىڭ ايتۋىنشا، كوروناۆيرۋستىڭ جاناما اسەرىنەن قايتقانداردىڭ جارتىسىنان استامىنىڭ سەبەبى قان اينالىمى جۇيەسىنىڭ اۋرۋلارى بولعاندىقتان، وعان ينفەكتسيا دەرت قوزدىرۋشى فاكتور رەتىندە ولىمگە اكەپ سوقتىرعان.

قوعامدا بيىلعى 256 مىڭ پنەۆمونيا جاعدايىن ەسەپكە قوسپاي، جالپى ستاتيستيكانى «ماۋسىم-شىلدە قىرعىنان» كەيىن جۇرگىزە باستاعان ۇكىمەتتىڭ ەسەبىنە كۇمانمەن قارايتىندار كوبەيگەن.

قازاقستان ۆيرۋس تارالۋى بويىنشا الەمدە Worldometers دەرەكقورى جانە ددسۇ تىزىمىندە 44-ءشى ورىندا تۇر.

"The Qazaq Times"