Qostanay oblısınıñ äkimi Arhimed Mwhambetov. Foto: OrtKomQız

Beysenbi, 26 qaraşa astanadağı OKQ brifinginde Qostanay oblısınıñ äkimi Arhimed Mwhambetov PTR testi arqılı koronavirus jwqqanı anıqtalğan 50 şaqtı adamnıñ deregi uaqtılı tirkelmegenin mälimdedi.

Biraq äkim bwl eseptiñ özgerui mümkin ekenin aytadı. Dese de naqtı qay uaqıtqa tiesili ekeni anıq emes. Birdi aytıp, birge ketken Mwhambetov qoyılğan swraqqa naqtılap jauap bermedi.

Aymaq äkimi bir adamnıñ sınaması boyınşa zerthanalar men medicina mekemeleri eki türli qorıtındı körsetkenin habarladı. Sonımen qosa, jauaptılar PTR testiniñ nätijesine säykes äzirlengen mälimetti keştetip ötkizgen.

Aymaq basşısınıñ aytuınşa, büginge deyin 5 mıñğa tarta adamnan koronavirus anıqtalğan. Mwnıñ besten biri, yağni 1334-i qaraşa ayına tiesili. Sol sebepti de 9 qaraşadan beri öñir virus jwqtıru qateri joğarı «qızıl aymaq» sanatına engizilgen. 19 qazannan bastap sanitarlıq blok-beketter ornatılıp, artınan karantin küşeygen öñirde ahual äli de jaqsara qoyğan joq.

«Biılğı joğarı tehnologiyalıq medicinalıq jabdıqtarmen (komp'yuterlik tomograf, cifrlıq rentgen) jabdıqtalğan 200 tösektik infekciyalıq ortalıq salınıp, jwmısın bastadı, barlıq tösekterge ottegi konsol'deri jetkizildi. …Densaulıq saqtau salasın damıtuğa 1,5 ese ösimmen 78,1 mlrd. teñge bölindi. Qazirgi tañda 19 stacionarda 967 tösek-orın bar. Qajet bolsa mwnı 3 mıñğa deyin arttıra alamız. Sonday-aq, 939 ottegi közi, 642 ottegi koncentratorı bar», – dedi sandardı sudıratqan Mwhambetov.

Därihanalardı därilik preparattarmen qamtamasız etu maqsatında 538 mln teñge jwmsalğanın, 10 jıljımalı medicinalıq keşen satıp alınğanın söz etti. Öñirde eki ayğa jeterliktey däri-därmek pen qorğanıs qwraldarı barına sendiruge tırıstı.

16 qaraşa küni prezident Toqaev «Birqatar oblıstarda  koronavirus indetine qatıstı jaña jağdaylardı jasıru derekteri anıqtalğanın» mälimdegen. Prezidenttiñ aytuınşa, statistikanı bwrmalau faktisiniñ ŞQO, SQO, Pavlodar,  Aqmola,  Qostanay oblıstarında tirkelgen, tipti «atalğan problemanıñ bizdiñ densaulıq saqtau jüyemizde de sozılmalı sipat alğanın moyındau kerek».

Komitet törağası Ayjan Esmağambetovanıñ redakciyağa bergen pikirine qarağanda, kadr tapşılığınan jükteme auırlap, derek der kezinde öñdelip-joldanbağan.

Auruhanalarda nauqastar artqan twsta virus anıqtalğandardıñ mälimetin wsınu procesi keşiktirilgen. Sol sebepti resmi statistikağa uaqtılı tirkelmegen jağdaylardıñ köbeygen körinedi. Bwl «mamannıñ jetispeuşiliginiñ saldarınan, därigerler birinşi orında emdeumen aynalısqandıqtan, qwjattamamen jwmıs biraz bögelgen» dep tüsindiredi.

Däl osığan wqsas jağday Pavlodar oblısında da bolğan. Bügin astanada jurnalisterdiñ swrağına jauap berip, keyinnen prezident Toqaevtıñ qabıldauına kirgen Äbilqayır Sqaqov ta öñirde  virus jwqqanı qazan ayındarastalğan 59 nauqastıñ mälimeti jalpı esepke enbey qalğanın habarlağan.

Bwğan deyin Densaulıq saqtau ministriligi küzgi-qısqı tolqınğa «tas-tüyin», tipti 100% payız dayın ekenin bir emes, birneşe ret mälimdegen. Biraq bügingi tañda test qorıtındısı dauğa aynalıp, onı derekqorğa tirkeu mehanizminde aqau tuğanı belgili bolıp otır.

"The Qazaq Times"