كورنەكى سۋرەت. فوتو: freepik.com

قازاقستاندا 6 جەلتوقسان كۇنى 712 ادامنان كوروناۆيرۋس، ال وتكەن سەنبىدە 33 ادامنان كوروناۆيرۋس پنەۆمونياسى انىقتالدى. قازىرگى تاڭدا 25,8 مىڭ (كۆي+ 14 096, كۆي- 11 696) ادام اۋىرىپ جاتىر. كۆي- ياعني كوروناۆيرۋس پنەۆمونياسىنا شالدىققانداردىڭ ەسەبى ءبىر كۇندە 6 ەسەگە كەمۋى – جاعدايدىڭ جاقسارعانىن ەمەس، دەنساۋلىق ساقتاۋ مينيسترلىگىنىڭ 48 ساعاتقا سوزىلاتىن «قالىڭ ۇيقىعا» باتقانىن كورسەتەدى. 

#كوروناۆيرۋس جەلتوقساننىڭ 6-سى كوروناۆيرۋس جۇقتىرعان 621 ادام ايىعىپ شىقسا, 9 ادام ومىردەن وتكەن. جاڭادان تىركەلگەن ناۋقاستاردىڭ ەڭ كوبى – پاۆلودار (106), شقو (100), قوستاناي (77), سقو (68) وبلىستارى جانە الماتى قالاسى مەن استانادا (ارقايسىندا 67-دەن). رەسپۋبليكانىڭ بارلىق وڭىرىنەن انىقتالعان.

دەنمين-ءنىڭ رەسمي مالىمەتىنشە, ەمدەلىپ جاتقان 14 096 ناۋقاستىڭ 3687-ءسى اۋرۋحانادا. تاعى 10 409 ادام امبۋلاتورلىق تەراپيادا. ولاردىڭ اراسىندا 1010 بالا ەمدەلىپ جاتىر. قاراشانىڭ سوڭعى دەكاداسىندا اۋىرىپ جاتقان بالالار كۇرت كوبەيدى. 1 قىركۇيەكتەن بەرى اۋىرعان كەمىندە 1741 وقۋشىعا كۆي+, 1 مىڭ بالاعا كۆي- دياگنوزى قويىلعان.

احۋالى ناشار 241 ناۋقاستىڭ اراسىندا 39 ادامنىڭ جاعدايى قاتتى قيىنداعان. جانە 33 سىرقات وكپەنى جاساندى جەلدەتۋ اپپاراتىمەن تىنىستاپ جاتىر.

رەسپۋبليكا بويىنشا بارلىعى 137 مىڭعا تارتا ادام كوروناۆيرۋس ينفەكتسياسىن جۇقتىرسا، ەمدەلىپ جازىلعاندارى – 120 مىڭنان اسادى. بۇل جالپى ناۋقاستاردىڭ 90%-عا جۋىعى. قازان ايىنىڭ ورتاسىنان بەرى ەلدە كوروناۆيرۋس قايتا ەكپىن الا باستادى. سونىمەن قوسا، پرەزيدەنت توقاەۆ 16 قاراشا كۇنگى مالىمدەمەسىندە سولتۇستىك جانە شىعىس ايماقتاردا ستاتيستيكانىڭ كەمىتىلىپ-بۇرمالانعانىن ايتقان. رەداكتسيا پاۆلودار وبلىسىندا 59, قوستاناي وڭىرىندە 57, اقمولادا 100, سقو-دا 200, شقو-دا 300 جاعدايدىڭ جاسىرىلعانىن انىقتاعان.

#كوروناۆيرۋس_پنەۆمونياسى سونداي-اق، سەنبى كۇنى كوروناۆيرۋس پنەۆمونياسىنا شالدىققان 33 ادام تىركەلگەن. پنەۆمونياعا شالدىققان 43 مىڭ ادامنىڭ 31 مىڭعا جۋىعى جازىلىپ شىققان.

جۇما كۇنى 193, سەنبىدە 33 ناۋقاس انىقتالدى. دەنمين وكىلىنىڭ ايتۋىنا قاراعاندا، دۇيسەنبى جانە سەيسەنبى كۇندەرى دەمالىس كۇنگى، ياعني سەنبى مەن جەكسەنبىدەگى مالىمەت بەرىلەدى. كۆي+ جاعدايىن وتكەن تاۋلىكتىڭ ەرتەڭىنە جۇيەلەپ جاريالاۋ جولعا قويىلعانىمەن، كۆي-  تۋرالى مالىمەت ەكى كۇنگە كەشىكتىرىلىپ جيناقتالادى. دۇيسەنبى دەرەگى سارسەنبىدە ءبىر-اق بەرىلەدى. سوندىقتان «وتكەن كۇنى» دەپ جازىلاتىن رەسمي اقپارات كۇماندى. سەبەبى ۆەدومستۆونىڭ ءباسپاسوز قىزمەتى ەكى كۇن بۇرىنعى دەرەكتى «وتكەن كۇنگى» دەپ جاريالايدى. اپتا سايىن ەكى كۇنگى كورسەتكىش تومەندەپ سالا بەرەدى. مينيسترلىك مۇنى مەديتسينا ۇيىمدارى مەن ۆەدومستۆودا دەمالىس كۇنى ەكەندىگىمەن تۇسىندىرەدى. ستاتيستيكاداعى كەمشىلىكتى، پرەزيدەنت تاپسىرماسىنداعىداي بىرىزدىلىك پەن وبەكتيۆتىلىكتىڭ ساقتالمايتىنى جونىندە رەداكتسيا تاراپى دەنمين وكىلدەرىنە ء(باسپاسوز حاتشىسى اسەل ارتىقشينوۆادان ۆيتسە-مينيستر اجار عينياتقىزىنا دەيىن) ءۇش اي بويى كەمىندە 10 مارتە ەسكەرتىپ، ءتۇسىندىردى دە. الايدا جاۋاپتى شەنەۋنىكتەردىڭ قاتەسىن تۇزەتەر ويى جوق. قازان ايىنىڭ ورتاسىندا مينيسترلىك ەكىنشى تولقىن كەزىندە دەمالىس نە مەرەكە كۇنىنە قاراماستان تولىق شتاتتىق دەڭگەيدە جۇمىس ىستەيتىنىن مالىمدەگەن. وڭىرلەر ءار كۇنى ءارتۇرلى تۇسكە بويالىپ جاتقاندا پاندەميا مودەراتورى جۇگىن ارقالاعان ۆەدومستۆونىڭ بۇل ۋادەسى تاعى دا ورىنداۋسىز قالدى.

ددسۇ تۋىستاس دەرتتىڭ قاۋپى بىردەي ەكەنىنە باسا نازار اۋدارسا دا قازاقستاننىڭ دەنساۋلىق ساقتاۋ مينيسترلىگى كوروناۆيرۋس پەن ونىڭ پنەۆمونيالىق تۇرىنە ەكى ءتۇرلى كوزقاراسپەن قارايدى. ونىڭ انىق دالەلى – كۆي+ تۋرالى اقپاراتتىق ينديكاتورلار (ايماقتارعا تارالۋى، ناۋقاستاردىڭ احۋالى، ونىڭ ىشىندەگى ستاتسيونار مەن امبۋلاتورلىق باقىلاۋداعىلار سانى، بالالار سانى، ءوججا-مەن تىنىستاپ جاتقاندار، ايىققاندار، جاڭا كەيستەر، قايتقاندار) كۇندەلىكتى جاريالانسا، ال كۆي- دەرەگى سوڭعى ءۇش كورسەتكىشتەن وزگە مالىمەت بەرىلمەيدى. قازىر كوروناۆيرۋس پنەۆمونياسىنىڭ ايماقتارعا تارالۋى جونىندەگى دەرەگى مينيستر ءاۋ باستا ايتقانداي كۇندەلىكتى نە اپتاسىنا ەمەس، ەندى ون كۇندە ءبىر-اق بەرىلەدى. ونىڭ وزىندە قۇجات فورماتىندا سايتقا جۇكتەلەدى، ۆەدومستۆو رەسۋرستارىندا اشىق ءارى تۇسىنىكتى جاريالانبايدى.قوعامدا بيىلعى 256 مىڭ پنەۆمونيا جاعدايىن ەسەپكە قوسپاي، جالپى ستاتيستيكانى شىلدەدەگى قىرعىننان كەيىن جۇرگىزە باستاعان ۇكىمەتتىڭ ەسەبىنە كۇمانمەن قارايتىندار كوبەيگەن.

#سويتسە... ءبىر جارىم ايدان بەرى ەپيدەميا احۋالى ۋشىعىپ تۇرعان شقو-داعى جۇقتىرعاندار سانى 25 مىڭنان استى. ەكىنشى قاتاردا استانا (22 مىڭ), ودان كەيىن الماتى قالاسى (21 مىڭ) وبلىستارى ورنالاسقان.قازاقستاندا كوروناۆيرۋس ءولىمى ازايماي تۇر. 1 قىركۇيەكتەن 1 جەلتوقسانعا دەيىن، بيىلعى كۇزدە قازاقستاندا 43 مىڭداي ادام ىندەتكە شالدىعىپ، 600 ادام قايتىس بولعان (كۆي+ 26 476 كەيس، 447 ءولىم / كۆي- 16 491 كەي، 151 ءولىم).

وتكەن قاراشا ايىندا 24 مىڭنان استام ادام اۋىرعان جانە 230-داي ادام ومىردەن وتكەن. بۇل قازان ايىندا تىركەلگەن تولىق جيىنتىقتان دا كوپ. رەسمي دەرەككە سايكەس، قازان ايىندا 9,5 مىڭداي قازاقستاندىق اۋىرعان (4439 ادام كۆي+ / 4984 ادام كۆي-) جانە 165 ادام ومىردەن وتكەن (118 ادام كۆي+ / 47 ادام كۆي-). 

وسىلايشا ءبىرىنشى تولقىننىڭ شارىقتاۋ شەگى – «ماۋسىم-شىلدە قىرعىنان» كەيىنگى تامىز ايىنان بەرى قازاقستاندا دەرت جۇقتىرىپ اۋىرعاندار 120 مىڭعا جۋىقتادى. وسى ءتورت ايدىڭ ىشىندە ىندەتتەن 1,4 مىڭ ادام ومىردەن وتكەن.

پنەۆمونيانىڭ كوروناۆيرۋستان باسقا تۇرلەرىنە شالدىققاندار سانى 358 مىڭعا جەتكەن. جيىنتىق ەسەبى، 13 ناۋرىزدان بەرى COVID-19 ينفەكتسياسىن جۇقتىرعاندار قاتارى 137 مىڭعا جاقىنداپ، 1 تامىزدان بەرگى كوروناۆيرۋس پنەۆمونياسى 43 مىڭنان اسقان. ددسۇ مالىمەتىنشە، قازاقستاندا اۋىرعانداردىڭ سانى 180 مىڭعا جەتكەن. دەگەنمەن ۇكىمەت كوروناۆيرۋس پەن ونىڭ پنەۆمونياسىن ەكى بولەك ەسەپتەيدى. پاندەميا باستالعالى جالپى ۆيرۋس جۇققانداردىڭ 3251-ءى (كۆي+ / U07.1 – 2088, كۆي- / U07.2 – 454, ىلەسپە اۋرۋلاردان – 709) قايتىس بولعان. الايدا قازاقستان بيلىگى بويىنان كوروناۆيرۋس تابىلسا دا، باسقا اۋرۋلاردىڭ سەبەبىنەن قايتىس بولدى دەلىنگەن 709 ادامدى جالپى ستاتيستيكاعا قوسىپ ەسەپتەمەيدى. ساراپشىلار بۇعان قارسى. ولاردىڭ ايتۋىنشا، كوروناۆيرۋستىڭ جاناما اسەرىنەن قايتقانداردىڭ جارتىسىنان استامىنىڭ سەبەبى قان اينالىمى جۇيەسىنىڭ اۋرۋلارى بولعاندىقتان، وعان ينفەكتسيا دەرت قوزدىرۋشى فاكتور رەتىندە ولىمگە اكەپ سوقتىرعان.

27 قاراشاداعى احۋالعا باعا بەرگەن مينيستر الەكسەي تسويدىڭ سوزىنشە، وتكەن ايمەن سالىستىرعاندا جۇققاندار سانى 3,7 ەسە وسكەن قازاقستانداعى جاعداي «ورتاشا قاۋىپتى» دەڭگەيدە. بۇگىنگى تاڭدا اۋرۋ جۇقتىرۋ قاتەرى جاعىنان سقو، پالودار، قوستاناي جانە اقمولا وبلىستارى قىزىل، ال استانا، شقو، اتىراۋ وبلىستارى سارى، وزگە ون ءوڭىر جاسىل ايماقتا.

"The Qazaq Times"