Batıs Qazaqstan oblısı respublikanıñ aumaqtıq kartasında. Foto: Wikipedia

BQO densaulıq saqtau basqarması basşısınıñ orınbasarı Gülnar Abdrahmanova Öñirlik kommunikaciyalar qızmetinde ötken brifingte koronavirus jwqtırğan nauqastıñ arada birneşe ay ötken soñ qayta auırğanın mälimdegen. Bwl turalı aqparat qwralı jariyaladı. 

«Bwl Batıs Qazaqstan oblısındağı alğaşqı jağday. Alğaş ret äyel pandemiyanıñ basında koronavirus jwqtırğan bolatın. Ol säuir ayında edi. Ekinşi ret virus tamız ayında anıqtaldı. Nauqas eki kezde de auruhanada emdeldi», – dedi ol.

Bwl bügingi tañda COVID-19 koronavirusın qayta jwqtıru boyınşa respublikada resmi türde rastalğan jalğız jağday. Soñğı derekke säykes, öñirde 8,4 mıñğa juıq adam auırğan. Onıñ 7064-i koronavirus, 1,4 mıñdayı koronavirus pnevmoniyasına şaldıqqan.

Degenmen bügin densaulıq saqtau vice-ministri Ajar Ğiniyat men sanitarlıq-epidemiologiyalıq baqılau komitetiniñ törağası Ayjan Esmağambetova mwnı minstrlik qayta auırğan jağday retinde qarastırmaytının aytadı. Olardıñ sözinşe, pandemiyanıñ alğaşqı kezinde tirkelgen jağdaydı därigerler dwrıs diagnostikalay almağan. Dese de vice-ministr qaytalanğan keys qazan ayınıñ işinde Qarağandı oblısında tirkelgenin naqtıladı.

Qazaqstanda qazan ayınıñ ortasınan beri koronavirus jwqqandar, sonday-aq COVID-19 belgileri bar pnevmoniyağa şaldıqqandar edäuir artıp keledi. Osığan baylanıstı birqatar aymaqtarda karantindi qataytu turalı şeşim qabıldandı. Keybir qalalar men oblıstardıñ aumağına blok-beketter ornatıldı.

Bğan deyin birqatar elderde mamandar koronavirustı qayta jwqtıru turalı habarlağan. Osığan wqsas habardı Gonkong jäne Niderlandı ğalımdarı, qazan ayında Özbekstanda koronaviruspen küres jönindegi jergilikti ştab müşesi Nargiza Nurullaeva habarlağan.

"The Qazaq Times"