Bügin, 24 şilde tünde Qarağandı oblısınıñ Sätpaev qalasında jergilikti halıq «joğalğan bes jasar qız balanıñ küdikti pedofildiñ päterinen tabılğanına» narazılıq tanıtıp, tüni boyı ereuildetti.   

Keşe keşkisin Sätpaev qalasında izdeu salınğan büldirşin 24 şildege qarağan tünde köpqabattı üydiñ birinen tabıldı. Erikti türde izdesken jäne özge de twrğındar üydiñ mañına jinalğan.

Tüngi sağat 00:00-der şamasında osı üydiñ päterinen tapqan. Onı köptiñ közinen bürkep, auruhanağa alıp ketken. Bala turalı basqa habar äzirge belgisiz.

Sätpaevtıqtar birneşe sağat boyı küdiktini «jalpıhalıqtıq sot retinde köpşilik aldında jauapqa tartuğa» tırısıp, öz betinşe jazalauğa talpınğan. Qalalıq policiya departamenti bastığınıñ orınbasarı Ernat Qaliakparov narazı jwrttı tarauğa şaqırğan. Qala äkimi Asqar Idırısov jäne jergilikti imamnıñ da sözine qwlaq aspağan.

Äleumettik jelide tarağan beynejazbalardan küdikti men büldirşin tabılğan twrğın üydiñ qasına jinalğan jwrtşılıq pen sauıt-saymanmen jasanğan arnayı jasaqtı köruge boladı. Aşuğa bulıqqan keybir azamattar pod'ezge kiru üşin terezelerdiñ äynegin şağıp-sındırğan.

Sonday-aq äleumettik jelide küdikti retinde tarağan egde jastağı er adamnıñ «ıqtimal fotosınıñ» ras-ötirigi äzirge belgisiz. Resmi rastala qoyğan joq.

Sağat 4:00-ke qaray ızalı jwrt üyden policiya bölimşesine bet alğan. Videodağı män-jayğa köñil audarsaq, top bolıp jinalğandardıñ arasında bäzbireui «qız balanıñ reanimaciyada jatqanın jäne oğan egde azamat emes, onıñ wlı zorlıq körsetken. Balanı qızmettik iisşil ittiñ kömegimen tapqanın» aytadı.

Narazılar küdikti jetkizilui mümkin policiya bölimine qarata tas-tayaqtı qarşa boratqan uaqıtta ört söndiruşi, özge de tärtip saqşıları jetip kelgen. Olardıñ köbi küdiktiniñ bölimşede barına kümän keltirgen.

Jwma küni, tañ taqay bere sağat 4:30 kezinde SOBR sarbazdarı policiya bölimşesin baqılauğa alıp, küzetke twrdı. Al tura sağat 4:35-te policiya köpşilikti sabırğa şaqırıp, tärtipke keltiru üşin aspanğa qaray oq atqan körinedi.

Sätpaev qalası äkimdiginiñ apparatındağı baspasöz qızmetininiñ habarlauınşa, «joğalğan qız bala qazir anasımen birge». Sonday-aq resmi habarlamada «Azamattardan sabır saqtauın swraymız jäne jalğan qauesetke senbeuge şaqıramız» delingen.

Tañğı sağat 6:00-de Qarağandı oblısınıñ Policiya departamentiniñ baspasöz qızmeti arnayı mälimdeme jariyaladı. Onda:

«23 şilde küni sağat 21:00-de Sätpaev qalasınıñ policiyasına Jezqazğan qalasınıñ twrğını bes jasar balasınıñ (qız bala) joğalğanın aytıp şağımdanğan. Sätpaev qalasınıñ küştik qwrılımdarı men eriktilerdiñ izdeuimen qız bala köpqabattı üylerdiñ birindegi päterden tabıldı. Bala qazirgi uaqıtta auruhanada tekseristen ötip jatır», – dep jazılğan.

Sonımen qosa, oblıstıq policiya departamentiniñ baspasöz qızmetiniñ basşısı Janatay Sembekov küdiktiniñ wstalğanın jetkizdi.

«Degenmen ondağan azamat küdiktini öz qolına berudi talap etip otır. Tärtipsizdik bolğan orında policeyler jwmıs isteude. Departament tarapı qoğamdıq tärtipti qalpına keltiruge jäne qala twrğındarınıñ qauipsizdigin qorğauğa qajetti barlıq şaranı qabıldaydı», – dedi resmi uäkil.

Äkimdik eldi arandatuğa ermeuge ügittep bağuda. Qazirgi tañda qaladağı tärtipti baqılauğa Wlttıq gvardiyanıñ jasauılı jwmıldırılğan. Öre türegelgen azamattıq jäne qoğam belsendileri «zañ quatına senim setinegende el ayıptılardı özinşe jazalaudı qolğa alıp, Halıq sotı alğa şığatının, biraq mwnıñ qauipti ekenin» aytadı.

"The Qazaq Times"