Därigerlerdiñ qwrmetine elordadağı twrğın üy keşenderiniñ biriniñ qasbetine salınıp jatqan mural. Foto: Astana äkimdiginiñ saytınan

Halqınıñ 41%-ı auıldı aymaqtarda twratın Qazaqstanda 10,9 mln qalalıqqa 61 310, al 7,6 mln auıl twrğınına 12 736 däriger keledi. Sonday-aq, auılda 51 mıñ (qalada 126,4 mıñ) orta sanattağı medqızmetker, 635 (qalada 2779) qoğamdıq densaulıq saqtau mamanı bar. Qaladağı körsetkiş bwdan kemi eki esege artıq.   

Koronavirus pandemiyasınıñ boljaldı küzgi tolqını qarsañında 16 qazan Densaulıq saqtau ministrligine qaraytın Respublikalıq densaulıq saqtaudı damıtu ortalığınıñ bas direktorı Qanat Tösekbaev salanı mamandarmen qamtu turalı OrtKom-da onlayn brifing ötkizdi. Ministrlik ökili jas mamandarğa jalpı praktika därigeri retinde 654, anesteziolog-reanimatolog qızmetine 360 ştat bos twrğanın aytıp, jwmısqa şaqırdı.

Qazaqstannıñ densaulıq saqtau jüyesinde 253 883 adam qızmet etedi. Onıñ 74 046 – däriger, 179 837 – orta sanattağı qızmetker. Memlekettik medicina mekemelerinde 6075 qızmetker bar, mwnıñ 2152-si däriger. Al jekemenşik wyımdarda 40439 maman (16 796 däriger) jwmıs isteydi. Respublikalıq densaulıq saqtaudı damıtu ortalığınıñ bastığı Qanat Tösekbaevtıñ mälimdeuinşe, biıl bıltırğa qarağanda därigerler ösimi 1,5%-ğa, orta sanattağı qızmetkerlergene swranıs 2,6%-ğa artqan.

DenMin-ge qarastı Respublikalıq densaulıq saqtaudı damıtu ortalığınıñ bas direktorı Tösekbaev Qanat Düysenbaywlı. Foto: OrtKom

Astana men Almatı qalasında kadr jetilikti bolğanımen, Aqmola, Almatı, Atırau, Jambıl jäne Qostanay oblıstarında maman tapşılığı äli de tolıqtay şeşilmegen. Öñirler arasındağı ayırım körsetkişi 24,5-ten 75,9-ğa deyingi aralıqta. Bwl kadr resursınıñ disbalansqa wşırağanın körsetedi. 9464 jalpı därigerdiñ 1205-i Türkistan oblısında. Sonımen qosa, 7558 terapevt pen 4950 pediatr bar.

Tösekbaev «mausım-şilde qırğınında», yağni 15 şildedegi jağday boyınşa elde 5201 däriger jetispegenin moyındadı. Äsirese, Qostanay öñirine 624 ştat qajet bolğan. Köbine saldardan soñ qozğalatın resmiler ädettegidey, köktemdegi karantinde emes, qırğınnan keyin jas mamandardı tartudı qolğa alğan. 10 qırküyektegi ahualğa sensek, 5,2 mıñdıq tapşılıq 1079-ğa kemipti. Degenmen biıl 7,9 mıñday tülek medicina salasınıñ mamanı atanğanına qaramastan, tap qazirgi kezde äli de bolsa 4122 däriger, orta sanattağı 8583 qızmetker jetispeytin körinedi.

Mına mamandıqtar boyınşa kadrlar tapşı:

  • anesteziolog-reanimatolog (393);
  • terapevter (346,75);
  • jalpı därigerler (319,5);
  • däriger-laboranttar (226);
  • psihiatrlar (213);
  • akuşer-ginekologtar (203,5);
  • pediatrı (202,75);
  • infekcionister (121,5);
  • epidemiologtar (102,5);
  • neonatologtar (85,25).

Biıl 10 773 däriger men 4295 medqızmetker biliktilikti arttıru jäne qayta dayarlau kursınan ötken.

Tösekbaevtıñ bayandamasında aytılğan derekke qarağanda, 2018 jılı orta sanattağı medqızmetkerdiñ aylığı 90 843 teñge bolsa, biıl bwl 56%-ğa ne 161 281 teñgege wlğayğan.

Prezident Toqaevtıñ därigerlerdiñ ortaşa jalaqısın 2023 jılğa deyin 2,3 esege arttıruğa bergen uädesi jäne Densaulıq saqtaudı damıtuğa arnalğan memlekettik bağdarlamada körsetilgen 2025 jılğa qaray därigerdiñ ortaşa aylığı 550 mıñ teñge boladı degen maqsat naqtı qanday jolmen jüzege asarı belgisiz.

Pandemiya bastalğalı beri Qazaqstanda mıñdağan medqızmetker virus jwqtırğan, 180-nen astamı ömirden ötken. Qazan ayınıñ basındağı resmi derekke qarağanda, Qazaqstanda 12 830 medicina qızmetkeri koronavirus jwqtırğan, onıñ 8333-i qızmet barısında auırğan. Ükimet basşısı Asqar Maminniñ 4 qazanda wsınğan mälimetinşe, qazirgi tañda epidemiyağa qarsı 46 mıñnan astam medicina qızmetkeri tartılğan.

"The Qazaq Times"