حالقىنىڭ 41%-ى اۋىلدى ايماقتاردا تۇراتىن قازاقستاندا 10,9 ملن قالالىققا 61 310, ال 7,6 ملن اۋىل تۇرعىنىنا 12 736 دارىگەر كەلەدى. سونداي-اق، اۋىلدا 51 مىڭ (قالادا 126,4 مىڭ) ورتا ساناتتاعى مەدقىزمەتكەر، 635 (قالادا 2779) قوعامدىق دەنساۋلىق ساقتاۋ مامانى بار. قالاداعى كورسەتكىش بۇدان كەمى ەكى ەسەگە ارتىق.   

كوروناۆيرۋس پاندەمياسىنىڭ بولجالدى كۇزگى تولقىنى قارساڭىندا 16 قازان دەنساۋلىق ساقتاۋ مينيسترلىگىنە قارايتىن رەسپۋبليكالىق دەنساۋلىق ساقتاۋدى دامىتۋ ورتالىعىنىڭ باس ديرەكتورى قانات توسەكباەۆ سالانى ماماندارمەن قامتۋ تۋرالى ورتكوم-دا ونلاين بريفينگ وتكىزدى. مينيسترلىك وكىلى جاس ماماندارعا جالپى پراكتيكا دارىگەرى رەتىندە 654, انەستەزيولوگ-رەانيماتولوگ قىزمەتىنە 360 شتات بوس تۇرعانىن ايتىپ، جۇمىسقا شاقىردى.

قازاقستاننىڭ دەنساۋلىق ساقتاۋ جۇيەسىندە 253 883 ادام قىزمەت ەتەدى. ونىڭ 74 046 – دارىگەر، 179 837 – ورتا ساناتتاعى قىزمەتكەر. مەملەكەتتىك مەديتسينا مەكەمەلەرىندە 6075 قىزمەتكەر بار، مۇنىڭ 2152-ءسى دارىگەر. ال جەكەمەنشىك ۇيىمداردا 40439 مامان (16 796 دارىگەر) جۇمىس ىستەيدى. رەسپۋبليكالىق دەنساۋلىق ساقتاۋدى دامىتۋ ورتالىعىنىڭ باستىعى قانات توسەكباەۆتىڭ مالىمدەۋىنشە، بيىل بىلتىرعا قاراعاندا دارىگەرلەر ءوسىمى 1,5%-عا، ورتا ساناتتاعى قىزمەتكەرلەرگەنە سۇرانىس 2,6%-عا ارتقان.

دەنمين-گە قاراستى رەسپۋبليكالىق دەنساۋلىق ساقتاۋدى دامىتۋ ورتالىعىنىڭ باس ديرەكتورى توسەكباەۆ قانات دۇيسەنبايۇلى. فوتو: ورتكوم

استانا مەن الماتى قالاسىندا كادر جەتىلىكتى بولعانىمەن، اقمولا، الماتى، اتىراۋ، جامبىل جانە قوستاناي وبلىستارىندا مامان تاپشىلىعى ءالى دە تولىقتاي شەشىلمەگەن. وڭىرلەر اراسىنداعى ايىرىم كورسەتكىشى 24,5-تەن 75,9-عا دەيىنگى ارالىقتا. بۇل كادر رەسۋرسىنىڭ ديسبالانسقا ۇشىراعانىن كورسەتەدى. 9464 جالپى دارىگەردىڭ 1205-ءى تۇركىستان وبلىسىندا. سونىمەن قوسا، 7558 تەراپەۆت پەن 4950 پەدياتر بار.

توسەكباەۆ «ماۋسىم-شىلدە قىرعىنىندا»، ياعني 15 شىلدەدەگى جاعداي بويىنشا ەلدە 5201 دارىگەر جەتىسپەگەنىن مويىندادى. اسىرەسە، قوستاناي وڭىرىنە 624 شتات قاجەت بولعان. كوبىنە سالداردان سوڭ قوزعالاتىن رەسميلەر ادەتتەگىدەي، كوكتەمدەگى كارانتيندە ەمەس، قىرعىننان كەيىن جاس مامانداردى تارتۋدى قولعا العان. 10 قىركۇيەكتەگى احۋالعا سەنسەك، 5,2 مىڭدىق تاپشىلىق 1079-عا كەمىپتى. دەگەنمەن بيىل 7,9 مىڭداي تۇلەك مەديتسينا سالاسىنىڭ مامانى اتانعانىنا قاراماستان، تاپ قازىرگى كەزدە ءالى دە بولسا 4122 دارىگەر، ورتا ساناتتاعى 8583 قىزمەتكەر جەتىسپەيتىن كورىنەدى.

مىنا ماماندىقتار بويىنشا كادرلار تاپشى:

  • انەستەزيولوگ-رەانيماتولوگ (393);
  • تەراپەۆتەر (346,75);
  • جالپى دارىگەرلەر (319,5);
  • دارىگەر-لابورانتتار (226);
  • پسيحياترلار (213);
  • اكۋشەر-گينەكولوگتار (203,5);
  • پەدياترى (202,75);
  • ينفەكتسيونيستەر (121,5);
  • ەپيدەميولوگتار (102,5);
  • نەوناتولوگتار (85,25).

بيىل 10 773 دارىگەر مەن 4295 مەدقىزمەتكەر بىلىكتىلىكتى ارتتىرۋ جانە قايتا دايارلاۋ كۋرسىنان وتكەن.

توسەكباەۆتىڭ بايانداماسىندا ايتىلعان دەرەككە قاراعاندا، 2018 جىلى ورتا ساناتتاعى مەدقىزمەتكەردىڭ ايلىعى 90 843 تەڭگە بولسا، بيىل بۇل 56%-عا نە 161 281 تەڭگەگە ۇلعايعان.

پرەزيدەنت توقاەۆتىڭ دارىگەرلەردىڭ ورتاشا جالاقىسىن 2023 جىلعا دەيىن 2,3 ەسەگە ارتتىرۋعا بەرگەن ۋادەسى جانە دەنساۋلىق ساقتاۋدى دامىتۋعا ارنالعان مەملەكەتتىك باعدارلامادا كورسەتىلگەن 2025 جىلعا قاراي دارىگەردىڭ ورتاشا ايلىعى 550 مىڭ تەڭگە بولادى دەگەن ماقسات ناقتى قانداي جولمەن جۇزەگە اسارى بەلگىسىز.

پاندەميا باستالعالى بەرى قازاقستاندا مىڭداعان مەدقىزمەتكەر ۆيرۋس جۇقتىرعان، 180-نەن استامى ومىردەن وتكەن. قازان ايىنىڭ باسىنداعى رەسمي دەرەككە قاراعاندا، قازاقستاندا 12 830 مەديتسينا قىزمەتكەرى كوروناۆيرۋس جۇقتىرعان، ونىڭ 8333-ءى قىزمەت بارىسىندا اۋىرعان. ۇكىمەت باسشىسى اسقار ءماميننىڭ 4 قازاندا ۇسىنعان مالىمەتىنشە، قازىرگى تاڭدا ەپيدەمياعا قارسى 46 مىڭنان استام مەديتسينا قىزمەتكەرى تارتىلعان.

"The Qazaq Times"