Körneki suret. Foto: freepik.com

Qazaqstanda 6 jeltoqsan küni 712 adamnan koronavirus, al ötken senbide 33 adamnan koronavirus pnevmoniyası anıqtaldı. Qazirgi tañda 25,8 mıñ (KVI+ 14 096, KVI- 11 696) adam auırıp jatır. KVI- yağni koronavirus pnevmoniyasına şaldıqqandardıñ esebi bir künde 6 esege kemui – jağdaydıñ jaqsarğanın emes, densaulıq saqtau ministrliginiñ 48 sağatqa sozılatın «qalıñ wyqığa» batqanın körsetedi. 

#Koronavirus Jeltoqsannıñ 6-sı koronavirus jwqtırğan 621 adam ayığıp şıqsa, 9 adam ömirden ötken. Jañadan tirkelgen nauqastardıñ eñ köbi – Pavlodar (106), ŞQO (100), Qostanay (77), SQO (68) oblıstarı jäne Almatı qalası men astanada (ärqaysında 67-den). Respublikanıñ barlıq öñirinen anıqtalğan.

DenMin-niñ resmi mälimetinşe, emdelip jatqan 14 096 nauqastıñ 3687-si auruhanada. Tağı 10 409 adam ambulatorlıq terapiyada. Olardıñ arasında 1010 bala emdelip jatır. Qaraşanıñ soñğı dekadasında auırıp jatqan balalar kürt köbeydi. 1 qırküyekten beri auırğan keminde 1741 oquşığa KVI+, 1 mıñ balağa KVI- diagnozı qoyılğan.

Ahualı naşar 241 nauqastıñ arasında 39 adamnıñ jağdayı qattı qiındağan. Jäne 33 sırqat ökpeni jasandı jeldetu apparatımen tınıstap jatır.

Respublika boyınşa barlığı 137 mıñğa tarta adam koronavirus infekciyasın jwqtırsa, emdelip jazılğandarı – 120 mıñnan asadı. Bwl jalpı nauqastardıñ 90%-ğa juığı. Qazan ayınıñ ortasınan beri elde koronavirus qayta ekpin ala bastadı. Sonımen qosa, prezident Toqaev 16 qaraşa küngi mälimdemesinde soltüstik jäne şığıs aymaqtarda statistikanıñ kemitilip-bwrmalanğanın aytqan. Redakciya Pavlodar oblısında 59, Qostanay öñirinde 57, Aqmolada 100, SQO-da 200, ŞQO-da 300 jağdaydıñ jasırılğanın anıqtağan.

#Koronavirus_pnevmoniyası Sonday-aq, senbi küni koronavirus pnevmoniyasına şaldıqqan 33 adam tirkelgen. Pnevmoniyağa şaldıqqan 43 mıñ adamnıñ 31 mıñğa juığı jazılıp şıqqan.

Jwma küni 193, senbide 33 nauqas anıqtaldı. DenMin ökiliniñ aytuına qarağanda, düysenbi jäne seysenbi künderi demalıs küngi, yağni senbi men jeksenbidegi mälimet beriledi. KVI+ jağdayın ötken täuliktiñ erteñine jüyelep jariyalau jolğa qoyılğanımen, KVI-  turalı mälimet eki künge keşiktirilip jinaqtaladı. Düysenbi deregi särsenbide bir-aq beriledi. Sondıqtan «ötken küni» dep jazılatın resmi aqparat kümändi. Sebebi vedomstvonıñ baspasöz qızmeti eki kün bwrınğı derekti «ötken küngi» dep jariyalaydı. Apta sayın eki küngi körsetkiş tömendep sala beredi. Ministrlik mwnı medicina wyımdarı men vedomstvoda demalıs küni ekendigimen tüsindiredi. Statistikadağı kemşilikti, prezident tapsırmasındağıday birizdilik pen ob'ektivtiliktiñ saqtalmaytını jöninde redakciya tarapı DenMin ökilderine (baspasöz hatşısı Äsel Artıqşinovadan vice-ministr Ajar Ğiniyatqızına deyin) üş ay boyı keminde 10 märte eskertip, tüsindirdi de. Alayda jauaptı şeneunikterdiñ qatesin tüzeter oyı joq. Qazan ayınıñ ortasında ministrlik ekinşi tolqın kezinde demalıs ne mereke künine qaramastan tolıq ştattıq deñgeyde jwmıs isteytinin mälimdegen. Öñirler är küni ärtürli tüske boyalıp jatqanda pandemiya moderatorı jügin arqalağan vedomstvonıñ bwl uädesi tağı da orındausız qaldı.

DDSW tuıstas derttiñ qaupi birdey ekenine basa nazar audarsa da Qazaqstannıñ Densaulıq saqtau ministrligi koronavirus pen onıñ pnevmoniyalıq türine eki türli közqaraspen qaraydı. Onıñ anıq däleli – KVI+ turalı aqparattıq indikatorlar (aymaqtarğa taraluı, nauqastardıñ ahualı, onıñ işindegi stacionar men ambulatorlıq baqılaudağılar sanı, balalar sanı, ÖJJA-men tınıstap jatqandar, ayıqqandar, jaña keyster, qaytqandar) kündelikti jariyalansa, al KVI- deregi soñğı üş körsetkişten özge mälimet berilmeydi. Qazir koronavirus pnevmoniyasınıñ aymaqtarğa taraluı jönindegi deregi ministr äu basta aytqanday kündelikti ne aptasına emes, endi on künde bir-aq beriledi. Onıñ özinde qwjat formatında saytqa jükteledi, vedomstvo resurstarında aşıq äri tüsinikti jariyalanbaydı.Qoğamda biılğı 256 mıñ pnevmoniya jağdayın esepke qospay, jalpı statistikanı şildedegi qırğınnan keyin jürgize bastağan Ükimettiñ esebine kümänmen qaraytındar köbeygen.

#Söytse... Bir jarım aydan beri epidemiya ahualı uşığıp twrğan ŞQO-dağı jwqtırğandar sanı 25 mıñnan astı. Ekinşi qatarda astana (22 mıñ), odan keyin Almatı qalası (21 mıñ) oblıstarı ornalasqan.Qazaqstanda koronavirus ölimi azaymay twr. 1 qırküyekten 1 jeltoqsanğa deyin, biılğı küzde Qazaqstanda 43 mıñday adam indetke şaldığıp, 600 adam qaytıs bolğan (KVI+ 26 476 keys, 447 ölim / KVI- 16 491 key, 151 ölim).

Ötken qaraşa ayında 24 mıñnan astam adam auırğan jäne 230-day adam ömirden ötken. Bwl qazan ayında tirkelgen tolıq jiıntıqtan da köp. Resmi derekke säykes, qazan ayında 9,5 mıñday qazaqstandıq auırğan (4439 adam KVI+ / 4984 adam KVI-) jäne 165 adam ömirden ötken (118 adam KVI+ / 47 adam KVI-). 

Osılayşa birinşi tolqınnıñ şarıqtau şegi – «mausım-şilde qırğınan» keyingi tamız ayınan beri Qazaqstanda dert jwqtırıp auırğandar 120 mıñğa juıqtadı. Osı tört aydıñ işinde indetten 1,4 mıñ adam ömirden ötken.

Pnevmoniyanıñ koronavirustan basqa türlerine şaldıqqandar sanı 358 mıñğa jetken. Jiıntıq esebi, 13 naurızdan beri COVID-19 infekciyasın jwqtırğandar qatarı 137 mıñğa jaqındap, 1 tamızdan bergi koronavirus pnevmoniyası 43 mıñnan asqan. DDSW mälimetinşe, Qazaqstanda auırğandardıñ sanı 180 mıñğa jetken. Degenmen Ükimet koronavirus pen onıñ pnevmoniyasın eki bölek esepteydi. Pandemiya bastalğalı jalpı virus jwqqandardıñ 3251-i (KVI+ / U07.1 – 2088, KVI- / U07.2 – 454, ilespe aurulardan – 709) qaytıs bolğan. Alayda Qazaqstan biligi boyınan koronavirus tabılsa da, basqa aurulardıñ sebebinen qaytıs boldı delingen 709 adamdı jalpı statistikağa qosıp eseptemeydi. Sarapşılar bwğan qarsı. Olardıñ aytuınşa, koronavirustıñ janama äserinen qaytqandardıñ jartısınan astamınıñ sebebi qan aynalımı jüyesiniñ auruları bolğandıqtan, oğan infekciya dert qozdıruşı faktor retinde ölimge äkep soqtırğan.

27 qaraşadağı ahualğa bağa bergen ministr Aleksey Coydıñ sözinşe, ötken aymen salıstırğanda jwqqandar sanı 3,7 ese ösken Qazaqstandağı jağday «ortaşa qauipti» deñgeyde. Bügingi tañda auru jwqtıru qateri jağınan SQO, Palodar, Qostanay jäne Aqmola oblıstarı qızıl, al astana, ŞQO, Atırau oblıstarı sarı, özge on öñir jasıl aymaqta.

"The Qazaq Times"