كوروناۆيرۋسپەن قايتا اۋىرعان ناۋقاس – قازاقستاندا العاش رەت

بقو دەنساۋلىق ساقتاۋ باسقارماسى باسشىسىنىڭ ورىنباسارى گۇلنار ابدراحمانوۆا وڭىرلىك كوممۋنيكاتسيالار قىزمەتىندە وتكەن بريفينگتە كوروناۆيرۋس جۇقتىرعان ناۋقاستىڭ ارادا بىرنەشە اي وتكەن سوڭ قايتا اۋىرعانىن مالىمدەگەن. بۇل تۋرالى اقپارات قۇرالى جاريالادى. 

«بۇل باتىس قازاقستان وبلىسىنداعى العاشقى جاعداي. العاش رەت ايەل پاندەميانىڭ باسىندا كوروناۆيرۋس جۇقتىرعان بولاتىن. ول ءساۋىر ايىندا ەدى. ەكىنشى رەت ۆيرۋس تامىز ايىندا انىقتالدى. ناۋقاس ەكى كەزدە دە اۋرۋحانادا ەمدەلدى»، – دەدى ول.

بۇل بۇگىنگى تاڭدا COVID-19 كوروناۆيرۋسىن قايتا جۇقتىرۋ بويىنشا رەسپۋبليكادا رەسمي تۇردە راستالعان جالعىز جاعداي. سوڭعى دەرەككە سايكەس، وڭىردە 8,4 مىڭعا جۋىق ادام اۋىرعان. ونىڭ 7064-ءى كوروناۆيرۋس، 1,4 مىڭدايى كوروناۆيرۋس پنەۆمونياسىنا شالدىققان.

دەگەنمەن بۇگىن دەنساۋلىق ساقتاۋ ۆيتسە-ءمينيسترى اجار عينيات مەن سانيتارلىق-ەپيدەميولوگيالىق باقىلاۋ كوميتەتىنىڭ توراعاسى ايجان ەسماعامبەتوۆا مۇنى مينسترلىك قايتا اۋىرعان جاعداي رەتىندە قاراستىرمايتىنىن ايتادى. ولاردىڭ سوزىنشە، پاندەميانىڭ العاشقى كەزىندە تىركەلگەن جاعدايدى دارىگەرلەر دۇرىس دياگنوستيكالاي الماعان. دەسە دە ۆيتسە-مينيستر قايتالانعان كەيس قازان ايىنىڭ ىشىندە قاراعاندى وبلىسىندا تىركەلگەنىن ناقتىلادى.

قازاقستاندا قازان ايىنىڭ ورتاسىنان بەرى كوروناۆيرۋس جۇققاندار، سونداي-اق COVID-19 بەلگىلەرى بار پنەۆمونياعا شالدىققاندار ەداۋىر ارتىپ كەلەدى. وسىعان بايلانىستى بىرقاتار ايماقتاردا كارانتيندى قاتايتۋ تۋرالى شەشىم قابىلداندى. كەيبىر قالالار مەن وبلىستاردىڭ اۋماعىنا بلوك-بەكەتتەر ورناتىلدى.

بعان دەيىن بىرقاتار ەلدەردە ماماندار كوروناۆيرۋستى قايتا جۇقتىرۋ تۋرالى حابارلاعان. وسىعان ۇقساس حاباردى گونكونگ جانە نيدەرلاندى عالىمدارى، قازان ايىندا وزبەكستاندا كوروناۆيرۋسپەن كۇرەس جونىندەگى جەرگىلىكتى شتاب مۇشەسى نارگيزا نۋرۋللاەۆا حابارلاعان.

"The Qazaq Times"