بەيسەنبى، 26 قاراشا استاناداعى وكق بريفينگىندە قوستاناي وبلىسىنىڭ اكىمى ارحيمەد مۇحامبەتوۆ پتر تەستى ارقىلى كوروناۆيرۋس جۇققانى انىقتالعان 50 شاقتى ادامنىڭ دەرەگى ۋاقتىلى تىركەلمەگەنىن مالىمدەدى.
بىراق اكىم بۇل ەسەپتىڭ وزگەرۋى مۇمكىن ەكەنىن ايتادى. دەسە دە ناقتى قاي ۋاقىتقا تيەسىلى ەكەنى انىق ەمەس. ءبىردى ايتىپ، بىرگە كەتكەن مۇحامبەتوۆ قويىلعان سۇراققا ناقتىلاپ جاۋاپ بەرمەدى.
ايماق اكىمى ءبىر ادامنىڭ سىناماسى بويىنشا زەرتحانالار مەن مەديتسينا مەكەمەلەرى ەكى ءتۇرلى قورىتىندى كورسەتكەنىن حابارلادى. سونىمەن قوسا، جاۋاپتىلار پتر تەستىنىڭ ناتيجەسىنە سايكەس ازىرلەنگەن مالىمەتتى كەشتەتىپ وتكىزگەن.
ايماق باسشىسىنىڭ ايتۋىنشا، بۇگىنگە دەيىن 5 مىڭعا تارتا ادامنان كوروناۆيرۋس انىقتالعان. مۇنىڭ بەستەن ءبىرى، ياعني 1334-ءى قاراشا ايىنا تيەسىلى. سول سەبەپتى دە 9 قاراشادان بەرى ءوڭىر ۆيرۋس جۇقتىرۋ قاتەرى جوعارى «قىزىل ايماق» ساناتىنا ەنگىزىلگەن. 19 قازاننان باستاپ سانيتارلىق بلوك-بەكەتتەر ورناتىلىپ، ارتىنان كارانتين كۇشەيگەن وڭىردە احۋال ءالى دە جاقسارا قويعان جوق.
«بيىلعى جوعارى تەحنولوگيالىق مەديتسينالىق جابدىقتارمەن (كومپيۋتەرلىك توموگراف، تسيفرلىق رەنتگەن) جابدىقتالعان 200 توسەكتىك ينفەكتسيالىق ورتالىق سالىنىپ، جۇمىسىن باستادى، بارلىق توسەكتەرگە وتتەگى كونسولدەرى جەتكىزىلدى. …دەنساۋلىق ساقتاۋ سالاسىن دامىتۋعا 1,5 ەسە وسىممەن 78,1 ملرد. تەڭگە ءبولىندى. قازىرگى تاڭدا 19 ستاتسيوناردا 967 توسەك-ورىن بار. قاجەت بولسا مۇنى 3 مىڭعا دەيىن ارتتىرا الامىز. سونداي-اق، 939 وتتەگى كوزى، 642 وتتەگى كونتسەنتراتورى بار»، – دەدى سانداردى سۋدىراتقان مۇحامبەتوۆ.
ءدارىحانالاردى دارىلىك پرەپاراتتارمەن قامتاماسىز ەتۋ ماقساتىندا 538 ملن تەڭگە جۇمسالعانىن، 10 جىلجىمالى مەديتسينالىق كەشەن ساتىپ الىنعانىن ءسوز ەتتى. وڭىردە ەكى ايعا جەتەرلىكتەي ءدارى-دارمەك پەن قورعانىس قۇرالدارى بارىنا سەندىرۋگە تىرىستى.
16 قاراشا كۇنى پرەزيدەنت توقاەۆ «بىرقاتار وبلىستاردا كوروناۆيرۋس ىندەتىنە قاتىستى جاڭا جاعدايلاردى جاسىرۋ دەرەكتەرى انىقتالعانىن» مالىمدەگەن. پرەزيدەنتتىڭ ايتۋىنشا، ستاتيستيكانى بۇرمالاۋ فاكتىسىنىڭ شقو، سقو، پاۆلودار، اقمولا، قوستاناي وبلىستارىندا تىركەلگەن، ءتىپتى «اتالعان پروبلەمانىڭ ءبىزدىڭ دەنساۋلىق ساقتاۋ جۇيەمىزدە دە سوزىلمالى سيپات العانىن مويىنداۋ كەرەك».
كوميتەت توراعاسى ايجان ەسماعامبەتوۆانىڭ رەداكتسياعا بەرگەن پىكىرىنە قاراعاندا، كادر تاپشىلىعىنان جۇكتەمە اۋىرلاپ، دەرەك دەر كەزىندە وڭدەلىپ-جولدانباعان.
اۋرۋحانالاردا ناۋقاستار ارتقان تۇستا ۆيرۋس انىقتالعانداردىڭ مالىمەتىن ۇسىنۋ پروتسەسى كەشىكتىرىلگەن. سول سەبەپتى رەسمي ستاتيستيكاعا ۋاقتىلى تىركەلمەگەن جاعدايلاردىڭ كوبەيگەن كورىنەدى. بۇل «ماماننىڭ جەتىسپەۋشىلىگىنىڭ سالدارىنان، دارىگەرلەر ءبىرىنشى ورىندا ەمدەۋمەن اينالىسقاندىقتان، قۇجاتتامامەن جۇمىس ءبىراز بوگەلگەن» دەپ تۇسىندىرەدى.
ءدال وسىعان ۇقساس جاعداي پاۆلودار وبلىسىندا دا بولعان. بۇگىن استانادا جۋرناليستەردىڭ سۇراعىنا جاۋاپ بەرىپ، كەيىننەن پرەزيدەنت توقاەۆتىڭ قابىلداۋىنا كىرگەن ابىلقايىر سقاقوۆ تا وڭىردە ۆيرۋس جۇققانى قازان ايىنداراستالعان 59 ناۋقاستىڭ مالىمەتى جالپى ەسەپكە ەنبەي قالعانىن حابارلاعان.
بۇعان دەيىن دەنساۋلىق ساقتاۋ مينيسترىلىگى كۇزگى-قىسقى تولقىنعا «تاس-ءتۇيىن»، ءتىپتى 100% پايىز دايىن ەكەنىن ءبىر ەمەس، بىرنەشە رەت مالىمدەگەن. بىراق بۇگىنگى تاڭدا تەست قورىتىندىسى داۋعا اينالىپ، ونى دەرەكقورعا تىركەۋ مەحانيزمىندە اقاۋ تۋعانى بەلگىلى بولىپ وتىر.
شەرزاتتىڭ ءولىمى ىسىنە قاتىستى قۇپيا ۆيدەونى جاريالاۋ كىمگە كەرەك بولدى؟ – ساراپشىلار مەديا سىنى
24 قازان – كىتاپحاناشىلار مەرەكەسى قۇتتى بولسىن!
«ۋچاسكەدەن ارۋاققا كوك حات»: الماتىدا مارقۇمعا كەلگەن شاقىرتۋ
كوميسسيا مەن باقىلاۋشى ەسەبىندەگى ايىرماشىلىق: الماتىدا رەفەرەندۋم قالاي ءوتىپ جاتىر؟
ء"ادىل قازاقستان، ەستيتىن مەملەكەت" ەندى ادۆوكاتتارعا قىسىم جاساي باستادى ما؟
«پسەۆدو-بايقاۋشى» الدە كاسىبي باقىلاۋشى: رەفەرەندۋمدى كىم باقىلايدى؟